|
شريت سيارة .؟ وتبي تضبط نظام التعليق .؟ حياك ربي تفضل هنا
السلام عليكم ورحمة الله وبركاته حيالله جمع النشامى كما نعلم في اول ايام السيارة عندما نقتنيها يبدأ التفكير ماذا اضع من مساعدات وماذا افعل لوزن وقفة السيارة طبعاً كلٍ وحسب رغبته يعني صاحب طرق نفود , جلد , وديان ... الخ هنا ... أتمنى ممن يرغب في الإستشارة في تحسين اداء سيارته يضع النقاط التالية :- 1- نوع السيارة وموديلها . 2- نوع إستخدامه ( في النفود , وديان , جلد , مدينة ... الخ ) . 3- حد الميزانية . 4- كم متوسط السرعة في البر او بالمكان اللي غالباً يطرق به . 5- ماهي نوع الكفرات الموجودة وهل يرغب بتبديلها ام لا . هذه أهم النقاط وبإذن الله سنفعل قدر الإمكان من زاوية الخبرة ( لا التخرص ) لكي لا نوقع الغير بتكاليف خسارة تكون عليه . من ناحيتي ... أفضل خبرة لدي هي الونيتات ... ومن ثم الجيوب وايضاً نتمنى من ذوي الخبرة المداخلة منهم ليعم الفائدة ع الجميع ولا مانع من المناقشة في النقاط الخلاف . محبتي لكم ابوخالد |
وعليكم السلام ورحمة الله وبركاته الغالي أبوخالد بارك الله فيك وجزاك الله كل خير موضوع جميل وفكرة طيبة وخدمة كبيره تقدمها لأخواننا الأعضاء وهذا ليس بغريب عليكم اسأل الله لك التوفيق والسداد ... وإلى الأمام دوماً :thumbup: أخوكــ عبدالله |
هلا فيك يابو خالد:
موضوع جميل، صاحب البر والرحلات أفضل له إقتناء سياره لكل التضاريس لأنه لا يستغني عن الذهاب الى مختلف الأماكن، وفحص السياره قبل العزم على الرحله واجب لتفادي الأعطال، والله الموفق.أنا أفضل الونيت الدفع الرباعي لقدرته على تحميل أكبر قدر من العفش، تقبل خالص الشكر. |
هلابكم جميعا ابو احمد واخوي مهراس
لاهنتم جميعاً وننتظر بإذن الله من يستفسر لنبدي له وجهة نظرنا من واقع الخبرة لعله يستفيد ويفيد ونستفيد اخوي مهراس بالنسبة للونيت هو افضل لدي وإذا كان معك ونيت وتشتكي من قساوته او ليونته وتريد عمل شي من رفع وغيرها اخبرني ومالك هم عزيزي ابوخالد |
أبو خالد.. هلا بك وما شاء الله تبارك الله مبادرة طيبة وبإذن الله مفيدة واسمح لي بالمشاركة بوضع أول إستفسار وإن كنت أشارك الغالي مهراس بتفضيل الونيت الدفع الرباعي 1- نيسان باترول GL-v 2- نفود فقط 3- لا تتطلب سرعة 4- نوع الكفرات الحالية (ماكسس أبو جمل 8 غاط) بإنتظـــارك وبارك الله فيك أخوك.. أبو فهد |
اقتباس:
ابوفهد هلابك والله والله يجزاك خير وما سوينا شي بالعكس نفيد ونستفيد نبي الواحد إذا نزل استشارته يجي النقد من ذوي الخبرة لكي ننير بعضنا بكل ماهو متطور وجديد وليتك حددت الميزانية لها ولكن لا بأس بما أنك راعي نفود فقط وانت منت راعي سرعة ... خذ الراي ولا نستغني من النقد في سبيل التطوير : 1- مساعدات شاص امامي او مساعادات مرسيدس بلاستاين ( سعر الواحد في بحر الـ 110 إلى 120 يعني الثنين يروح ويجي في الـ220 ريال دون تغيير شي في نظام التعليق الأمامي ) يعني على نفس وقفته . 2- إذا كنت راعي تحميل والجيب يردح معك من الخلف عليك بياي الإسترالي على حسب ثقل التحميل تركب لأن فيه ثلاث مقاسات إن ماخاب ظني لكن في الغالب الواحد ما يشيل إلا اللزوم يعني العزب والحافظة وماء في حدود 120 لتر لذلك وفر على عمرك وخلك على بلده وإذا كان الموتر مضايقك في نزوله من الخلف ركب كعكات 2 سم وبس 3- مساعدات خلفية شاص . 4- الآن دور الكفرات :- أ- إن كنت من محبي البالون فأفضل شي للنفود 6 غاط ( لكن الفرق بسيط يعني ما يحتاج تغير ) . ب- إذا ودك بالأفضل هناك انواع كثيرة واللي برايي تركب كفرات هانكوك نقشة شاهين لما تمتاز هذه النوعيات بشكل عام ( اللي تجيك نقشة شاهين ) بخفة في القيادة وإقتصاد في الصرفية وسلاسة في الجواد والتمكن في الطريق اكثر من البوالين إلا إنها أقل جودة في الرباضات من البوالين إن كان ارضك فيه رباضات . ج- لا تتعدى الجنوط والكفرات السلق ( إن كنت تريد الخفه ) . هذا ما لدي وعسى الله ينفعك بها والجميع وارحب بالنقاش حول اي نقطة . ابوخالد |
مرحبا اخوي معاي
1/هايلوكس2009 2/ابغاها حقت مقناص وسريعه 3/السياره وكاله ماجاها ترهيم ولا اي شي |
اقتباس:
حياك الله اخوي العنزي وعسى الله يطعمك من خيرها ويكفيك شرها وليتك وضعت الأسألة وجاوبت عليها بالتحديد علشان اوفيك بما تريده تماماً لأن وعلى حسب الأجوبة وتفصيلها استطيع بإذن الله إعلامك بكل نقطة تعملها ليكون ادائها في أعلى مستويات الرضى بإذن الله هذه أسألة اتمنى ان تكمل الإجابة عنها لأوفيك بما تريد 3- حد الميزانية . 4- كم متوسط السرعة في البر او بالمكان اللي غالباً يطرق به . 5- هل ترغب بتبديل الكفرات إلى الأفضل ام لا . بالإنتظار والسموحه ع التأخير ابوخالد |
السلام عليكم ورحمة الله وبركاته هلا بالغالي نوماس سدير جزاك الله خير على هالمبادرة الطيبة منك اود المشاركة لكي نستفيد من خبراتكم 1- السيارة فكسار 2003 (هيدروليك) 2- في الحقيقة استخدمها في الصيف نفود فقط اما في الشتاء نفود ووديان ... الخ , خطوط 3- لايوجد سعر محدد للميزانية لكن لا يتعدى 5000 4- انا لست من محبي السرعة لكن الخطوط حدي 140 أو 150 5- الكفرات دنلوب على جنط 17 ولكم جزيل الشكـــر |
اقتباس:
وعليكم السلام ورحمة الله وبركاته هلابك عزيزي عاشق طيب بما انك منت راعي سرعة اشوف ان بقائه على حاله افضل إلا إذا اردت تحسين وقفته ( إذا كان يحك معك ) أو يردح من خلف مع ان الهيدروليك ما يردح ولالا .؟؟ إذا كان حدى الأمرين يحدث معك رد لي وفيه شي واحد حلو تسويه ... انك تشتري جنوط هلل وتركب كفرات هانكوك نقشة شاهين عليها وتخليه بوقت القطوعات والأراضي الصلبه مثل الصمان وغيره وميزتها خفة الموتر تزيد بشكل واضح مع اقتصاد في الصرفية مع خفة البطناج والمطبات وسلاسه في المشي في الجواد ويوم تنتهي وقت المكاشيت ترجع الجنوط بكفرتها حقات البلد لين يجي وقت الموسم الثاني اتمنى افدتك وانتظر اي سؤال لك ابوخالد |
اقتباس:
بالنسبة للوقفة بصراحة أنا ما يهمني الشكل لكن انا اذا مليت تانكي الماء وركبت عفش واجد وركب معي اوادم ينزل الموتر بصراحة اتبهذل اذا نزل على الموتر والهيدروليك ما يقوى يرفعه فكرت اركب يايات استرالية خلفية لكن لازم افك الهيدروليك وبالنسبة لاقتراحك على الجنوط الهلل والله فكرة جميلة وان شاء الله اني اسويها الموسم القادم الله يعيده علينا وعليكم بالخير والبركة لك كل الشكر والتقدير ، وتقبل مني أجمل تحية |
اقتباس:
ممتاز يعني في الموسم فقط اللي تحتاج للياي الإسترالي زين فيه حلين ... إما إنك تركب الياي الإسترالي وتلغي الهيدروليك إلى أن يشاء الله أو تركبه فقط في الموسم وإذا إنتهى ترجع الهيدروليك مثل ماكان وهذا مكلف وانت اختر احد الأمرين وإن كانك بالدراهم ماعندك مشكلة اقول إذا جاء الموسم ركب الياي الإسترالي والغ الهيدروليك وركب جنوط الهلل بالكفرات وإذا إنتهى رجع كل شي مكانه لأن الهيدوليك يمتاز بالراحة اكثر من الياي اتمنى اني افدتك بشي مناسب ابوخالد |
1- نوع السيارة وموديلها .
ددسن 99 دفرنس واحد 2- نوع إستخدامه ( في النفود , وديان , جلد , مدينة ... الخ ) . مدينة وكل شهرين او ثلاثة امسك خط وقليل دخولي لنفود 3- حد الميزانية . اعتبرها مفتوحة 4- كم متوسط السرعة في البر او بالمكان اللي غالباً يطرق به . خط 130 _ 150 في النفود غالبا ما اوصل 80 5- ماهي نوع الكفرات الموجودة وهل يرغب بتبديلها ام لا . 205/75/14 ممكن كفرات لحالها لـ 215/70/14 أو مع جنوطها لـ 225/70/15 ودي ان مطبه يخف بدون ما ينزل لن ودي اعطيه رفعة بسيطة خصوصا من قدام والشي الثاني وجهه يلعب في المراقي وودي انه يثبت ومشكوور يالغااالي مقدما |
اقتباس:
ماقصرت عطيتنا رايك وماشاء الله عليك ما يحتاج خبير شـكــ وبارك الله فيك ـــرا لك ... لك مني أجمل تحية . |
هلابك اخوي عبود
اقتباس:
عسى الله يطرح فيها البركة 2 اقتباس:
يعني استخدام مسفلت في الغالب اقتباس:
ما يحتاج ميزانية بما انك منت راعي طرق بران اقتباس:
ممتاز يعني ع الهون اقتباس:
جنط 14 ممتاز كخفه وعزم زين ( هو الشد بلد على ما أظن ولالا .؟ ) لكن عموما جنط 15 ازين كونه يعطيك سرعات اعلى ثلاً لو تمشي 120 تكون في الواقع تمشي 130 وقس على ذلك في امور الصرفية والإرتفاع وغيرها ولذلك يفضل جنط 15 عرض 6.5 انش وتكون الكفرات من نوع هانكوك خط ويكون المقاس 215/70 او 205/75 والثاني افضل إن وجدته اقتباس:
خفة المطب اقدر اخليه كأنه صغيرة من الراحة .. كيف .!؟ ارفع الخلفية بتركيب ربلات ولا تركبها عند اي واحد رح لمبارك اللي بالصناعية بجانب ميزان اليرموك والمجد ولو ماعرفته خل ميزان المجد اللي بالصناعية القديمة ع اليسار ووجهك شرق بتكون عند تقاطع ( لأن ميزان المجد على شارعين ) بعد التقاطع ثاني محل ع اليمين واسم المحل مرات واللي يديرها مبارك ابوعلي وولده علي لأن عندهم ربلات زينه وقوية ما تلين مره الفائدة هي عزل سست التحميل عن سست الأعلى وتكون كأنك ساحب سست وانت ما سحبت فإذا جاء تحميل قوي يرتكي على سست التحميل ويقوم بعملها وخله يرفع لك الوجه باللي تبيه وانا اقترح إن كان شد بلد من 2 إلى 3 سم ويكون اللي بالخلف زيادة عنه 2 سم علشان امر الرساوة والفرامل والإتزان في المنعطفات انتهينا من الرفع الحين نبيك تركب مساعدات طبعاً ما يركب عليه مساعدات مرسيدس لذلك مالك إلا مونرو امام وخلف ويكون الأمامي غاز والخلفي زيت ( قل للمحل كذا وهو يعرفه ) لأن الغاز يمتص الداخل والزيت يمتص الطالع ( بحكم وجود السست في الخلف ) باقي شي واحد يويصر الموتر على قولتهم دلع هو وضع حمل في الخلف لكي يكون فيه وزن يساعد ع اليونه إما بتانكي ماء او غيرها وان كانك ماتبي ماء والتكاليف حط لك خيشتين رمل في الصندوق في الخلف وينتهي امر القساوة بإذن الله وانا انصح بتانكي ماء للحاجة في كل الظروف لها اقتباس:
بإذن الله يثبت بعد المساعدات اقتباس:
ياهلابك عزيزي ابوخالد |
اقتباس:
ياهلابك عزيزي عاشق وما سوينا شي واتمنى ان توفق في امرك ابوخالد |
تسلم اخوي ابغاها حقت طعوس ونفود وابغا ازود سرعته ياليت تنصحني وش اضبط فيها
|
اقتباس:
هلابك عزيزي يعني تبيها لعب ونشاط طيب عندك امور ليتك جاوبتني عليها بخصوص الماة عندك مرتخيه ولالا لكن بما انك نسيتها ابعطيك شي مناسب بإذن الله وهو متوسط التكلفة نبدأ بنظام التعليق في الأمام ركب كعكات 2 سم .. وأيضاً مساعدات في اكس ار ( شغل يد تركيب المساعدات 250 ريال ) وأن اردت تركها وتدبيل المساعدات يكون افضل ويكون شغل اليد حق التدبيل 200 ريال وتركب مساعدات مرسيدس بلاستاين وتكلفة المساعدات تقريبا 240 ريال للثنتين وتكون كذا حطيت قدام اربع مساعدات ( 2 وكاله و 2 مرسيدس ) في الخلف تركب ربلات بين السستتين الأخيرة والثلاث اللي فوق وترفعها 2 سم بواسطة الربلات ( لا تغير شي من لعبات وغيرها يكفي الربلات ) وبذلك يخف عليك المطب ويرفع الموتر ( تكلفتها من 50- 20 ريال ) انت وشطارتك وتركب الله يسلمك مساعدات ( إذا لزم الأمر ) رانشو ابو طقاق ( 500-800 ريال مستعمل والجديد 1500 ريال تقريبا ) او شاص ( بس بيكون قاسي مره ) وفيمته على ما اظن 200 ريال او اقل للثنتين وانا افضل رانشو بسبب سهوله التحكم بقوتها وصبرها الحين انتهينا من رفعة الموتر نبدأ بالعزم الهايلوكسات من 2006 وطالع نص معدل شد بلد يعني مروحة الوكالة خفيفه عن الأول وايضاً الفلتر كبير اكبر من الأول وأيضاً الكنداسة شبه هيدرز لأن الأول 2 بوصه والهيدرز 3 بوصه والهلي التالي 2.5 بوصه لذلك إن غيرتهن جميع يبي يفرق معك والمراوح افضل شي سوبارو تقريبا تكلفة تركيبها 600 ريال إن ماخاب ظني الفلتر مالي به علم من زمان بس الأفضل ماتغيره لأن التالي ما يفرق تقريبا على كلام اللي جربوها الهيدرز يفرق شي بسيط ولا لي علم بتكلفتها الجنوط غير حقات الوكاله بسبب ثقلها إلى مرسيدس افضل او فورد واسأل من به خبيراً الكفرات هانكوك 70/215 اتمنى ان اكون وفقت في ما تريد واعذرني لأنك ماجاوبت ع الأسألة ولا ادري وش تبي بالضبط لكن هذا اقرب شي ابوخالد |
تسلم اخوي كفيت ووفيت واشكرك على المساعده
|
اقتباس:
ياهلابك عزيزي ابوخالد |
بسم الله الرحمن الرحيم
أخي الكريم أبو خالد عندي سفاري 2003 وأبغي أجدد نظام التعليق هل الأفضل أنني 1\ أوديه الوكاله وأغير كل شيء بجديد وإذا كان كذلك ما هي القطع التي يجب استبدالها أو 2\ أستبدل القطع الحاليه بأخرى غير الأصليه وإن كان كذلك فما هي القطع ( بما فيها الإضافيه ) بالتفصيل الممل الله لا يهينك علما بأن استخدامي للسياره في الغالب للبر ولا يكون حمل السيارة أكثر من المعقول وهل تنصح بكفرات البالون ( من ناحية مؤازرة نظام التعليق ) ؟ |
اقتباس:
هلا والله وغلا بالغالي ماجلان ابشر يالغالي باللي يرضيك بس الحين مدخدخ شوي وباتسر الفجر طالع للصمان وعدنا بإذن الله إذا رجعت ومالك إلا من يطيب خاطرك يالغالي وبأقل التكاليف لا وكالة ولا غيرها ابوخالد |
هلابك اخوي ماجلان واعتذر ع التأخير بالرد اقتباس:
اقتباس:
لا تستبدل اي شي في نظام التعليق بقطع تجارية او ما شابه ولكن هناك هناك قطع عالية الجودة من شركات اختصاصية لذا اول ما نبدأ هو استبدال المساعادات الأمامية بمساعدات شاص ( وسعر الإثنين بحدود 200 ريال ) استبدال المساعدات الخلفية بإحدى نوعين إما رانشو ابو طقاق ويجي رقمة 5000 او 9000 وسعره جديد ( من الخارج 1500 ريال ) ومستعمل 800 ريال للظيف يصل إلى 500 ريال ويمتاز بقدرتك ع التحكم في امر القساوة بحيث إذا كنت بالمدينة تستطيع بثانية واحده تبديله إلى الوضعية رقم واحد وهي الين شي او اثنين وهي اشد من واحد وحتى 5 والتي هي الأشد قساوة . او مساعدات شاص ( أيضاً ) ولكنها نوعا ما قاسية في المدينة ( إلا إذا كان الأمر عادياً لديك فبذلك توفر على نفسك مبلغ وقدره ) وبذلك انتهينا من امر التعليق ولا حاجة لرفع او استبدال الياي الخلفي إلا حال رغبتك بذلك فالأمر راجع لك اقتباس:
لا داعي لتغيير اي شي آخر وإن كان هناك ملاحظات ع المقصات او اي قطع في نظام التعليق فبتأكيد يلزمك تغييرها وإن كانت السيارة تحتاج إلى تربيط سفلي فعليك بالنويصر او ابن مضاح بس النويصر ارخص وقريب جداً لبن مرضاح في الشغل وهل تنصح بكفرات البالون ( من ناحية مؤازرة نظام التعليق ) ؟ كفرات بالون تصلح لمن يطرقون ( دائماً ) ارض جلد مثل ارض الصمان اما غيرها فيعيبها ثقلها الملحوض جداً وإنعدام الإنسيابية في الطريق المسفلت وضعف الفرامل ولكن أنا أنصح إذا كنت من اللي يطلعون للنفود اكثر فعليك بكفرات هانكوك نقشة شاهين لمعقولية عرضها وخفتها ولينها وتخفيف من صرفية البنزين اتمنى ان اكون اوفيت سؤالك واي سؤال انا حاضر ابوخالد |
االسلام عليكم ورحمة الله وبركاتة
ياحبيبي نوماس سدير وشلونك وش اخبارك عساك بخير انا قدر الله علي وشريت لي ددسن دفرنسيين 2007 غمارتين الميزانية مفتوحة وانا راعي خط ونفود من الرياض وشمال كل نهاية اسبوع ومركب جنوط مكحلة 16 واكفرات هانكوك والي قبلي مركب لعابات بس فية مطب والموتر مرتفع شوي ودي اغيرها تحياتي ........................... |
تسلم يا ابوخالد جعلي ما اعدمك وافي الف شكر على خدمة اخوانك
ولي عودة ان شاء الله ببعض الاسئله |
السلام عليكم ورحمة الله وبركاته كيف حالك اخوي نوماس عندي لك كم سوال وياليت تجاوبني عليهن الاول معروض علي مسعادات جكس ار واحد جديد والثاني مستعمل مع الصحون علشان اركبها قدام كم تتوقع سعرها والسوال الثاني لو ارفع الموتر واخليه على طول يضره ولالا يعني يسبب لي مشاكل ولالا والله يعطيك الف عافيه على المواضيع الزينه وشكرا اخوك سحابة صيف
|
وينك ياصاحب الموضوع
|
أخي نوماس سدير .. الله يعطيك العافية .. موضوع طيب وأنت أهل للرد على المستفسرين
سؤالي .. باترول 97 كلبليتر مرفوع من ورا بكعكات 1 سنتي وكراسي البدي سيور مكينة لكن الموتر عليه مطب قوي وفيه حنه إلى دعست على البنزين ووصل الكمبريشن رقم 2 تقريبا .. برأيك وش الحل رغم إني فاحصه عن أثر من فني ؟ شـكــ وبارك الله فيك ـــرا لك ... لك مني أجمل تحية . |
السلام عليكم ورحمة الله وبركاته
عذرا ع التأخير بسبب عدم تواجدي بالسعودية لذا اول ما ارجع اوفيكم بما لدي وعسى الله يوفقنا وياكم للراي السليم وداعت الله ابوخالد |
اخوي نوماس سدير وينك
|
السلام عليكم ..اخوي نوماس سدير ..عندي ددسن 2007 دفرنسين الموتر ابي اضبطه من ناحيت الرفعه والمساعدات..ابيه نفود وجلد وشعبان..الميزانيه الف 1000 فقط..الله لايهينك
|
اخي نوماس سدير شكرا على النصيحه اخي انا عندي تايوتا 2002gxوارغب تركيب مراوح كهربائيه وش رايك تنفع وهل هي عمليه وماهي مميزاتها وعيوبها ولك كل الشكر |
اقتباس:
وعليكم السلام ورحمة الله وبركاته بالنسبة للددسن اللي اعرف ان الدفرس منه عله في امور المساعدات الأمامية ماتركب عليه ولا يدبل بس الدفرنسين مدري لكن رح لمبارك وإذا قدرت تركب مرسيدس امامي ممتاز لو بتدبيل وبالنسبة للخلف رجع لعباته الأوله وحط رب بين السست وارفع على كيفك عند مبارك وميزة الربل يلين الموتر مره ولكن يبيلك مساعدات زيت مثل رانشو افضل شي اللي يجي خمس طقات او تسع بس الخمس افضل والباقي لا حاجة لتغير إلا إذا كان فيه شي في بالك بالتوفيق ابوخالد |
اقتباس:
ومن يقول يابوعبدالعزيز ولا سوينا شي حق وواجب عسى الله يوفقنا في خدمة اخوانا بالمنتدى وحياك الله بأي وقت يابوعبدالعزيز ابوخالد |
اقتباس:
من اكبر الأخطاء شراء مساعد مستعمل وفي الجهة الثانية جديد لأن القوة تختلف ولآبد يكون قوتهن وحده وبالنسبة لرفعتها إذا كان في حدود المعقول ما يضرب بإذن الله بس إن زاد بيعد عليك الكارونه والصلبان انا اشوف رفعها من الخلف إلى 3سم عن رفعة الوكاله ماعندك مشاكل بإذن الله ابوخالد |
اقتباس:
الله يعافيك يالغالي ولا هنت بخصوص المطب وش المساعدات واليايات اللي عليه ؟ وبخصوص الحنه وش هي بالضبط .؟ هل هي حنة مكينه .؟ ولا نفضه بدي .؟ ابوخالد |
اقتباس:
وعليكم السلام ورحمة الله وبركاته بخصوص الرفعه رفعته زينه بس إن قدرت تركب مساعدات مرسدس امامي زين او اي نوع بس ابعد عن الجبريل دمار ومن الخلف عطه ربل بين السست ومساعدات زيت ( مونروا او ايسديلكو ) بالتوفيق عزيزي ابوخالد |
اقتباس:
المراوح ممتازة للآند والباترول الفتك بس الأهم وين تركبها .؟ شف عندك واحد اللي حسيت شغله 100% في حي السلي اعطيك رقمه إذا جزمت والمراوح زينتها في خفة الموتر وفرق الصرفية ولكن إن كنت راعي مطاعس وحرق نفود في القوايل تراها ماتلحق وإن كنت من نوع اللي يمحط في الخط في القوايل لآزم تعطي الموتر وقت عشان تبرد المراوح المكينة بالتوفيق ابوخالد |
السلام عليكم ورحمة الله وبركاته
شـكــ وبارك الله فيك ـــرا لك ... لك مني أجمل تحية . عندي فكسار هدروليك2006 في النفود , وديان , جلد , مدينة ... 120-160على الطرق السريعة الكفرات دنلوب على حسب الراحة المشكلة خوف على الهدروليك في البر ومع التحميل حيث اني اريد وضع تانكي ماء سعة 100لتر وكيفية وضع الطقاق تبع الهدروليك في المدينة والبر والنفود |
اقتباس:
وعليكم السلام ورحمة الله وبركاته هلابك رعد الجنوب نظام الهيدروليك كافي نوعا ما عن الياي الأسترالي لذا تحتاج لتدبيل المساعدات امامي وخلفي إذا كنت راعي سرعة في البر والكفرات كشكل الدنلوب وفيه حقه من المميزات ... بس لا تخليه اكثر من سنه ونصف إذا كنت راعي جلد او سنتين إذا كنت راعي هداوه لأنه ينفجر ويعدم عليك الرفرف غير خطورة الإنفجار ع الإتزان وانا من وجهة نظري ... الهانكوك لا يعلى عليه إذا ماكنت راعي حجرة كثير لأنه رملي اكثر ... وإذا كنت تخاف ع الهايروليك افضل لك ركب ياي استرالي خلفي بس ركب خفيف لا تركب 863 ركب اللي اقل منه اعتقد 866 بالتوفيق عزيزي ابوخالد |
السلام عليكم ورحمة الله وبركاته
يامال العافية يا أبو خالد الله يجزاك خير ولا يحرمك الأجر إن شاء الله 1-برادو 2006 2- نفود , وديان , جلد , مدينة ، خطوط 3- شبه مفتوحة 4-السرعة في البر أقصى سرعة هي 90 ،،، في الخطوط من 160 إلى 190 5- دنلوب 265/65/17 الموتر تانكيين وبدون هيدروليك ، أحس إنه نازل من الخلف عن أول ، أحس بقساوة أو نقزة في المطب ، ومع البطانيج وعيون القطط يرجف بقوة مع إن الهواء طبيعي 30 |
الله يجزاك خير ولا يحرمك الأجر إن شاء الله
بنسبة لتركيب التانكي 100 لتر ينفع معه ياي استرالي خلفي بدل ياي الوكالة حتى يرتاح الهيدروليك ولا يضره |
الله لايهينك يا اخوي نوماس .
1- باثفايندر 2005 2- نفود - وديان - جلد - خطوط - مدينه 3- السرعه في البر 90 - 120 4- الكفرات هانكوك مقاس الوكاله .. وما رأيك بالهلل والسلق لان النيه بالتركيب موجوده . وشكرا |
1- نوع السيارة وموديلها .
سييرا 2008 2- نوع إستخدامه ( في النفود , وديان , جلد , مدينة ... الخ ) . نفود ، وديان , جلد 3- حد الميزانية . من 5000 إلى 10000 4- كم متوسط السرعة في البر او بالمكان اللي غالباً يطرق به . ماش من سرعة 5- ماهي نوع الكفرات الموجودة وهل يرغب بتبديلها ام لا . تويو ، نعم |
و لا عليك امر يا نوماس سدير
1- نوع السيارة وموديلها . سييرا 2008 غمارتين ، دفرنشين 2- نوع إستخدامه ( في النفود , وديان , جلد , مدينة ... الخ ) . نفود ، وديان , جلد 3- حد الميزانية . من 5000 إلى 10000 4- كم متوسط السرعة في البر او بالمكان اللي غالباً يطرق به . ماش من سرعة 5- ماهي نوع الكفرات الموجودة وهل يرغب بتبديلها ام لا . تويو جنط 17 ، نعم و ابغى أخليها جنط 20 إيش رأيك و الشكر مقدما |
اقتباس:
وعليكم السلام ورحمة الله وبركاته غريبة .! والله كنت اظن إني رديت ..!! << العمر يالله حسن الخاتمة :d الموتر تانكيين وبدون هيدروليك ، أحس إنه نازل من الخلف عن أول بالنسبة للنزول من الخلف أفضل حل بالدرجة الأولى ياي استرالي .! ولا ادري والله عن البرادو بس لو تشوف الرماية وتسألهم وتنتبه لأمر التحميل فيه انواع بعضهن قاسيات للي مب راعي تحميل ميزتها تنهض بالموتر وتشيل حمله والحل الثاني إن كانك منت راعي تحميل كعكات .! وشلون تعرف كم بالضبط تحط .! حمل الأغراض المعتادة ... واحسب من حد الجنط للرفرف وشف كم سانتي ... بعدها نزل الحمل أو ارفع الموتر من ورى بدون ماترفع الكفرات لين تشوف وقفة الموتر اللي تبيها وتحسب من حد الجنط لين الرفرف وبعدها تشوف الفرق وتفصل عليه كعكات لكن هالطريقة تحتاج مساعدات خلفية لأن مساعد الوكالة بيضعف امام الحمل في طرق البر لذا افضل شي ركب مساعد غاز وأسأل مبارك أبوعلي وهو يعلمك الأفضل من المساعدات ، أحس بقساوة أو نقزة في المطب ، القساوة والنقزة هذي الله أعلم ردحة الموترة والسبب ضعف المساعدات الخلفية ... لذا تحتاج مساعدات يا شاص يالآندكروزر ومبارك يعلمك ومع البطانيج وعيون القطط يرجف بقوة مع إن الهواء طبيعي 30 طبيعي بسبب ضعف المساعدات ونوعية الكفرات ( وجهة نظر بخصوص الكفرات ) لذا الأفضل تشيك ع المساعدات مع إن مساعدات الرادو مهب شينه مع تغيير الكفرات لهانكوك وتركب نفس مقاس الوكاله لأن كلما عرضت الكفرات يسبب رجفة في المطبات وعيون القطط ومع البطناج يحوس بك اتمنى إني وفقت في الرأي وبالتوفيق لك عزيزي ابوخالد |
مشكلة الياي الاسترالي قاسي على الموتر .... أنا نويت إن شاء الله كعكات ، بس منهو (مبارك أبوعلي) ؟
مساعدات الموتر تهرب زيت من حوالي سنتين ، لكنها ماسكه الموتر ولا تلعب ، وش رأيك أغيرها ؟ الكفرات عندي 265/65/17 هذا مقاس الوكالة وش رأيك أغيرها بمقاس نفس العرض لكن أطول شي وهو 265/70/17 ، أو أغيرها بهذا المقاس 275/65/17 وهو هانكوك نقشة شاهين ؟؟؟؟ الله يعطيك العافية يا أبو خالد ..... آسف على إزعاجك |
وعليكم السلام ورحمة الله وبركاته
تسلم اخوي ابو خالد على الايضاحات و الافادات الجميله لأعضاء المنتدى سلمت ذخرا للمنتدى وبارك الله فيك تحياتي |
السلام عليكم كيف الحال - نوع السيارة : gx هدد وموديلها : 2006
نوع إستخدامه ( في النفود , وديان , جلد , مدينة خطوط .....الخ ) السرعه عاديه لكن بل خطوط من 120الي 160 الكفرات حلين شاهين العريض جنوط هلل وبشتى بالون 900 سيام تاير على جنوط الوكاله الان علا الموتر يايات استراليه ورا |
السيارة : لاند روفر دسكفري 2003 شد بلد
نوع الاستخدام : مدينة و سفر و نفود وجلد السرعة في البر : تقريبا 60 وفي الخطوط 160 - 170 الجنط : وكالة مقاس 16 والكفرات ميشلان بولندي 4x4 فيها نص عمر الميزانية : متوسطة |
| الساعة الآن 07:43 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir