|
رحله حائل الجوف تبوك ضبا العلا
بسم الله الرحمن الرحيم لاتؤاخذوني على التأخير في تنزيل الموضوع في ثالث ايام عيد الاضحى المبارك انطلقة الرحله من عنيزة الى حائل وكان المبيت في منتزه مشار وفي الصباح اخذنا جوله في سوق حائل ومن ثم التوجه الى طريق حائل الجوف السريع والتوجه الى العليم لمشاهدة هذا المعلم الغريب (جبل في وسط الرمال)وما حوله ثم الذهاب لمناطق الغضا واختيار موقع للمبيت http://www.alrahlat.com/vb/uploaded/69_1200150079.jpg وكان المكان مناسب والحطب راهي وبعد مغيب الشمس احسسنا ببروده قارسه اضطرينا معاها لتكبير حجم النار لزيادة التدفئه و كان يوجد فحم ومنقل ملينا المنقل (فل):p ولما صار جمر دخلناه داخل الخيمه وكنا نحاول تغيير موقع المنقل كل ما امكن لزيادة الدفا في الارضيه للنوم كان الجو داخل الخيمه معقول (دفى) ايه هين:( لكن حينما اقترب وقت النوم اضطرينا لأخراج المنقل للخارج ماهي الا لحظات حتى اصبحت الخيمه (فريزر):D ولا تسأعن البرد في ذيك الليله بس كان اختبار جيد لنوعيات الفرش واحد من الشباب يااااالله اقتنع يشيله مره ثانيه واقتنع لسبب واحد بس انه يسمح لنا بوضع الدجاج واللحم فيه هههههههههه لأنه يقول صار تقل دجاجه متجمده البارح:D تقل طلعنا عن الموضوع نرجع للبرد ... قصدي للموضوع ابنزل كم صوره عن البرد من باب العلم بالشئ للمعلوميه الصور ملتقطه حوالي الساعه 8 او 9 صباحاً لأن هذا الوقت اللي قدرت امسك فيه الكاميرا:p وغادرنا النفود الكبير مع الاسف اننا كنا قريبين من الشباب في ذاك اليوم وكلمناهم في الكنود لكنهم اكدو ان العطل في السياره بسيط بس شايب الصمان والدوج ماقصرو:Taj43: ولا يهونون باقي الربع ومن ثم اتجهنا لدومة الجندل وقمنا بزيارة لمعصرة زيت زيتون الشمال http://www.alrahlat.com/vb/uploaded/69_1200153805.jpg http://www.alrahlat.com/vb/uploaded/69_1200152825.jpg وقد رافقنا مشكوراً الاخ / يوسف الحجاج المسؤل هناك وقام بشرح وافي عن المصنع لامانع من الذوق كان طعمه رائع وقد كان سعر التنكه 400 و300 نوعين وهذه بقايا الزيتون بعد العصر وبعدين اتجهنا الى قصر مارد وهذه بعض الصور وهذا البئر في اعلى القلعه الشباب في اعلى القصر وسوف نستكمل بقية الرحله في الايام القليله القادمه وسامحونا لانه الموضوع عملته بسرعه وبدون تدقيق |
مشكور اخي ابوصقر على الموضوع الرائع بارك الله فيك وفي انتظار التكملة
|
الحمدلله على السلامة أخوي أبو صقر
ونفس التوقيت كانت رحلتنا لكن للأسف ماصادفناكم |
السلام عليكم ورحمة الله وبركاته
مشكور أخي الغالي ابو صقر على مشاركتنا أحداث رحلتكم وفي إنتظار بقية الرحلة وجزاك الله خير |
بسم الله الرحمن الرحيم يامرحبا بخوي كان الله يجزاك خير بس ازبط باقي الصور وانزلهم هلا وغلا بخوي الروضه و السلامه للجميع يالغالي ياسفابكم والله ليتنا قابلناكم ما شيكت على قناة المنتدى في الكنود كنا موجودين عليها من اول يوم لين اخر يوم بس الجايات احسن ان شاءالله وعليكم السلام ورحمة الله وبركاته ابو مروان اسعدني مرورك ان شاءالله كم يوم اكمل الباقي <<<<<< عجاااااز :smailes81: مشكورين |
ما شاءالله يابو صقر قطعتوا هالديار كلهن بهالبرد بس عساكم اخذتوا حطب من عليم العطش |
تسلم يا ابو صقر وتكفى عجل وكثر الصور والكفشات وكل شي هاته الله يعافيك والحمد لله على السلامه والله يسعدكم ويهنيكم
|
بسم الله الرحمن الرحيم ياهلا والله بخوي الانيق اما بالنسبه لقطع هالمسافات لاصرت مع طيور شلوى كلها متعه ووناسه الحمدلله اما الحطب فزع لنا ذيك الليله شرفني مرورك يامرحبتين بخوي ابو عبدالعزيز وربي يسلم قلبك ابشر بسعدك يالغالي وربي يسعد ويهني الجميع |
الغالي ابو صقر كل الشكر على هذا الموضوع وما تغيب الا وتجي سالم اخوك |
بسم الله الرحمن الرحيم نستكمل الرحله معاكم هذه صورة لمسجد عمر بن الخطاب من اعلى وبعد تكملة الفرجه على قصر مارد توجهنا الى مسجد عمر وكان باقي على صلاة الظهر وقت قصير ذهبنا للتريحه في المضافه وتقهوينا مع الرجال الطيبين وتبادل الاحاديث والاستفسارات ومن ثم اتجهنا الى مسجد عمر وكانت مناظر جميله لكن مع الاسف لايوجد اعزكم الله دوراة مياه قريبه من المسجد ومن ثم توكلنا على الله واتجهنا الى تبوك ميقوع والمشاريع وبعد قرصة البرد البارح صراحه خفنا من البرد :D خصوصاً اننا بنوصل في الليل واتفقنا على ان نستأجر استراحه للعشاء والمبيت واخذ حمام دافي والراحه وبالفعل تفرقنا للبحث عن استراحه هذي غير مناسبه وهذي غاليه وهذي مانقدر ندخل السيارات وانتم ابخص المهم ما اطول عليكم وحنا في هالربكه حصلنا استراحه مناسبه اتصل واحد من الربع كان يبحث في مكان قريب قال تعالو عندي قلنا له حصلنا استراحه مناسبه وسعره معقول تعال انت قال ابدا لازم تجون...... يابن الحلال مافيه فايده المهم رحنا وصلنا استراحه ممتازة ونقدر ندخل السيارات داخل وكل المواصفات المناسبه قال تراها ضيافه من صاحب الاستراحه وحلف ماياخذ ولا ريال يوم عرف من صاحبنا اننا طرقيه ولزم بالعشاء قال شوي وتجيكم الذبيحه ولكن خوينا عيا الله يهديه:( وهذي بعض صور الاستراحه صورة في الصباح صاحب الاستراحه يدعى عبدالله بن خلف السحيمي البلوي جزاه الله خير وانا من هالمنبر اشكره من لايشكر الناس لايشكر الله والحمدلله عندنا وعندكم خير لكن التعامل والكرم والنخوه تثلج الصدر نكمل رحلتنا . . . ذهبنا مباشره لمحطة سكة القطار القديمه واليكم بعض اللقطات ومن ثم توجهنا الى ضبا وفي الطريق مررنا بسوق للحطب (الذي سوف اخصص له موضوع مستقل بإذن الله) نستكمل معكم رحلتنا الى ضبا الجميله خلال فتره بسيطه ان شاء الله الله يحفظكم |
شغل عدل ومتعوب عليه ابو صقر مشكور على هذا التقرير الاكثر من رائع وتراك شوقتنا ياالله عجل علينا ببقية الرحلة |
رائع يابو صقر
بصراحة استمتعت معكم بالرحلة وسردك الجميل . مشكور على امتاعنا بهذه المشاركة الرائعة .... وننتظر باقي مواضيع الرحلة.... وياليت تكبر حجم الصور شوي ... بارك الله فيك. |
يسعد صباحك اخوي ابو صقر
مشاء الله تقرير رائع لرحلتكم عجل علينا بقية الرحلة خاصة ضباء ان شاء الله عازمين عليها نهاية الاسبوع تحياتي |
يابو صقر لا تبطي علينا بباقي التقرير مادام عندك مثل هالاسلوب والصور |
هلا حيا الله أبوصقر
ماشاء الله عليك .......................... رحله موفقه والله يوفقنا برحله مثله ...... مهنا زيت زيتون ماوصل شىء للحين :smailes12: ....... أو يكفي أرسل غطاء :1aa: ... ال... |
| الساعة الآن 12:19 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir