|
أفضل مكان لنصب الخيمه بالنفود ؟؟؟
السلام عليكم ورحمة الله ,,
طبعا يمكن يكون سؤال غريب :smailes81: أو تبي تقول الله واكبر نفود ورمل حط خيمك باي مكان ؟؟ طبعا ردي راح يكون .... بلاك ماطلعت معنا للدهنا الاسبوع اللي فات :mad: جينا متأخرين شوي لقينا النشامى بانين الخيمه ومظبطين الامور الله يعطيهم العافيه بس ؟؟ المحل بوسط مهب يعني يصلح محل مراقبه :( وراكم على هالمحل ياخوان قالو(ابومحمد) مل من الدوران ووقف سيارته هنا وقالنا هذا محلنا وعينك ماتشوف الا النور :smailes26: من صبح الخميس ضررررررررررب سافي تصدقون حتى البعارين تمر من عندنا مستغربه من هاللي حاط خيمته بهالمحل ؟ انا قلت لازم انزل موضوع استفسار وش احسن مكان تبني به خيمك بالنفود علشان مايجيك مثل هالسافي اللي اعمانا:confused: |
السلام عليكم :
هلا بك أخوي راعي سامودة صراحة كأنك تدري وش اللي في بالي نفس السؤال اللي عندي... لي عودة بإذن الله |
ههههه
اجل البعارين يمرن مستغربات ؟؟ ههه ضحكتني هالقفشة ... الله يقطع بليسك ياراعي سامودة. شف وانا اخوك الانسان دائماً يبحث عن الذرى في البر ... وخير الذرى هو تجنب الشمالي والغربي بالشتاء ولا عليك بما في ذلك باب الخيمة لازم يكون اما شرقي أو جنوبي. وهذا اللي اعرفه. |
بسم الله الرحمن الرحيم أخوي راعي ساموده ... سؤالك هذا مهم جداً ... ولا أحد يفكر أنه يوم من الأيام يكون موضوع مستقل ... بالنفود مافيه شك دوّر الطمان وإن حصل نقره أحسن ... لأن الماء لايجتمع بالنفود أبد فلذلك مافيه خوف ... أما الأرض الشداد ... يجب أن يضرب حساب المطر ... مثلاً على جال حزم ... يعني يكون المكان متصاغي بشكل غير ملاحظ ... مايكون متصاغي بقوّه عشان النوم والجلسه ... ولكن عشان المطر مايستقر بمكانه ... أما عن الهواء ...بالشتاء خاصة الخوف من الشماليّه والشماليّه الشرقيه أي مايسمى بالنسريّه ... والغربيّه أيضاً ... فلذلك يجب أن يكون أحد الأبواب يفتح جنوب ... وأن تكون الجلسه به دائماً ... يعني الخيمة تردك عن الشمال وإفتح الرواق الجنوبي وذر به عن الشرق ... وإمرح وأنت مستانس :Taj43: هذا مالدي وقد أكون مصيب وقد أكون مخطئ ... مشكور وماقصرت أخوي راعي سامودة على هالموضوع ... وننتظر المزيد ... من كل مفيد ... ,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,, |
أبو شعــلان كفيت ووفيت يالأمير ولا به قصور بالحاضرين واللي ردوا أخوي الغالي .......... راعي ساموده عليك بالخيام السنعه وأترك الباكستانيات الخفيفه اللي ما تذري ولا عن نسمه الضحى وعليك بمدارات الخيمه (( شد الرواق زين وأدفنه زين وشد الحبل بالأوتاد زين )) وما عليكم الا العافيه أخوك/ قـــناص الحـــبارى |
اقتباس:
|
اي بالله كذا من زماااااان ماشاء الله بدت تطلع الخبرات كفو ولله والصراحه اشكرك يا راعي ساموده على هالشطحات ;) الزينه والمفيده هات رأسك أخوك أبوعبدالله |
افضل مكان ان تكون وسط النقر وان يكون اتجاهها جنوباً أو غرباً
للحماية من الهبوب الشمالية والشرقية والنسرية |
اقتباس:
وتسلم على هالمعلومات القيمه اللتي سوف يتم تخزينها للاستفاده منها . نغزه ....... تراك ماجبتلنا علوم الثريا ؟؟:1aa: |
السلام عليكم:
الغالي راعي سامودة....... صراحة أنا كان لي تجربة مع هالسالفة الشباب طلعو للنفود (رحت أناظركتاب فيه خريطة يقول الكتاب نفود عريق البلدان وطرفه الثاني نفود الثويرات) المهم النفود قبل مخرج أم حزم يمين المهم ودوجي ودوجي القى محل زين أقول وشرايكم ياجماعة بالمحل لا مهوب زين.... وندور هاه وش رايكم ماش مهوب مناسب... ياناس هذي خبة طيبة قالوا خل نشوف محل ثاني.... واذا جاز لهم محل وش رايك يابوعبد الله قلت هذا مايصلح هذا منحدر وهذا عالي قالوا هذا محل مافيه احسن منه قلت آمرو بس :confused: طبعا كلهم اكبر مني :mad: :mad: :mad: والله ويطقونها فوق الطعس طبعا مهوب اعلى طعس هذي تسجل لهم ... وتشوف الخيمة وانت على الشارع :smailes26: :smailes26: والحمدلله إن ماجتنا هبايب ذيك الاربعة ايام وإلا كان تلقى الخيمة فوق سدر ((روضة أم العصافير)) اناطولت السالفة لاكن انافاضي وقمت اسولف عليكم:Taj43::Taj43: في حفظ الله...... |
موضوع رائع ياراعي ساموده
وللعلم : السافي بالنفود / اذا جيت في حقنه او نقره ما استفدت شي لأن الهوا ( يصتفق ) داخل النقره فعليك بالرفاع اللي فوق النقر وليس رؤؤس العروق واعكس مهاب الريح بناءا على اتجاه الهواء اما في المربعانيه وخصوصا بعد دخولها بعشرة ايام تقل الهبايب نهائيا بأرادة الله حتى دخول الشبط الهواء اللي بالنهار وخصوصا في فصل الشتاء غالبا ما يقف في الليل وخاصه بالمربعانيه والله الموفق |
هالموضوع مميز
فايدة كبيرة استفدتها من هالموضوع. لاهنت ياراعي ساموده والاخوان. |
حتى انا اللي مالي خبره بالخيام والمواقع استفدت الله يجزاكم خير وأولكم كاتب الموضوع راعي ساموده أبو الشطحات.
|
موضوع مفيد ياراعي سامودة فعلا اتجاه الابواب مهم ولكن يجيك بعض الاحيان ما تعرف شماله من جنوبه بس تبي تطق الخيمة من التعب وتنام اذكر كنا بالمصفر يوم من الايام ومعنا خيمة وكان الجو ضباب ولا تقدر تشوف ايدك وكان معنا عوائل فانجبرنا نطيق خيمتنا كيفما جائت وللاسف كان اتجاه الباب يم الشمال والهوا نسري يقص المسمار بعدما انقشع الضباب ولم نستطع تغيير الاتجاه بسبب شدة البرد والرياح |
اقتباس:
|
اقتباس:
|
مسّاكم الله بالخير جميعاً يمكن تستغربون إذا قلت لكم .. أنا لا أحبذ المبيت في نقرة ، فالنقرة تصيبني في الاختناق الهاجوسي :) أيضاً .. لا أحبذ الترزز في راس عيطا .. لأن الربد يشخفك ويلعب في مرسولك في نظري أفضل شي الأرض المفتوحة ، والشجرة الكبيرة هي أفضل ذرا طبيعي ، لا نقرة ولا غيره بمان الله :) |
السـلام عليكم بالنســبة لأفضل مكان لنصب الخيمة هو الذرى عن الهواء والسـافي وعليك بالجنوب أو النوب الغربي ومكان يكون متصاغي شوي
تحـــيـاتي |
موضوع مفيد جدا
بالنسبة لي ...أستفدت من هالآراء ... الله يعطيكم العافية |
اتمنى من بعض الاعضاءتنزيل صورة لمكان الذرى لأن بعض الناس قد لايعرفون كلمة ذرى
|
اقتباس:
هلا وغلا ابو عبدالله .. خشمك .. خشمك :smailes81: |
اولا انا والله شرهت عليك انك تطلع مع ناس ما هم راعين بر هههه
ثانيا بالشتاء دور المطامن والمذاري اذا كنت بصيهد انزل بمهبط (مهمص)على قولت احد الشيبان واذا كنت بنفود (النفود الكبير - الدهنا - المظهور- اي نفود) تجد فيها نقر صدر النقره بالغالب باتجاه الشرق ونفوده باتجاه القبله لذلك عليك بقاع النقره محاذي النفود وخذ الجهه الشماليه لاحتمالية الذرى اكبر ولعل المكان يكون متواسي وباب الخيمة يفتح مطلع شمس اذا بضلع وخل الضلع بينك وبين الشمال على كل حال اذا بفيضة عليك باطراف الفيضة اذا خيمه .. والناس يتساهلون بالجلوس وسط الفيضة وهو اكبر خطأ مع انه فيه جلسة طيبة ومناظر حلوه تسر العين وتشرح الخاطر واذا بشعيب دور العوشز ما فيه اذرى منه بس لا تنام ابد بالشعيب لورود نهي من النوم بمجاري السيل هذا ما عندي والاخوة اللي طرحوا ارائهم فيهم خير وكفايه اخوكم البرّي |
أزين من نقرة به شوووووووووك(طرررررررررخ)
|
دور نقره مثل قاعة الطاسة تصير ذارية بإذن الله عن المهاب وتكون قريبة من الحطب
واتمنى للجميع كشتة سنعه |
| الساعة الآن 02:51 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir