|
اليوم خاواني على البر فاروق
السلام عليكم ورحمة الله وبركاته اليوم خاواني علــــــــى البر فاروق ---------------- فاروق ياللي خوتــه ما تمـــــــــلي مع فجة النور قبل ما شوف مخلوق --------------- قفلت جوالي وبالي مســـــــــفهلي الفرت أبو ميه به العفش موثــــوق --------------- وابو علي ننصاه لاجل هرجه يسلي خذنا لوازمنا من البيت والســـــوق ------------ عجلين قبل الشمس ما تستهـــــلي البر عِشقه وفي الجمـاهير معشوق ------------- وحب قديم في الحشا له محـــــــلي عالهون نمشي والوقت ما فيه ملحوق ------------ طاح الكـــفر والهوا فيه فلي يا سدرةٌ يبكي حطبها الموق -------------- شهبا صغيره وظلها ما يظِلي هذا حطبنا بين أغصانِ وعروق ----------- شبيت فيه النار لين اشتعل لي أبا اتقهوى وابي افطر على ذوق -------------- واحلم بكاسة شاي ما قد حصل لي نثرت قشي وكل كيس كان مغلوق -------------- وهذا رفيق الــــــــدرب جالس محلي أنا انشد الكيف لاصرت مشفوق ---------------- ومن طيب الأحـــواج آخذ واخلي http://www.alrahlat.com/vb/uploaded/227_1197717810.jpg بن ٍ وتمرٍ كانوا لــــــــــــــنا ريوق ----------- وشاي العديني فى الخلا جايزن لي *** البـــــــر يا نسل الأجاويد له شوق ---------------- في الجـــــوف زايد غلاه ما يضمحلي **************** |
بسم الله الرحمن الرحيم أبو فهد ( مهراس ) ... الله الله على هالفكره ... صح لسانك مليون ... الصراحه إبداع يابوفهد ... قصه ورحله .... إختصرتها بقصيده ... والله شي رائع :smailes42: ... أمتعتنا يابوفهد ... بيض الله وجهك ... وننتظر المزيد ... والمزيد ... و المزيد ... ,,,,,,,,,,,,,,,,,, تحياتي ,,,,,,,,,,,,,,,,,,,,, |
الله علييييك يامهراس كفوو ولله وتسلم على هالقصيده المصوره ماشاء الله تبارك الله طلعه موفقه البـــــــر يا بن الأجاويد له شوق ---------------- في الجـــــوف زايد ولا يضمحلي الله يجيب الخير |
يابو فهد وش سويت احرجتنا بهالرحلة الخفافية مع فاروق هالحين وين نحط الموضوع بقسم الرحلات او بقسم القصايد |
ابداع ما بعده إبداع طريقة رائعة ومتميزة في سرد وقائع الرحلة مع صور اكثر من رائعة مشكور ابو فهد على هذا التميز وعلى براءة الاختراع في سرد الموضوع |
صح لسانك يابو فهد
وتسلم على هالطرح الرائع والجميل ... زاد جمال القصيدة هالمناظر الخلابة والحطب الجزل ( سمر) بارك الله فيك. |
بسم الله الرحمن الرحيم :eek: ----------------------------------------------------------------------------------------------:eek: ماشاء الله الغالي مهراس (أبو فهد ) صح لساااااااااااااااااااااااانك وبارك الله فيك وجزاك الله خير يالغالي على هذه الرحة والقصدية المصورة..http://www.alrahlat.com/vb/images/icons/icon14.gifhttp://www.alrahlat.com/vb/images/icons/icon14.gif ألف شكر يالغالي تقبل مني خالص الود والتقدير والمحبة أخوك ومحبك في الله عبدالله |
السلام عليكم يالامير الغالي ابو فهد ابداع جميل وكانني برفقتك مع فاروق عساك على القوة يالامير وعمل يستحق الثناء وكل عام وانت بخير |
هلا بالغالي ابو فهد
شكرا لهذه الفكرة قصيدة رحلاتية فاروقية رائعة سلمت اناملك |
أبو شعلان:
الشكر لك يابوشعلان على الرد، والتجديد دائما زين للصحه،،،، عمار السفينه: يا هلا بالغالي عمار السفينه، وياليت لوكانت فديو، شكرا على هذا الأعجاب، وهذا البيت بعد التعديل: البر يانسل الأجاويد لـــــه شوق ----------- في الجوف زايد غلاه ما يضمحلي أبو فراس: هلا بالعمده وحبيبنا أبو فراس، المعذره لكن هذي تبي تصير بقسم القصايد ما فيه شك، لك خالص الشكر والتقدير على(أبو فراس مر من هنا). الجارمن: الشكر لك على حضورك وتنويرك الموضوع، هذا واجبنا يكون الموضوع فيه تغيير بطريقه أو بأخرى، واعجابكم محل اهتمامنا، اتمنى لك عيد سعيد وكل عام وأنتم بخير. صقر: نحن سعداء بمرورك الكريم يابو أحمد صح بدنك، واسعدني أعجابك بالمناظر، والشجرة اللي بالصوره تغير فيها شطر البيت الأول بعد التنقيح ليصبح كالتالي: يا سدرة يبكي حطبها الموق --------------- شهبا صغيره وظِلها ما يِظِلي A.K.H: هلا فيك، هلا بعبدالله، أحبك الله الذي أحببتنا فيه، ردك زادني بهجه الله يزيدك من واسع فضله، شكرا على تشريفك الموضوع بهالحروف الجميله. |
الغالي مهراس طرح جميل وبطريقه أجمل ممتع وجزل ويشد المتابع مشكور يا ابو فهد تقبل اجمل تحية |
أنا أشهد انك وصفت الرحلة بطاروق ## وخوتك تراها من أول جايزتن لي خص انك بجدة والبعد ما هنا عوق ## بنتخاوى أنا وأنت من محل الى محلي والوعد بعدالحج اليا صبرنا عن الشوق ## شوق للنشامى قسم ما يضمحلي أبو فهد يرد على أبو فهد بخاطرة جالت في النفس عسى الله يجمعنا على خير وسلامتكم |
راعي الذوق:
كل عام وانت بخير، وانت تستحق الشكر على تنويرك الموضوع، هذا شرف لي مخاواتك للبر الفسيح، يارب انك تسهل الأمور. سهيل: الفكره كل ابوها على السريع من بداية الرحله الى نهايتها، وحبيت اني اجعلها في قصيده للتجديد وكسر الرتابه والملل في المواضيع وهي رحله خفافيه على قول أبو فراس. اسعدتني بمشاركتك لاهنت. ابو عبدالله: يامال الغناة ياثهلان، الله لا يجيبلك شر، دايم متابع معي في المواضيع، عسانا نشوفك قريب، ترى خوتك تنشرى بالغالي، الشكر لله وعيد سعيد. أبو ساره: الله يخلي لك عيالك، قريب من القلب والعين، أهلا بك، اسعدني انك من حوالينا، اتشرف بلقياك على دلة قهوه وفنجال شاي في احدى البران اللي خارج جده، والله محييك، رد جميل وقصيده أجمل صح لسانك.، عساك تسلم. |
شكرا لك اخي مهراس على هذه المشاركة الرائعة التي لا تقل روعة عن ما سبقها من مشاركات بارك الله فيك نحن في انتظار المزيد اخي الكريم
|
كان:
الحقيقه الأروع هو مشاركتك ياخبير القارمن اذا صح القول، الشكر لك على اعجابك بالموضوع، تقبل خالص الود. |
أخوي الغال / مـــــــــــــــــهراس ،، هــــــــــــلأ وغـــــلا .... بك يا أبو فهد وش خليت وش بقيت ...........................؟؟؟؟؟ الموضوع كوووووووووووم .... والشعر .. والقصيد ...كوووووووووووم وهالصوره.............. كوووووووووووووووم .. http://www.alrahlat.com/vb/uploaded/227_1197716389.jpg رائع يا بو فهد وناجح بكل المقاييس وفالك المليون ما أجمل هذه الصوره ... صح لسانك وسلمت أناملك ودمت لنا بود يا أبو فهد أخوك/ أبو عبدالعزيز قـــناص الحـــبارى |
عيني عليك باردة يامهراس ... وش خليت وش بقيت من التهييض أن تعانق اللقطة الفتوغرافية حكاية البيت الشعري سيناريوا جذّاب ونادر شكراً مهراس :) |
قناص الحبارى:
يابو عبد العزيز ما بقى شى ترى هذا معصور عصر، فقط تهييضه جات على بالي ولا كل الأوقات، ياعل فالك الطيب على هذا الحضور عساك على القوه، اسعدتنا بردك العطري، الله يرعاك ويسدد خطاك. أبو فالح: هذي فعايل البر يابو فالح عاد كيف لو انا قريب من الدهنا أو الصمان؟؟؟؟، حنا بتهامه قليل النفد والبر الفسيح عندنا ولكن الجو الأيام هذي مقبول ومشجع، عساك على القوه يامال الغناة، اثلج صدري حضورك وتشريفك. |
بسم الله الرحمن الرحيم الله يستر عليك يابو فهد دائماً تفاجأنا بمفاجأت سعيده ومفرحه ابداع شعري ابداع تصويري انا جازتلي الصوره اللي نزله ابو عبدالعزيز (قناص الحباري) رايقه مشكور اخوي مهراس |
ابو صقر:
وانت يابو صقر مشاركتك أكبر مفاجأه، واللي يجي منك طيب ومقبول، يامال الجنه، الله يزيدك محبه وسرور كما سرتني كلماتك الطيبه وشكرا لأعجابك بالصوره، وفي رعاية الله. |
أنا أسمى موضوعك الحداثة فى مواضيع الرحلات أتعبت اللى بعدك يابوفهد ... رائع رائع رائع |
ماشاء الله ياابوفهد قصيده مصوره رائعه بمعنى الكلمه وفالك التوفيق الصراحه ترابط الصور مع الابيات روعه :smailes44: بسام |
مشاء عليك أثرك شاعر مستخبي
يحقلك يابو فهد والله إني لولشت معك يالغالي آآآآآآآآآآآه ياقلبي من العمال وغثاهم تصدق إني مولع على البر ولا قدرت لكن هين إنشاء الله يابكرة لأدير الفنجال في هواء البال بلا عمار بلا هم:1aa: :mad: |
ريع الدياب:
مساك الله بالخير والمسرات، مرحبا بابو اسماعيل، قال المثل ان ما طاعك الزمان طيعه، فقط أحببت الخروج على النص الذي لا يؤثر على الفكره العامه للموضوع، أسعدني ردك وحضورك الدائم، وكل عيد وانت بصحه وسلامه. BASSAM: فالك الطيب أخي بسام، وأروع من ذلك مشاركتك الغاليه، الحمدلله على السلامه، أشكرك على الوصف الصادق وخيالك الخصب، وكل عام وأنت بخير. ريف النشاما: لو اني شاعر كان شفتني من زمان، هذي خواطر وتجميع محلي، يمشي الحال، الغرض فقط التغيير وكسر الروتين، والأبيات هيوض ماجات الا بالكاد، زادني اعجابك بالموضوع بهجة وسرورا، يامال العافيه، والنفس تحتاج رياضه وترويح جعل أيامك كلها راحه، والله يقويك على العمار، ولا تنساني يوم النزاله ومبروك مقدما. |
مشكور يابو فهد على هالقصيدة الجزله بس فاروق هذا من اي العرب ترا طخمته غريبه كنه من البنغال والا................
|
ماشاء الله عليك يا ابو فهد اثرك شاعر طرح جميل كالعادة الله يعطيك العافية .
|
الله عليك يبوفهد صراحه موضوع مميز وابيات حلوه
|
MEHRAS:
الشكر وصل يا أعز الأصحاب، وما قصرت على الرد، والحقيقه أخي MEHRAS صدق حدسك ان فاروق ماهو من العرب وقصته هي: كانت الطلعه صباح الجمعه الماضي (4/12/1428هـ) بعد صلاة الفجر، الجو مناسب والنسايم منعشه وبدون تخطيط عزمت على طلعة البر كم ساعه نسوي لنا قهوه ونفطر ونرجع، العاده دايم يخاويني جار عزيز اسمه أبو فواز حاولت احصله على الجوال ما قدرت، والوقت يمشي وفرصة، عندي عزم وكل شي على مايرام وماهي حلوه تطلع لوحدك لازم يكون معاك مرافق، فاروق هذا سواق عندنا وجا على بالي اسحبه معي، تعرف ذيك الحزه ما هنا زود مشاوير الخلق كلهم نايمين، والغرض فقط الرفقه وايضا هو ساعدني في الشيل والحط وقطع كثير من الحطب أخذناه معنا للبيت، وانا استانست كثير لما خاواني وكانت الطلعه جدا جميله وفي منطقه لأول مره أدهلها ولذلك حبيت أوصف هذه الساعات بقصة هذه الخرجه اللي بدون ميعاد وذكرت اسمه تقديرا لمخاواته لي. تقبل امتناني لمرورك الكريم. خالد940: الله يجمل حياتك ويلبسك ثوب الصحه أخونا خالد، شكرا لأعجابك بالموضوع وعلى تشريفك. جلمود الجبيري: الله يحلي أيامك أخي جلمود، انستنا بردك الطيب شرفت ولا كلفت، سروري من سرورك، عساك على القوه. |
اقتباس:
ومردود رائع منك يابو فهد |
أبو أشرف:
حيا الله الطيب الغالي، ومية أهلا شكرا على الرد وعساك من عواده كل عام وأنتم بخير. |
وعليكم السلام ورحمة الله وبركاته
قصيدة وصورة وموقع أخي الغالي مهراس إجتمعت لتجعل منه موضوع ، قمة في الروعة كل عام وأنتم بخير |
أبو مروان:
وانت بألف عافيه يابو مروان، وقمة الروعه أخي محمد هو تشريفك المبجل وجمال ردك فاح وعطر الموضوع، لاهنت على الحضور، ولك تقديري وشكري. |
كفو والله يا ابوفهد
ابداع وصفي شعري رحلاتي جمييييييييل عيدك مبارك يالغالي |
ياما العافيه يابو فهد
لقد اجدت وابدعت في طرح الموضوع وكل عام وانت بخير |
الضاحي:
هلا بك أخي الضاحي نورت الموضوع بكلماتك العذبه، لاهنت يامال الغناة. ولد نجد: حياك الله وعيدك مبارك، الدار نور بوجودك. |
ويني عن هالمشاركة المميزة
ماشاء الله عليك يابوفهد السهل الممتنع أبدعت بالوصف وبطريقة بسيطة ولكن قوية وتكفي عن الكثير من الوصف النثري ... على طاري النثري هالحين إلامني بغيت أخلي الكبسة نثري بالكاتم وش كثر أحط الماء ؟ << مسكه أبو فهد مع علباته وحلته خارج الموضوع وقال له لاعمري أشوفك معتب مشاركاتي :Taj43: تسلم يابوفهد لاهنت وصح لسانك وسلامنا لفاروق وإن شاء الله يوم من الأيام أبخاويك أنا عشان تكتب بي شعر :smailes42: |
السلام عليكم ورحمة الله ولركاته هزيم الرعد:الله يحييك يابو صالح، وانا يسعدني ان واحد مثلك يرد، تعرف مشاركتك فيها حيويه، ومعذور لو تأخرت أو مارديت، نحنا لا نزال نمون على بعض يكفي معرفتكم من خلال المنتدى، أسعدني أيضا تقبلك للموضوع والأبيات، والشعر ليس هوايتي فقط غصبت نفسي على التجديد والشعر كان أقرب فكره، بارك الله فيك، شكرا على التواصل. |
بيض الله وجهك يا أبو فهد على هذي الرحلة الجميلة في كل شي .. جمال المكان و بساطة الإستعداد .. و تواضع جم ... و كلمة حق أقولها ..من يعرفك عن قرب لا يستغرب دماثة الأخلاق فيك.
وفقك الله لما يحبه و يرضاه. |
صح لسانك يا ابو فهد
موضوع متميز ومميز وبنكهه وطرح جديد تسلم على هالابداع تقبل مرور اخوك البرّي |
الحرفي:
مرحبا هيل بابو محمد، الله يجمعنا وياكم في جلسه سنعه مثل ذي، أشكرك على المواصله والكلمات العذبه، واسعدنى تشريفك يامال الغناة. البري: هلا وغلا صح بدنك، وسلمك الله مرورك أثلج صدري، شكرا على شعورك الطيب. |
يعطيك العافيه على الموضوع
وصح لساانك وهيضتنا يابو فهد |
حياك الله اخي أبوسعد الرويس، صح بدنك، والبر ما في شك يهيض العشاق ويخليهم يبدعون. شكرا على مرورك،
|
ماشاء الله تبارك الله قصيده معانيها قويه لدرجة ان الصور بتتكلم بيض الله وجهك بالخير والطيب يانا سجيت مع هالموضوع تخيلت نفسي انا اللي كاشت الله يهنيكم يالغالي اينما وحيثما اممت وجهك ومني التقييم تقبل تقديري |
صح لسانك طليوووون << أكبر عدد بالسعودية ليس للإبداع حدود عند بعض الناس .. مثلك يابو فهد .. واسمحلي أتفلت وأشارك بهالبيتين وأنــــا من عقب هالعلم مطفــــوق ... ودي أروح بــــــأي نفــــدٍ يسلي ماعاد أحتمل لا الديرة ولا الضوق ... ولا احتمل شغل المدينة المملي وسلامتكم صح ماعندي سالفة .. بس الأبيات على الصور .. تهيض |
تكفيني الذكرى:
تقييمك مقبول، لك الشكر على المرور والله يتقبل دعواتك الله يجعلك كذالك مقبول الدعاء، أخ عزيز وغالي، لايمكن وصف شعوري لك بأعجابك وسجتك مع الأبيات والصور، الله يجمعنا وياك على ما يحب ويرضى انه سميع مجيب. عاشق النداوي: الله يسلمك على الأبيات الرائعه، عمل طيب والنفس اذا هوت شى ابدعت، ومثل ما قلت الأبداع ماله حدود، اسعدني حضورك المتميز في الموضوع. |
فالك البيرق
:smailes42: :smailes42: :smailes42: :smailes42: :smailes42: :smailes42: |
اقول صـــــــــــــــــــــــــــــــــــــــــــــــــ ــــــــــــــــــــــــــح السانك يابو فهد
|
أبو سهر:
وفالك الطيب، شرفتنا ولك خالص الود. أبو زايد: صح بدنك، شكرا على تنويرك وحضورك. |
الصراحه مبدع مهراس خشيت جوو مع القصيده ... اسسسحن شي رفيقك ... هو جايبه يعاون والا خويك جد؟؟! http://www.alrahlat.com/vb/uploaded/227_1197717373.jpg! ياحبيله متكي ابو الشباب .. وقسمن احس من جلسته انه رهيب:rolleyes: البر عِشقه وفي الجمـاهير معشوق ------------- وحب قديم في الحشا له محـــــــلي (قلب حب يخرخر دمامين) http://www.alrahlat.com/vb/uploaded/227_1197717706.jpg أنا انشد الكيف لاصرت مشفوق ---------------- ومن طيب الأحـــواج آخذ واخلي انا اشهد .. مابقى نوع من الشاهي ماشريت باقي الوزه تسن مالمحتهم معهم :smailes26: قصتن روعتن بطريقتن اروعن:smailes44: يعطيك العافيه |
ودي أكشت دايم:
رفيقى هذا السواق حقنا، يعني خوي ورفيق بس في هذي الطلعه يوم اني ما حصلت أحد يطلع معي الجمعه الصباح، وشكرا على الأطراء لو يدري عنك فاروق جا حب راسك. هو قاعد علشان ما يعرف يصور ولا كان قعدت وصورني وصار بيت القصيده يختلف باختلاف الشخص، وتراني كرفته يقطع حطب. الحقيقه كانت طلعه وفطور وقهوه شى جنان. شكرا على المرور، بيض الله وجهك. |
| الساعة الآن 01:11 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir