بسم الله الرحمن الرحيم
السلام عليكم ورحمة الله وبركاته
الشاعر الصقار خالد بن سليمان الجريش من اشد المولعين بالطير
وله الكثير من القصائد في القنص ووصف الطير
يوم الجمعة 15 / 9 / 1433هـ ارسل لي رابط قصيدة جديدة من قصائده نشرت له بجريدة الرياض صفحة خزامى الصحارى
يقول فيها :
للوسم في قلبي مكانه وغايــــه
.................حيث أنه الموعد بعكس المراهيش
وسهيل موعدنا ومنه البدايــــه
.................تدهيلنا للطير لجل ابرق الريش
عز الله ان الطير سيد الهوايه
.................ترتيبه الاول ومن عقبه الجيش
والخيل عز ودين وهاذي كفايه
.................في ناصيتها خير واهي المباهيش
ثلاث في قلبي ولعها نهايــــه
.................الكل منها فارض حجز تكويش
الأوله بالقلب تملك خفايــــه
.................والثانيه بالبال حب ومطاريش
والثالثه بالعين تلقى رعايه
.................حب الثلاث اهوايتي دون تشويش
وانا افتخر عندي علوم ودرايه
.................بأوصافها وأشكالها والتعاييش
ولانيب اهمل عصرنا بالنحايه
.................اخذت من هذا وهذا نقاريش
مير الهوايه ذيك غاية منايــــه
.................نفسي على عشق الاصاله معاطيش
حنا على الله نجعل العز رايــــه
.................وكل على رايه يبي نفسه تعيش
ابديت ما كنيت بالله رجايــــه
.................وجهة نظر وشعور خالد بن جريش
وجاريتها بهذه الابيات المتواضعة :
قاف(ن) جديد(ن) ما لفاني روايه
.................على الخزامى من بعيد المداغيش
خالد ابو سليمـــــان وانا لجايــــه
................. يبين مع شوفة اصعاب المناويش
معاني(ن) بالطير ماهي دعايه
................. حب وولع والنفوس فيها مباهيش
وكل(ن) على شفه يجي له رمايه
.................وبالطير ما الومه وغيره مباليش
ناس(ن) لها بالطير حب وولايه
.................للوسم حسبتها ولا همها العيــــش
وانا هواي وغايتي من صبايه
.................شوفة فياض(ن) ما وطاها حشاحيش
ما غير فيها الطير زج الغنايه
.................من دون صوت الطير ما فيه تشويش
اسج عن شي(ن) يعكر صفايه
.................في خاطري ما ثمنــوه المرابيــــش
حب الحبيب اللي تمكن غلايه
.................هي منوتي من ناقضات العكاريش
يا ابن اجريش والله ما يروي ظمايه
.................يا كود شوف الناعسات المراميش
اللي لهــــا بالقلــــب مثل البنايــــه
.................هي غايتي والغير نجزاه تطنيش
واعداد ما نجم(ن) يبين بسمايــــه
.................ازكى صلاة الله على صفوة قريش
ودمتم برعاية الله
وكل(ن) على شفه يجي له رمايه
العرض العادي
