|
تعالوا نتكلم عن كيس النوم
بسم الله الرحمن الرحيم انتم تعرفون ان أسعار كيس النوم كثيره من 70 الى 450 ريال تقريبا يمكن يكون أقل أو أكثر، فهل فرق السعر بسبب البطانه، أو نوع القماش الخارجي أم هناك سبب غير هذا. على السريع أشتريت انا كيس نوم مبطن ببطانيه وهو دافىْ جربته في البر وكانت درجة الحراره تقريبا 10 درجات بالليل. هناك نوع أخر بنفس السعر ومبطن فرو واكيد صناعي عند واحد خوينا يقول يدفي، انا دخلت فيه ولاحظت ان البطانه واحده أي سمكها واحد ولكن كلا الكيسين غير مريحين في النوم من ناحية ان البطانه اللي تحتك ليست سميكه مثا الطراحه، كأنك نايم على بساط أو زوليه، وانا أشوف انه غير مريح. سؤالي هل كل أكياس النوم بنفس سماكة البطانه أم تختلف، وعموما بالمعدل العام ما هو أفضل كيس نوم، من ناحية النوعيه والصناعه وأين يباع. أشكر لكم مقترحاتكم، وكل المعلومات الوارده منكم بهذا الخصوص. تقبلوا تحيات محبكم مهراس. |
. الأخ الغالي مهراس نصيحة محب ومخلص لك لاتشري غير فراش الدريويش بطانه داخليه فرو غير هالفراش لاتدور اسمح لي اسوي شوي ثرثره عن فراش الدريويش الأصلي وليس المقلد 1 فراش الدريويش معزول بعزل قوي كذا طبقه 2 مريح مره تصدق انك اوقات تفضله على سرير البيت ههههههه اي والله بس سرير البيت فيه مزايا أخرى ماتحصلها بفراش البر ههههههههههههههههه خلاص كافي عاد عياره هههه 3 القماش الخارجي تنزاني أصلي رقم 303 4 السحابات اصلية وقوية جداً 5 واسع من الداخل وبمقاسات معقوله 6 يحتوي على أربطه قوية ومتينه بعيده كل البعد عن التلف بأذن الله 7 ومن الداخل فرو متين ودافي جداً جداً 8 يوجد داخليه مكان بجانب الرأس لحفظ الأشياء المهمه او التي تحتاجها قريباً منك كالبوك والأغراض المهمه التي تود تتخلص منها فترة النوم فقط تضعها بمكان مخصص بجانب راسك عباره عن مخبا بسحاب 9 لو تصب فوق الفراش طاستين ماء ماخر ولا نقطه 10 صبور ولا يقول لا وش بعد وش بعد اقول اشتره ولا تدور غيره ونخوك واذا ماهو عندكم بالحجاز فاعتبر وصلك واحد من ابو حمد يالغلا راس مالها عنوانك ياصل وعلى طول ياصلك الفراش يابو فهد غداً أحاول انزل له صور بأذن الله وستقتنع منه . . |
انا مع راعي الهدد فعلا الدرويش احسن فراش جربته يجي فرو او قطيفة ونوع ثالث مدري وشهو بس انه رائع و ثفيل و يوقي من البرد له معي الان حوالي خمس سنوات وهو رائع فعلا
|
كيف تميز الأصلى من التقليد وكم سعر الأصلى ووين نلقاه فى الشرقية أو الرياض ؟ |
اقتباس:
بسيط تمييز الأصلي من المقلد الأصلي واضح جداً من نظرتك له متين وتحس ان قدامك فراش ثاني شي يوجد عليه ختم خاص بالدريويش عند مربط حبال الفراش الختم جاي بشكل طولي على عرض الفراش وبقدر كف اليد مكتوب عليه الدريويش ومواصفات الفراش ومكتوب احذروا التقلدي وهكذا لون الختم أزرق وأحمر عموماً هو واضح وسعره قرابة 370 ريال فقط لاغير وببلاش والله خلك تنام فيه شرط تقول لابوك 370 على ابو من جابك وستغط في سبات عميق عميق عميق هههههههههههههههه أماكن بيعه المأمونه بالرياض وجدته قبل فتره عند برق الحيا بالرياض مخرج 15 صاحب المعرض أنسان ملتزم وفيه خير وقابلته بنفسي فنعم الرجل ابو سليمان ولايمكن يسوق بضاعه مغشوشه او مقلده او تجده في محل واحد بالغاربي في قيصيرية الخيام عند اليمني الي قبل الكردي بس ترى خبري بهذا قديم مره ولا ادري وش حالهم الآن عموما سأطرح رقم تلفونهم الموجود على الفراش واستمتع بالدق عليهم واستمتع بنطل الدراهم لهم هههههههههههههههههههههههه صباحكم عسل ياعسل |
مرحبا ابا فهد
السليب باق تختلف أسعارها باختلاف الخامة وجودتها طبعا الافضل الصناعة الامريكية خامة بلوستر وبعضها يتحمل إلى درجة -30 سبق ان اشتريته من الغرابي من احد الموزعين قابلته بالصدفة هناك ولا اعرف له محل لان هذا حصل قديم جداً عموما ان وجدت مثل هذا فانصحك باقتناءه ... وان لم تجده فاماكم خيارين ان تقوم باختيار القماش " الخامة " بنفسك وتخيطه على طربال تنزاني أو تقتني فراش الدريويش الأصلي كما قال اخونا الغالي ابو حمد ... والله يوفقك |
اقتباس:
أحسنت أخوي ولد نجد والفراش الأمريكي من أطيب شي من ناحية الدفا لاحظ من ناحية الدفا وسبق وأهدي لي نوعية منه بولستر ومحشي جوا بريش طيور لكن عيبه أنه ضيق جداً يالله تقدر تنقلب فيه ويتكك تك وإلا هو دافي ووذف وخفيف جداً جداً لكن عيبه فادح أما عن انك تفصل لك على مزاجك فأنا معك لكن أول شي بيلزخونك مع علباك وفي رواية هامتك بالسعر ولن تجد كجودة الدريويش والله اعلم لي تجربة طويلة ربما تكون خاطئه لكن أطرحها للأمانه ربما أقول أمتكلت اكثر من 5 أنواع من الفرش البعض منها قلت للمحرقه والبعض الآخر تركته عندي لمن يريد يستعير من الأخوان والأحباب وتدرجت فيها ولم أجد افضل من الدريويش كجوده ودفا وقوة تحمل وصبر وكتقسيم داخلي وهو الآن في نظري الأفضل في السوق البعض يقول أن الدريويش كبير حجمه أقول نعم كبير شوي لكن عليك بكثر المقانيص والطلعات وستجد أنه أنظغط وانرص فلازم مع جدته يكون منتفش مثل اي شي جديد هههه عموماً أشتر دريويش ولا تشاور هذا رأيي والله اعلم |
راعي الهدد:
يابو حمد الف شكر على شرحك الوافي وأسلوبك في بيان مزايا هذا الفراش، وانا أعتبر انه وصلني الله يحييك ويكثر خيرك، والصوره تكون كملت جميلك لو عند صوره. ولو أحتجت المزيد من التفصيل ما تقصر رحم الله والديك.، تقبل خالص تقديري. كان: يعطيك العافيه على الرد، وانا مرتاح كلش من كلام أبو حمد. ريع الدياب: يعني ولو ان السؤال ماهو مباشر لي، لكن كثر خيرك على هذه النقطه المهمه، كملت الموضوع يابو اسماعيل جزاك الله خير. ولد نجد: الله يبارك فيك على المشاركه بالمعلومات الجديده عن الفراش الأمريكي، وانا قد سمعت انه يدفي أكثر من الوطني، ان شاء الله أحصله موجود في جده علشان نفسي تقنع منه اذا هو حسن شريته واذا كان غير ذلك خليته، يرعاك الباري. راعي الهدد: دعواتي لك على التوضيح مرةأخري، الله لا يحرمنا من توجيهاتك وخبرتك الطويله. |
هذا فراشي http://www.alrahlat.com/vb/uploaded/175_1198532463.jpg http://www.alrahlat.com/vb/uploaded/175_1198532575.jpg http://www.alrahlat.com/vb/uploaded/175_1198532663.jpg عمره أربع سنوات وشوي وسعره كان في ذلك الحين 360 ريال على ما أتذكر |
اقتباس:
جئنا لنحتسي عن فراش النوم اقتباس:
اقتباس:
ياخي على هالدعايه تستاهل وسام الدرجه الاولى لتسويق ومدير مبيعات لهم بس ماش غير هالسليب باق مااغير http://toysindia.com/images/prodimg/large/FL107_1lg.jpg |
أخوي أبو فهد
أنا مسوي لي واحد طربال تنزاني ومحشي صوف ( غنم نعيم ) طبعاً عند صاحب المحل مندفة وهو جاب الصوف وخلط معه بولستر وخاط فوقة أيضاً بطانية وتكلفته 400ريال تقريباً وتصور قبل أمس درجة الحرارة 6تحت الصفر بصراحة ماشعرت بالبرد وربعي يقولون برد |
السلام عليكم يالربع
انا جربت فراش الرميح عند الرمايه سعره270خفيف الوزن ودافى وعليه غطاء خارجى للحمايه ممتاز وفراش الدريويش لايعلى عليه ولكن يعيبه الحجم..........وسلامتكم. |
كلام الجماعه 100% وابغى احذر من الفراش الى معبا داخليه من الريش لأنه يجذب الثعابين الله يحفظنا وياكم
|
مرحبا بك يابو فهد
ماشاءالله الشباب ماقصرو في الموضوع كفو ووفو رغم ان في طلعتنا الاخيره كان واحد معه فراش القاضي مشتريه في مبلغ خيااااااالي انا عندي اضافه بسيطه ماتتعلق بنوع الفراش في الفراش عندي مشكله ازليه مادري تعانون منها ولا بس انا الا وهي برودة القدمين لاتقولي دبل الشراب او الشراب ابو اصابع حتى بدون شراب كلهم جربتهم بس مافيه فايده (قوالب ثلج) :) بس جربت الكماده حط فيه مويه حاره وقبل تنام حطها بفراشك وراح تشوف الفرق انا اول مره اجربها يوم السبت 13/12/1428هـ في النفود الكبير وكانت درجة الحراره -6 وجابت نتيجه جيده هذا والله اعلم |
اقتباس:
تختلف ... لكن أغلب أكياس النوم طبقة واحدة فقط أنا أستخدم فراش الخليج من السنيدي سعره على ما اعتقد 390 0 العام الماضي. وهو عندي منذو أكثر من عامين وهو دافيء بصراحة لكني أستخدم خيمة صغيرة للنوم واعتقد ان فيه مزايا أخي مهراس ... في مثل برد هذه الأيام لابد من استخدام الفروة أو بطانية داخل الفراش حتى تشعر بالدفء فدرجة الحرارة في الشمال وصلت الى أكثر من سبع درجات تحت الصفر. أتمنى لك التوفيق. |
أنا أستخدم الدريويش ....
كان عندي منه نوع لونه جيشي وبعدين إشتريت واحد مستعمل ..ماشي تقريبا 33 نومة :smailes12: داخليه مثل الفرو الصراحة يتسم بالوسع ..واسع ..ودافي لكن وجهة نظري هو إنه في بعض المناطق مهما كان فراش البر .. يبي يتعب ظهرك أعتقد إن الحل الأسلم هو شراء مطرحة قد فراش البر ...بهالحالة يكون الوضع تمام |
السلام عليكم الله يسلمكم على كل الردود ولي رجعه أخرى ترى الكلام في كيس النوم طويل وانا أشوف ان فيه أخذ وعطا، وان شاء الله نخرج باللي يسر الجميع. _____________________ |
اخي ابو فهد من خلال خبرتي المتواضعة في التسدح على الرمال بكافة اشكالها احب اعطيك هذه النقاط وان شاء الله تنال رضاك فصل فراش افضل لك واختار خاماتك اضمن لك الخارجي تنزاني والداخلي بطانية اصلية وفوقه مفرش دائما ضع تحت فراش البر قطعة فرشة لكي تعزل الفراش عن الارض حاول تنام على احد الفرشات القريبة من النار لان الرمل يكون مكتسب حرارة من النار ويساعد على الدفاء تقديري اخي الكريم |
السلام عليكم ورحمة الله وبركاته
موضوع شيق أخي الغالي مهراس ، تحدث فيه الأخوة الكرام بأراء قيمة حول الموضوع وأذكر لك تجربتي مع أكياس النوم في أول الموسم إي في الجو المعتدل البرودة ، أستعمل كيس نوم خفيف ، وكذلك نفس النوعية أستعملها في الرحلات الصيفية أما في الشتاء أستعمل نوع سميك صناعة القاضي ، وأضع الفروة فوق الكيس من جهت الأرجل أو أستعمل بدل الفروة بطانية فوق الكيس طبعا العرض وحجم الكيس ووقت الإستعمال هو المهم بالنسبة لي أما تسأل الغالي ابو صقر عن برودة القدمين أقول الأولين كان يقولوا " دفيء الأطراف والصدر ، ولا تخاف من البرد " والوالدة حفظها الله ومتعها بالصحة والعافية ، أهم شئ بالنسبة لها هو تدفئة القدمين ، حيث لا ترى أي واحد فينا نائم إلا وتلحفه جهة أرجله ، وتقول دفيء رجلك تهنئ بنومك |
نقطة..........
الاخ الغالي
مهراس الاخوه الغالين السلام عليكم نقاش جميل جدآ طلعنا بعدة نقاط 1- اختلاف المفارش والمزيا 1- الاخ الحبيب (جلمود)قال(وابغى احذر من الفراش الى معبا داخليه من الريش لأنه يجذب الثعابين الله يحفظنا وياكم) ولم يذكر الاسباب 3- وضع ( جربت الكماده حط فيه مويه حاره وقبل تنام حطها بفراشك)ذكرها الاخ ابو صقر......وهذي جديده هل تبقى فتره طويلة وهي حاره الماء هل يكون حار جدآ ........... نرجو الشرح بالتفصيل:smailes44: 4- عملية حشو الفراش بالصوف والبلستر...... لماذا وماهي الميزة اخوكم خشم الحصان |
ماجلان:
انا الفراش اللي عندي أبو 70 ريال يجي نصف فراشك، معناه ان فراشك به بطانه زينه علاوه على عمره معاك ومنظره الجديد، أشكر لك مداخلتك. ودي أكشت دايم: أولا: الله يحفظلك المولود ويهنيه بالفراش حقه، ثانيا: ان الأخ راعي الهدد لو درى عنه الدريويش يبي يهديه فراش على هالدعايه ويستاهل، ثالثا: أشكرك أخي ودي أكشت دايم على هذا الرد الطيب. الروضه: كلامك صحيح لو اني أحصل واحد بجده يسوي مثل ما قلت، بعدين ايش تقصد بهالكلمه ما عرفت معناها (عند صاحب المحل مندفة)، شكرا على تنويرك الموضوع. كساب 2002: سمعت كثير يقولون نفس كلامك عن حجم الفراش، ورغبات الناس تختلف، الشكر لك على المرور. جلمود الجبيري: معلومه جديده وغريبه، يعني لو أبا أصيد ثعبان أحط له ريش طيور، يعطيك العافيه على المشاركه. أبو صقر: شكرا على حضورك يالغالي، وفكره جديده احترازيه وسلامة قدميك صحيح الى قالو ان البرد يخش مع الرجلين. صقر: جزاك الله خير على المعلومات أصبح كل الفرش طبقه واحده، فقط الأختلاف في الخامه، بعدين كذا تصير تدربى مثل الباله الى صار الفراش كله بطانيات وفري، ولو صار حريق لاسمح الله ويش يخرجك من الكيس. هزيم الرعد: يعني 33 نومه كم يطلع الفراش؟!!! نص عمر ولا بعد في التمرين أو تحت الضمان، اعتقد الضمان 50 نومه (50,000 كيلو) هههه، لكن أحسن يحطوا عداد في الفراش يبين كم نومه مشى، اما فكرة الطراحه فأنا أستعملها لأنها أريح شوي بالنسبه للفراش أبو رخيص اللي عندى. شكرا يابو صالح على المرور الكريم. سهيل: ما عليك زود، ان شاء الله اذا حصلت ناس شغلهم زين بالغربيه أفصل على كيفي، وفكرتك الله يحييك جدا مهضومه شكرا على تنويرك الموضوع بأفكارك الناضجه والخبرات الطويله ( خبير تسدح على الرمال بكافة أشكالها)، تسلم وفالك الطيب. أبو مروان: الحمدلله ان الموضوع صار فيه تبادل الأفكار والخبرات، المتوجه بفكرة تدفئة القدمين، ان شاء الله أبو صقر يجربها المرة القادمه، وانا أيضا لا ارتاح اذا مازالت قدماي باردتان، العاده ألبس شراب صوف، واذا البرد شديد،،، ما ينفع الا تدبل البطانيه أو الفروه، تقبل خالص التقدير على مشاركتك لنا الرأي في هذا الموضوع. |
والله يا الغالي ، أنا عندي فراش الدريويش (لكنه ماهوب الفرو اللي يجي من داخل قماش ) وسبب اختياري للقماش وعزوفي عن الفرو هو إن الفرو إذا دخله الرمل لو توديه لأطلق مغسله ما طلع الرمل منه !! لكن في النهاية ، ومن خلال تجربة !! الدريويش بلا منازع .. |
الأخ خشم الحصان
وعليكم السلام ورحمة الله وبركاته طبعاً الصوف هو الذي يقاوم البرد الشديد ولاحظ الزوالي التي تأتي من إيران أو العراق أو سوريا لو تجلس على جليد ماضرك بعد الله لأنها من الصوف ومحشي مع الصوف بولستر من أجل مايكون خشن مع أنه واضع بطانة أخوي أبو فهد طبعاً أقصد بالمندفة آلة يندف الصوف فيها أو القطن وكانوا قديماً يندفونه بالضرب بالعصاء على الصوف أو القطن والعملية هذه من أجل تنفك كل شعرة عن الأخرى أرجو أن تكون الفكرة واضحة |
زي ماقالو الأخوان الدريويش
واذا بتفصل احسن واحسن بالغرابي على مزاجك ...... |
السلام عليكم ورحمة الله وبركاته انا بعطيكم زبدة الفرش اللي مافيه( ازبد ) منه هههه:smailes79: أولا لايمكن (بناءا على تقلب الاجواء عندنا :confused: ) انك تلتزم بفراش واحد بسم الله نبدا : الأجواء المعتدله ( الهواء الطلق) او الخيمه الدافيه ( مهوب اي خيمه ) فراش الربيع من القاضي حجمه صغير جدا سهل الحمل والطي وسعره 120 ريال حسب بورصة الفرش ليوم امس . للأجواء البارده جدا والصقيع فراش الدريويش ( خالد ) لايعلى عليه ابدا طبعا فيه نوعيه بين الفرو والبوليستر زي ( المخمل) ممتاز دافي ولا يمسك رمل ولاشوك زي الفرو ولا يصقع مثل البوليستر وممكن تفرشه على حجره شوك ماعندك مشكله مرييييييييح الى ابعد حد السعر 300 ريال سعودي حسب بورصة فرش العام الماضي قبل القفزه التاريخيه للأسعار :( . عيبه ثقيل وحجمه كبير ملاحظه هامه لايمكن ان تتخلص من صقوعة الرجلين مهما كان نوع فراشك طبعا الاخوه راعين الدخل والقميري بعز الصيف أفضل فراش هو ( الثلاجه) :smailes12: |
رحلة الشتاء والصيف
في الصيف أي فراش يفئ بالغرض ،، في الشتاء وجب اخذ الحيطة وتجهيز فراش ملكي:1aa: أنصحك بـ فراش الصمان من القاضي مقاسه 1.2 في 2.4 م ،، وثير ودافي ويجيك النوم فيه مجرد ماتحط رأسك وبه كيس لأغراضك الشخصيه ومخده ملكيه لها مخباء وتنفخها عند النوم له معي من عام 1424 تحياتي |
مشكورين جميعا على هذه المعلومات
ومنكم نستفيد تقبلوا تقديري |
برق:
صار فراش الدريويش بلا منازع الأفضل لولا حجمه، والفرو عيبه الرمل، معلومه جديده يارعاك الله، ما قصرت أفدتنا بشيء جديد لا عدمناك أخي برق. الروضه: شكرا على توضيحك لخشم الحصان ولي، بيض الله وجهك. شاص2008: شكرا على توثيقك وردك الطيب، أتمنى أن أحصل مكان أو محل مناسب لهذا الفراش في جده، سلمت يا مال الغناة. راعي ساموده: الله يبارك فيك على الأزبد معلومه ولكن يبي لها شوية تمر كود يتغمس به، هههه، ايه بالله جبت الغايب خلاصة الموضوع، أشكر لك هذا الأهتمام وافادتنا بما يتعلق بفراش البر أو كيس النوم والأسعار حسب البورصه والمؤشر. تقبل خالص التقدير على هذا العمل. أبو أشرف: يا بعد حيي، هذا القاضي منافس أخر للدريويش وانا عندي الأثنين سوى أختار أي واحد يعجبني مادام هذا كلامكم وعن تجربه. كثر الله خيرك على هذه المعلومه عن فراش القاضي، تقبل كل الأحترام. تكفيني الذكرى: ويكفينى مرورك الكريم، لا هنت يالغالي الفائده عامه، بيض الله وجيه الأخوان اللي ما قصروا وأفادونا عن كيس النوم، الله لايضيع أجر مسلم، مشكورين يالنشاما على جهدكم الرائع، وما نكره لو باقي تضيفون معلومات. |
ياراعي الهدد كم عطوك الدريويش على هالدعاية؟؟؟؟؟؟؟؟؟؟؟؟؟
وبعدين وش قصدك بالجملة: بس سرير البيت فيه مزايا أخرى ماتحصلها بفراش البر ههههههههههههههههه والصور اللي حاطها للفراش معها دلة وش سنعها أكيد أنك توسدها؟؟؟؟؟؟ |
الله يعطيكم العافيةعلى الشرح الوافى.الحين اقدر اشتري وانا مرتاح اخوكم داحم عضو جديد
|
داحم:
شكرا على المشاركه، والحمدلله انك استفدت من الموضوع |
وانا استخدم فراش امريكي صناعة كورية مظمون عشرين درجة تحت الصفر وله معي 13 سنة
واعتقد انه احسن من غيرة بكثير واذااا جاك برد مثل برد هالسنة ما ينفع غيرة واللى جربه يعرف قيمته وما يمدح السوق الا من ربح فية وسلامتكم |
شوف يا pajero:
انا طحت عند فراشك هذا، اعطيني اسمه ومواصفاته تراني أحب الفراش الخفيف واللي يصبر 13 سنه، بس ماقلت لنا كم هو به ومن وين شريته وهل باقي منه شى ولا انقرض، لا هنت على الرد يامال الغناة. أخوك مهراس |
يا جماعة عليكم بفرش سكان بلاد الصقيع والثلوج فهناك انواع تتحمل الى عشرين درجة تحت الصفر واكثر
فرش امريكية وكندية المهم تكون مظمونة واصلية وانا صار لي سنين ما استعمل غيرهاا وكل اللي جربوهااا يمدحونهاا والاسعار من 380 الى 550 |
حبايبي الحلوين عندي حل لبرودة الرجلين اثناء النوم
وهي انك تدفي رجليك فبل النوم ثم ادهنهن بالفازلين لانه يعطي دفء عجيب صراحة يغمت .................... جرب وانت في المنزل حتى ماتقول وهقنا اخونا حسبي اني مجتهد |
فراش الدرويش ممتاز جدا,ولكن لايكفي في بعض الاحيان ,ويوجد فيه عيب واحد أن البولستر بارد قليلا ,وأنا وأعوذ بالله من كلمة أنا أنصحك بأن تشتري مع هذا الفراش السرير البري المتنقل ,ويوجد عند السنيدي ,لكي يحميك عن برودة الارض ...ودمتم والباري يرعاكم
|
كيس النوم .<التنزاني>
|
كلام الأخ Pajero
صحيح 100% والشكر للجميع |
ما شاء الله تبارك الله
|
اخي الغالي مهراس ماشاءالله موضوع رائع جدا بالنسبه لفراش البر لا أؤيد الفرش ذات التدفئه القويه جدا وغير المخصصه لبلادنا لانها تجعل الشخص يدفئ اكثر من اللازم وعندما تستيقظ فجرا سوف يضرك الجوالبارد وانت شبه عرقان ...هذا رأيي والله أعلم انا استخدم فراش الفصول الاربعه من القاضي فهو طبقتين (غطائين) غطاء طبقه صيفيه وغطاء طبقه شتويه وهو وسيع جدا ومريح جزاك الله خير بسام |
شفت الكثير من أنواع الفرش ، الحقيقه الي اسعارها من 200 فما فوق متقاربة في الخامة والبطانة ، اما أنها غير مريحة في البر فأرى انك تأخذ معك دوشق ازياده
|
وعليكم السلام ورحمة الله وبركاته
بالخير اخوي مهراس والجميع تجربتي مع فرش الدريويش الاصلية ممتازة وهذا انا كاده لي اربع سنين ولله الحمد واذا اقبل القيض ذبيته عند الرهدن فيه عيب واحد الحجم وبعض السحابات يبيلك ترش على السحابات (مزيل الصداء :)) وابد يدربيك السيل وتقول ديمه وانت في وسط الفراش والله يعفو عنا وعنكم. |
فراش الدريويش واضح ، قماش تنزاني لايتأثر بالمياه ، فرو صناعي ألماني برضه لايتأثر بالمياه ، سحابات أمريكيه ، حلقات يابانيه ، سبت أمريكيه او يابانيه ، وإذا انك شره وتحب الزين بالحيل يمكنك الذهاب للمصنع نفسه وتفصيل ماتريده من أنواع الفرش وكل شئ بحقه ، المهم تكون مخباتك منترسة ادريهمات |
عزيزي hagaanaf:
شكرا على مرورك وتوضيحك، بارك الله فيك لكن ماهو الدوشق؟ |
| الساعة الآن 03:49 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir