ماذا تعرف عن ثلاجة ويكو ؟!!!

[أبو عقرب]

السلام عليكم

صياح الخيرات ،،، بصراحة فيه واحد من العيال يمدح ثلاجة ويكو

وأنا ما أعرفها ولا بعد شفتها


هل من أحد يعطنا الرأي فيها


والله لا يهينكم

[أبوعبدالعزيز]

وعليكم السلام ورحمة الله وبركاته

ثلاجه ويكو

http://www.waeco.com/

الي اعرفه صناعه المانيه تجميع صيني ووكليها الطمره تجي خط واحد 220 تبريد تجميد

هاتفهم توكيلات الجردان وكيل الطمره فرع الغرابي

014014836

[أبو فالح]

السلام عليكم ورحمة الله وبركاته

من واقع تجربة ..

ثلاجة الطمرة حلوة ، وشخصيًأ مستخدمها منذ أربع سنوات ولا واجهت منها مشاكل تستحق العيب

لكن .. هناك أكثر من مستخدم يشتكي من تعطل تجميدها دون سابق إنذار .. يعني

لكن .. لو حبيت تاخذ شوري في الاقتناء الأفضل .. عليك بالنوع الجديد من الثلاجات الصينية .

وفي بريدة تجدها عند ( المحيميد ) .. وبقية المناطق لست أعلم

ومن واقع تجربة بالنوعين ، وجدت أنّ الصينية تتميز عن الطمرة بما يلي :

1- أقل استهلاك للبطارية

2- أسرع وأكثر تجميد

3- تحتفظ بالبرودة بفارق كبير جدًا عن الطمرة ..

فالطمرة ما أن تفصل التيار عنها حتى يذوب الثلج .. فالعوازل عندها ضعيفة جدًا .

4- سعر الصينية أقل بكثير من الطميرة ، فالفارق قرابة ألف ريال .

باختصار شديد .. أرشح الصينية بقوة .. أمًا الطمرة فهي الخيار الثاني حين يعدم الأول .


ملاحظة هامة :

تجربتي للصينة لا تتجاوز السنة

[أبو عقرب]

أبو عبد العزيز

بيض الله وجهك على الرابط وتلفون الوكيل

ولا عدمناك

[أبو عقرب]

الغالي أبو فالح


شرح طيب من واقع تجربه ،،، ممكن لا هنت تنزل صور للثلاجة الصينية

لأني محتاااااااااااااااااار وما أدري وش أزيين !!!!

[ابو فراس]

يابو عبدالعزيز اتصلنا على الهاتف قال ما عندنا ثلاجات وهذا محل الجردان وهو خاص بالالكترونيات

اما بالنسبة لثلاجة الطمرة فانحش عن الرقمية (ازرار) عن تجربة تفضي بطارية السيارة ولا تحتفظ بالبرودة

اما الثلاجة الفريرة فلا اعلم عنها شيئ وافتالك فيها ابو فالح

ان شاء الله سوف اشري الصينية حسب مدح الغالي ابو فالح

فياليت تخبرنا يابو فالح عن مكان المحيميد او هاتف للاتصال بهم

[مفتون صيد]

السلام عليكم ورحمة الله وبركاته

حياك اخوي ابو عقرب وباقي الاخوان الافاضل

انا لم اجرب والله الى الان اي ثلاجة ونفس وضعي هو وضعك اني ادور لي ثلاجة جيدة

انا اقولك قصتي
انا رجال راعي مكاشيت ربيع ومقناص للطيور وان حصل غيرها ما نقول لا هههههههه واكيد لابد من الثلاجة .... مليت من قوالب الثلج قلت خلاص وجبة مشترى الثلاجة ....

لي قرابة الشهر ادور بالمحلات وابحث بالنت واقارن لا في السعر ولا في القوة
وكذالك من خلال تجارب ربعي اللى معهم ثلاجات

فيه شيء نسميه يجي بالمرتبة الاولى او المرغوب او الاقل عيوب
الجنوب الافريقية والويكو ( الطمرة ) ام فرار وليست رقمية والانجل اليابانية ولكن واحد من الشباب عاب عليها عدم التثليج القوى في عز الصيف وثلاجة العمير المصنعة في السعودية عند وكيلها العمير او العمران ملخبط في الاسم

الجنوب الافريقية انقطعت من وكيلها اللى هو الهدف على حسب ما سمعت وغالية شوي

الطمرة لا زال وكيلها الطمرة واشكالها وذفه خصوصا الاربعيت لتر ام فرار هي اللى عليها السحب الاكبر وهي المانية ولا فيه احد اشتكى منها ويعاب عليها كذالك الغلا شوي

الانجل انتقلت الى وكيل جديد من الرماية الى العمودي وما درجت بين العالم مثل الاولتين وقيل ان تثليجها يكون صعب في عز الحر

العمير او العمران زينه مواصفاتها قوية كمبروسر الماني وعوازل وشغل زين بس غالية جدا كانها مصنعة في القمر ... وجربتها على قفى هايلوكس عجزت تجمد في ايام الطيور ... يمكن عشانها في صندوق

المرتبة الثانية

انا ارى وجهة نظري ثلاجات الرماية المصنعة الخصيصا لهم وتحمل اسمهم على الثلاجة قوية ماشاء الله صينية بس كمبروسر الماني مثل بعض موديلات الطمرة وعوازل 6 سم وهذا زين وشين بنفس الوقت .. زين كعزل وشين كاكبر 60 و 80 لتر ... وسعر حلو مناسب جدا انا بغيت اشترى الـ 60 لتر بس يوم حطيتها في قفى الباترول اكلت الشنطة الى تقريبا النصف من المساحة وهذا عيب في الثلاجة


لذالك انا قررت اشترى الطمرة اربعين فرار لانها اصلية بالكامل الماني وانسب كحجم

واذا بغيت تحافظ على برودة الثلاجة
1 ابعد الموتر وخصوصا مكان الثلاجة عن اشعة الشمس المباشر
2 افتح باب الجيب عند التوقف لكي يدخل الهواء ولا يحتر الكمبروسر ولا مانع تركب مراوح عليها
3 اشتر لبس عازل لها عند وكيلها افضل من التنزاني
4 دائما شغاله في مكاشيتك يعني لابد من بطارية اضافية
5 لا تكون ماسك خفاره كل 5 دقايق تفتح بابها ههههههه

اتمنى اني قد افدت بما طرحت

والثلاجات على فكرة ترى مهيب اللى انا ذكرت فقط ...... لا ........ لا تعد ولا تحصى من الصيني والتجميع ولكن انا جبت الدارج بين الناس واللى يدرج بين هالخلق اكيد انهم ليسوا كلهم خطاء وانت الوحيد الصحيح

والسلام عليكم

[أبو عقرب]

يامرحبا يالغالي مفتون صيد

ماقصرت قلت ووفيت ، والحقيقة إن اللي في السوق تخوف لا اللي عند الطمرة ولا اللي عند الرماية

وعموماً لازال البحث جاري ونتمنى من بقية الإخوان الإدلاء برأيهم

لنستفيد جميعاً


تحياتي

[محمد العبدالسلام]

السلام عليكم ورحمة الله وبركاته
الشكر للاخ صاحب الموضوع
وعندي ملاحظه وهي:
عند شراء ثلاجة فالكثير من اصحاب المحلات يكون شابك الثلاجة على كهرباء المحل واظن هذا مختلف في سرعة التبريد عن كهرباء السيارة فاذا بغيت تجرب الثلاجة جربها قبل تشريها على كهرباء السيارة

هذا والله اعلم

[طاحوس]

يا اخوان انا شفت ثلاجه من شركة arb وعليها ضمان سنه وسعتها 47 لتر وسعرها غالي مرررررررررررررره تخيل 4200 ريال بس ما ادري احد جربها ولا لا ؟؟؟؟؟؟؟؟؟؟؟؟؟؟ ياليت احد يفيدنا عنها .

[فتى الرابيه]

يابو عقرب الله يكفيك شر العقرب
شكرا على التوضيح بالنسبه للثلاجات جزاك الله خير -- تقبل تحياتي

[مفتون صيد]

ابتلقف ثاني مره هههههههههه

شف اخوي طاحوس بالنسبة اللى عند الرماية (ارب) انا شفتها وقلبتها هي 42 لتر فقط جزء تبريد والغالب فريزر تجميع او تصنيع الاصح صيني والكمبروسر دانفوس الالماني لكن بها من العيوب التي تجعلك تبتعد عنها :
1- غالية جدا في السعر ومبالغ بشكل تحسب ان ما صنع الا هالثلاجة الوحيدة في العالم الظاهر الى الان شركة ارب تعتقد انها المستوحدة باغراض البر

2- كبر الحجم مقارنة بمثيلاتها اصغر منها حجما على انهم نفس السعة

3 - فتحت بابها بالطول وهذا عيب بالنسبة لاصحاب الجيوب احسن شيء على الجنب

تبي الرأي وراح تدعي لي ......... خذ ويكو الالمانية توني طاق لي وحدة ماشاء الله تبارك الله 40 لتر ام فرار ابيض
صغيره والماني التصنيع والقطع وسعر اقل صح انها غالي ولكن اقل
يعني 42 لتر من شركة ارب الاسترالية 4800 ريال عند الرماية
بينما الويكو 40 لتر 2240

[حرمل]

السلام عليكم ورحمة الله وبركاته

حياك اخوي ابو عقرب وباقي الاخوان الافاضل

لذالك انا قررت اشترى الطمرة اربعين فرار لانها اصلية بالكامل الماني وانسب كحجم

واذا بغيت تحافظ على برودة الثلاجة
1 ابعد الموتر وخصوصا مكان الثلاجة عن اشعة الشمس المباشر
2 افتح باب الجيب عند التوقف لكي يدخل الهواء ولا يحتر الكمبروسر ولا مانع تركب مراوح عليها
3 اشتر لبس عازل لها عند وكيلها افضل من التنزاني
4 دائما شغاله في مكاشيتك يعني لابد من بطارية اضافية
5 لا تكون ماسك خفاره كل 5 دقايق تفتح بابها ههههههه

كلام اخوي مفتون صيد صحيح وانا مجرب الويكو حجمها اصغر مقارنة بغيرها وسعرها اقل
وليكن في معلومك ان جميع الثلاجات ما تبرد بسرعة عند تشغيلها لمدة ساعتين او ثلاث مثلها مثل ثلاجة البيت تبغى وقت لكن اذا كانت مستمرة تشتغل خذ ثلاجة تبرد على قلبك

[عبدالكريم اليوسف]

موضوع جميل
فتح لنا الكثير من الخبرات
وهذا جميل على دخول هالصيف
والرحلات الصيفية
كل الشكر لصاحب الموضوع
ولكل من تداخل بالموضوع

اخوكم

[طاحوس]

وين المشرفين ما ينقلون الموضوع من قسم البيع والشراء الى قسم عدد واجهزة الرحلات ؟؟؟؟