|
ماقاله الشعراء عن المحبه والعشق والغلا بين الصقر والصقار .... أبوشعلان
بسم الله الرحمن الرحيم أخواني الكرام أعضاء وزوار منتديات الرحلات السلام عليكم ورحمة الله وبركاته : (( العلاقه بين الصقر والصقار )) تعلمون مدى العلاقه بين الصقار والصقر لما يكنه الصقار من محبه للذك الصقر ... فنمنهم من عشقه عشق مشابه للخيال ... ومنهم من وصف محبته بأنها مساويه لمحبة والديه ومنهم من ساوا محبة الصقر بمحبة أولاده ... ومنهم أيضاً من مرض بسبب مفارقته ... ومن أجل هذا أحببت أن أورد لكم بعض ماقيل من أبيات القصيد لتلك العلاقه التي بينهم ... ونبدأ ببيت لشاعر المقناص الأول / بدر بن عواد الحويفي حيث أن هذا البيت هو مفتاح لكل مابعده حيث قال : الطير له عند الصقاقير مقدار *** عند الرجال اللي حقيقه ولعها ويقول أيضا : الطيــــر هــــو غاية غرامي وشفّي *** أقـــدره تــقـديــر الأجــواد للـــضـــيـف مـن كبــــر قـــدره شايله فـوق كفّي *** وأرعاه تسع شهور بالقيض والصيف ومن ثم نورد لكم قول الشاعر : صالح بن حمد الزيد حيث يقول : ودايـــم علــى كفه يدارا مـــداراه *** من خوف لا ريشه يجي فيه تكسير يمسح على وجهه وصدره بيمناه *** تـدليــل ورع مـــا بلغ خمسٍ صغير عشقـــه تعدا عشـــق عنتر وليلاه *** وحبه تـــعدا حـــــب بيض الغــنادير وبعدها يقول الشاعر / ثامر العبدالله الماضي .. ويعبر عن مدى عشقه للطير حيث يقول : مدري أوالــي الطير وأنقله وأدعـيه *** وإلا أتـركه برضن خلا ينتهض فوق لـولاي أحبـه وأنـــطرب له وأداريـه *** وأصبحت أنا وإياه عاشق ومعشوق حــلـفـن عـلـي إنـي لـفــّكه وأخـلــيه *** ولاينقضـب ســاقه من اليوم بسبوق مــن يـوم قـّل الصيـد شـــانت أرضيه *** مـــاعاد لي بالقنص خاطر ولا ذوق راح الزمان اللــي به الصيد أراعيه *** جـمـايـل وقـطـعان والبـاقـــي فـروق يـــاعيني اللــي تــذرف الــدمع كفّيه *** الله يـسـتـر لايـجـي وقـت مـمــحوق وأيضاً قال الشاعر / غنام بن فالح المسردي ... فأنظر من يساوي بمحبة الصقر زوع قلبي زوعة اللي على الجول أطلقوه *** نادر العش مغذينه على لحم القطا فـــي يـد صقــار يحبه ســـوات أمه وأبوه *** ما يبيعه بالدراهم ولا جاء بالعطا وقال الشاعر / عبدالرحمن اليحيى متحدثاً عن تقدير الطير طيور الحرار إلـها مكانه وتعبار *** وقدره يعرفه كل من عاش معها قدره يعرفه صاحب الميز والكار *** ليا ذعذع الوسمي شنوده جمعها قال الشاعر/ سعود المسعود يتحدّث عن مايهواه قلبه ... قلبي يتوق مع اشقر الريش لاتاق *** خص ليا صارت طلوعه تحقق ويقول الشاعر / سعد بن يوسف الحميداني . متعاطفاً مع الطير ومدى الغلا اللذي يكنه للطير ... يـــا سيد الجــو تاليتك بســـوق الحمام *** حطوك في شبك يالغالي تقوم وتــطيح عقب الفضاء والفيافي واعتناق الغمام *** في لحظة يتعب الصقار صوت ولفيح يـــا سيد الجــو.. والله ان ظلمك حــرام *** فـي مربط الذل تكفخ يالنداوي كسيح ويقول الشاعر / عبد الله بن عون معاتباً أهل الصقاره الذين لا يوفون حق الطير وهذا يبيّن المحبه للطير أيضاً حيث قال : حسبي علــى اللي عزرو فيك تــعزير *** تكفخ ويصلاك الحديد بــحراره حشرت وحـوش البر حتى الـــعصافير *** من يوم دور من وراها تجاره أوفوا حقوق الطير وإلا اتركوا الطير *** لا تــظلمونـه يـاجداد الصقاره ويقول أيضاً الشاعر / عبدالله بن عون .. مبيناً تبادل المحبه بينه وبين الطير . حيث يقول . ياطير عقبي كن خاطرك شاين *** خاطرك شين وغيبتي عنك يومين النقـص فيك مبينٍ لـــه بـــواين *** في لمعة الريشه وفي ناظر العين يــاطيـر انــا وياك كـنـّا خــداين *** وبينــي وبينك ولف ومــعاملٍ زين حتى قال : مبيناً مدى حبه له . وأمّـــا لقينا للحباري عواين *** والاّ تــوادعـنـا وداع الــمحبين إلى أن قال : لوّ كان عندي من فراقك بهاين *** حنّــا عــزاز ولانهيـــن العزيزين خلّك تروح ولاتشوف الـــغباين *** شاملك عفوٍ مثل عفو المساجين وهنا يقول الشاعر / حمد السعيد . عندما سأل الطلح عن الطير من الخوف عليه . يالطلح قـل لـي عـل مابـه خلافـي *** الـبـارحـه بـــرد وشـمــالٍ قــــويــه كانـه تعـشـى قـلـت عـلـه عـوافـي *** والحـي يجمعـه الولـي مـع خـويـه حتى أن قال : يالطـلـح ذا حـبـه ولاهــو بـخـافـي *** مـتـعــادلٍ حــبــه بــحــب الـبـنـيـه ومرة أخرى يقول الشاعر / بدر بن عواد الحويفي حــبـه بــقــلـبـي بـاني لـه عـماره *** علـى حجـر وفروعـها عــشـرة ادوار وشعبيتـه عــنــدي تـمـثل ســفاره *** لـــو كــان دور الطير مــقفي ومـــنهار وقال أيضاً مبيناً المساواة بين حب الطير وحب أولاده : والله يــالولا الطير بالقلب غالي *** إني لأجوز من العنا والـــمطاريش لكــن حــب الطير شارك عيالي *** ولو ماأتسلى بالولع كيف أباعيش والله ماني عن غلا الطير سالي *** لـو نعلفه من بارد الخبز والـعيش وقال الشاعر / مشعل بن حمود الحبيني عندما تبين غلا الطير بعد ضياعة . ومفارقته ... ما غير اسلي خاطري بــالدموعي *** مثل الذي من يقضي الدين بالدين وكله سبب طيري حسين الطبوعي *** النــادر اللي شوفته تطرب العين إلى أن قال : ومما جرا يا حسين قلبي قنوعي *** لـــو كان عقبه خاطري صايرٍ شين وأيضاً قال الشاعر / مطلق عوده الحريجي : لاصـــار لك غالـي تحـبه وتفديه *** عزاه يافرقى العديم النداوي أشقر وبه شيٍ على شانه أغليه *** ولفٍ وكنــه يفتهم للعـزاوي وقال الشاعر / بندر بن منصور موضحاً حب الطير يا حمود انا في نقلت الطير مجبور *** احــب شــوفـه واستلـذ بمطيره مــا همني العاذل ولــو كثر الشور *** من ردني عنه حشى مستشيره اخــذ علـى شانه لي ايـــام وشهور *** اعتــز في نقله وفكـت جـريره وقال الشاعر / مبارك إبن عيينان الهاجري عن غلا الطير : أشهد إنه غـــاليّن والله شهيدي *** يوم قفّا مـــاتهنيت الــوسايد طشت كنّي مضرملّي قات زيدي *** لاطرالي من مهدّاته مصايد وأخيراً نورد لكم ما قاله الشاعر مبارك في قصيدة أخرى متمادياً في حب الطير : ذكرتني راعي الفعول الفرايد *** زودن على فعله غدا حبه هيام إلى أن قال : أقفــــى وخلى عروق قلبي بدايد *** مــن يوم مات وقلب راعيه مـــنضام زاد النكـــايد عقب مــــوته نكايد *** والحــزن في قلبي بنـــى عقبه خـــيام يــالايمي في حــــب عــزام بـايد *** مـــاعضتني لـــوجبت ساطور وحـزام لولا المخافه قلت وسط الجرايد *** إن العزا في الطير من شرع الإسلام هذا ماسمعته وماقرأته عن هذا العشق الرائع بين الصقر والصقار وأنا أجزم أن هناك الكثير والكثير من القصائد والأبيات عن هذا العشق ولكن للأسف هذا مايحضرني ... متمنياً أن أكون قدمت شيئ يحوز على إستحسانكم ... والسلام عليكم ورحمة الله وبركاته ... ,,,,,,,,,,,,,,,,,,,, تحياتي ,,,,,,,,,,,,,,,,,,,,,, أبوشعلان |
اقتباس:
وعليكم السلام الله يعطيك العافيه على الموضوع الرائع وحبيت اني اصحح معلومه بان الشاعر مطلق عوده الحريجي وليس الحربي والابيات اللي ذكرتها هيه من قصيده حازت على المركز الأول في مهرجان ابو ظبي لوصف ضياع الطير والسلام عليكم |
عليكم السلام ورحمة الله وبركاته
تسلم يا ابوشعلان ويسلم راسك ، بيض الله وجهك على الجمع الطيب والطيب ما يجي منه إلا طيب قصائد جميله في وصف وعلاقة الصقر والصقار |
الغالي على القلب ابو شعلان هلا بك وما جبت ابداع وربي وعساك على لاقوة يالامير هذا الشغل اللي يبرد الكبد ولا عدمنا هذا الجمال وهذا بيت لي اوصف عين الطير وعينه ليا من لد فيها على الخرب@@ يموت من خوفه وهو ما دني له تقبل كل الود |
الغالي ابو شعلان: ابدعت في تجميع هذه التشكيله من اشعار ووأوصاف حب الطير من الصقارين لطيورهم، والحقيقه هذه ميزه يشترك فيها الكثير من الناس الذين يربون الخيول وأهل الهوايات الأخرى لكن حب الطير أشوفه زايد عليهم، بارك الله فيك على هذا الطرح. |
اقتباس:
حياك الله أخوي أسمحلي ... تم التعديل وبيض الله وجهك على هذا التذكير المهم ... شاكر ومقدر لك ... مرورك أسعدني يالغالي ... ,,,,,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,, |
أبو شعلان الله يعطيك العافية على ذا الابيات و الجمع الطيب
هيضتنا والله على نقل الطير لكن الله المستعاااااان و نتطلع منك المزيد... تقبّل مروري(أستراليا) |
الله يعطيك العافيه علي هل ابيات
مشكوووووور وماقصرت |
يابو شعلان
ذبحتنا ابهالموضوح صراحه انك نفخت على نارا هادئه بوصط كبدي وجددت اشتعاله انا من المولعين وبشده بحب الصقور ولكن الضروف الان لم تسمحلنا بممارسة مانصبو اليه ومنها قلة الطرائد ثانيا الخويا لان مثل ماتشوف هذا الوقت نفسيات الناس واطباعهم مختلفه وقليل من الناس الي تالفه روحك والمسكين اخوك سعود له بيتين يقول ... كلن ابعز الصيف خلا المشاوير وقام ايتمنا نط ذيك الشعافي وانا اتمنى والتمني مخاسير ومادمت اشوف البر فنا متعافي جلسة خلا في تالي سهيل بعصير بجوار طلحه بين جال وسافي في مجلس مافيه غيري مع الطير الا الرفيق القرم هاك السنافي ابوعبدالله عيسى ريف المسايير الى نصيته جاك يركض اوحافي الى آخر القصيده ارجو ان لا أكون اطلت بس هذا غصب علي ومثل ماقلت لك تحياتي |
ماشاءالله تبارك الرحمن موضوع قمة قمة بالروعه صح لسان الشعراء الرائعين ووفقك اخوي ابوشعلان على الذائقة المتميزة في الأختيار ابيات جدا رائعه فائق احترامي وتقديري اختك فارسة |
اقتباس:
هلابك يابوعبدالعزيز ... الله لايهينك على مرورك الجميل ... سرني إعجابك ياربي لك الحمد ... وجعلك سالم يابعدي ... اقتباس:
ياهلا والله وغلا يابومحمد ... أول شي صح لسانك على هالبيت ... إن شاءالله ندرجه بالمواضيع القادمة ... إعجابك بالموضوع يكفي يابعدي ... لاهنت على هالكلام الحلو ... وشاكر ومقدر مرورك الكريم ... اقتباس:
يامرحبا مليون يابوفهد ... سرني إعجابك بالموضوع ... وهذا فيتامين للمواضيع القادمه ... مشكور يابوفهد على هالكلام الطيب ... وألف شكر لك على مرورك يابعدي ... ,,,,,,,,,,,,,,,,,,,,,,,, تحياتي للجميع ,,,,,,,,,,,,,,,,,,,,,,,, |
اقتباس:
هلا وغلا يابوفيصل ... يالله إن تحيّيه ... والله يعافيك يارب ... وترى الطير اللي بالصوره هو عزيز ... مع أول حباى ... ونشوفك على خير ... ,,,,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,, |
أخوي الغالي / أبو شعـــلان ،، السلام عليكم ورحمة الله وبركاته ،، أخوي لا أزيد على ما سطرته أناملك من قصيد وشعر مميز ,, ولا أزيد على ما ذكروا الأخوان وعشق الطير له عندي ذكريات ....... وقد ذكرتها لك .... في لقائنا في رمضان ,, والله يعلم مدى حبي للطير وبموضوعك هذا فتقت جروح كانت شبه مندمله .. ولكن الشي بالشيء يذكر على العموم لدي إضافه بسيطه وهي قصيد لشاعرنا الصقار عاشق الطير / حمد بن فهد الحميده الخالدي عندما فقد طيره شـــــيـبان أرجو أن تنال إعجابك وإجاب رواد المنتدى وأصحاب الطيور وعشاق القنص بعد تحميل القصيده والأستماع لكلماتها ستعرفون مدى عشق الطير عند أصحابه أخوكم/ قــــناص الحـــبارى أبو عبدالعزيز |
تسلم يابو شعلان
سلطت الضوء على جانب مهم من جوانب الصقارين وهو عشق الطير ... نحن نرى بأعيننا عشقهم لطيورهم جلعتهم يساوونه بحب أولادهم مثلما قال بدر الحويفي: لاكـن حـب الطيـر شــارك اعيـالـي ***ولو ما تسلى بالولع كيـف اباعيـش ننتظر مثل هذا الموضوع الرائع في التحقيق والتجميع..... بارك الله فيك. |
اقتباس:
يامرحبا والله أخوي s3od_797 ... العفو أخوي ... وجزاك الله خير ... والله يعقل عليك طيرك يارب ... ,,,,,,,,,,,,,,,,,, تحياتي ,,,,,,,,,,,,,,,,,,,, |
[quote=أبو شعلان;39031]
ويقول الشاعر / عبدالرحمن العطاوي معاتباً أهل الصقاره الذين لا يوفون حق الطير وهذا يبيّن المحبه للطير أيضاً حيث قال : حسبي علــى اللي عزرو فيك تــعزير *** تكفخ ويصلاك الحديد بــحراره حشرت وحـوش البر حتى الـــعصافير *** من يوم دور من وراها تجاره أوفوا حقوق الطير وإلا اتركوا الطير *** لا تــظلمونـه يـاجداد الصقاره السلام عليكم ماشاء الله على الموضوع الحقيقه ابداع لكن فيه خطا بسييط القصيده هذي لعبدالله بن عون اللي مطلعه ياطير ماحدك نصيبك على خير وراك مسجون بوسط الغماره |
اقتباس:
أخوي سعود ... عقب هالقصيدة والله إن ودي أجيك هالحين وأضفّك وسيده للبر ... ياخوي أنت اللي قطعت قلبي بالأبيات... صح لسانك ماشاءالله تبارك الله ... وتذكرت حال الصقاقير بالصيف ... كل الصيف يروح بسواليفهم عن موسم الطيور اللي راح وش لقيتوا وعساكم صدتو ... إلين تجي نقلت الطير ... ولكن هالقصيدة ياسعود ... يبيله موضوع بلحالة ... شكلها طويله ... ترانا شفقين بالحيل ... لاهنت يالغالي ... وبيض الله وجهك ... ,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,, |
اقتباس:
حياك الله أختي فارسه ... مشكوره على الكلام الطيب ... وسرني إعجابك بالموضوع ... والله يعطيك العافيه على مرورك الكريم ... ,,,,,,,,,,,,,,,, تحياتي ,,,,,,,,,,,,,,,,,,,, |
اقتباس:
الغالي أبو عبدالعزيز ... ياهلا ومية هلا ... كلامك صحيح 100% يابعدي ... والطير فتنه في جماله وفعله ...وإذا إكتملت هاتين يصبح الصقار كأنه مسحور ... ومشكور يابعدي على هالقصيده الرائعة ... وصح لسان الشاعر / حمد الخالدي ... عزالله إنه شاعر ... لاهنت يابو عبدالعزيز ... وبيض الله وجهك ... ,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,,, |
اقتباس:
يامال الجنه أخوي راعي الولع ... وجزاك الله ألف خير ... تم التعديل ... والمشكله إني كنت حافظها :D ومشكور على التدقيق ... والله الله دقق زين عشان يطلع الموضوع متكامل ... لاهنت يالغالي على مرورك ... ,,,,,,,,,,,,,,,,, تحياتي ,,,,,,,,,,,,,,,,,,,,, |
موضوع رائع وصح لساانك
وعطنا من قصايدك مثل اللي انت خابر تهي تهي |
دوماً مبدع ومتميز بارك الله فيك ,,,,
بسم الله الرحمن الرحيم وعليكم السلام ورحمة الله وبركاته الغااااااااالي أبوشعلان .. ماشاء الله بارك الله فيك ووبيض الله وجهك و جزاك الله كل خير على هذا الموضوع الرائع..http://www.alrahlat.com/vb/images/icons/icon14.gifhttp://www.alrahlat.com/vb/images/icons/icon14.gif فعلاً العلاقة بين الصقر والصقار كبيره جداً .. ألللللللللللف شكر يالغالي .. تقبل مني خالص الود والتقدير والمحبة أخوك ومحبك في الله عبدالله |
اقتباس:
هلابك أخوي أبو سعد ... مرورك بالموضوع أسعدني بالحيل ... وصح بدنك يالغالي ... والقصايد بالطريق بإذن الله ... لاهنت يابعدي ... ,,,,,,,,,,,,,,,,,,,, تحياتي ,,,,,,,,,,,,,,,,,,,,, |
ابوشعلان موضوعك فعلا جميل ويجبر على القراءه.
قال الشاعر سعود المسعود من اهل الشعراء وهو مولع بالطير من صغره وعمره الان 40سنه يقول في بدايه قصيده له . قلبي يتوق مع اشقر الريش لاتاق "-" خص ليا صارت طلوعه تحقق ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ وله ايضا. يامل قلب مخلب الهم ناشـه"-" خلى الونس عني بعيد المناويش مخلب ربيب غالبته الوحاشـــه"-" باقن براسه للوحاشه نغاميش شاف المقفي واطلبه بانخراشه"-"وادلى عليه بصايد ينثر الريش يقد ماقدمه ويمضي لجـــــــاشه"-"ويورد الصايد ورود المعاطيش ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــ وله ايضا ياعين حر وكد الطلع واختف"-"نزر الى ناش الحبارى نصفها ولي عوده للموضوع. عليم العطش |
اقتباس:
هلا وغلا يابومحمد ... الله يعطيك العافيه يارب على هالكلام الطيب ... لاهنت يابومحمد ... وشاكر ومقدر مرورك يالغالي ... ,,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,, |
اقتباس:
هلابك أخوي عليم العطش ... وهذي الساعة المباركه والله ... صح لسان الشاعر ماشاءالله تبارك الله ... تمت إضافة البيت اللي باللون الأحمر إلى الموضوع ... والبيت الأخير سيدرج بموضوع عن عين الطير بإذن الله ... مشكور وماقصرت يابعدي ... وبيض الله وجهك... ومرورك أسعدني بالحيل ... ,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,, |
تسلم يابو شعلان .. وصح لسانك .. وألسنة الشعراء هذا الإبداع بعينه .. دمت لنا شمعة مضيئة تقبل أسمى معاني التقدير والاحترام |
اقتباس:
هلابك أخوي عاشق النداوي ... صح بدنك يالغالي ... يامال العافيه على هالإعجاب والكلام الطيب http://www.alrahlat.com/vb/images/icons/icon14.gif... صدقّني إن مرورك أسعدني يالغالي :Taj43: ,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,, |
وعليكم السلام ورحمة الله وبركاته
مشكور اخوي على هذه المشاركه تحياتي لك |
أبو شعلان وش خليت لنا ؟؟؟ ماهناك تعليق يليق بهالطرح الرائع والله إبداع وإبداع وإبداع |
إحاطة كاملة بما قالوه الشعّار عن الصقر أبوشعلان ::: ــــ هذا الجهد لا يقدّر بثمن وهذا الموضوع يكون مرجعاً لمن أراد جميع الأبيات التي قيلت بهذا المحبوب أبو شعلان إضافتي أبيات للوالد من قصيدة 56 بيت اكتفي بهذه الأبيات أصقورهم معهم سوات الطوابير=عسكر تحرّا مقررات الأمارة ومعهم قطاميً عطيب الشناكير=جسراً على صيد الحباري ندارة إلى انطلق للخرب صكّه وهو يطير=أسرع من البازوك باطلاق نارة يعشّي قوانيصه ولوهم مساعير=وإلى عثى بالجول بأول نهارة تلقى مداويسه سوات الجزازير=فوق الحصى والقشع مثل المعارة يستاهل الصيروم كل الصقاقير=واخص انا الشجعان وأهل العبارة . |
شيخنا الفاضل أبو عبدالعزيز آسف على تأخري بالرد :o صح لسان الوالد على هالابيات ولاهنت على تواجدك الدائم ومرورك الجميل مشكور وماقصرت ,,,,,,,,,,,,,,,,, تحياتي ,,,,,,,,,,,,,,,,,, |
وعليكم السلام ورحمة الله وبركاته الاخ الغالي ابو شعلان ماهي غريبه عليك الابداع و اختيارك افضل ابيات الشعر مبدع وزاد ابداعك :thumbup::thumbup::thumbup: بشرنا لقيت طيرك |
| الساعة الآن 01:19 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir