طلعنا من صباح الله خير من ديرتي الغالية (( محيرقة - 25 كيلو شمال غرب مدينة القويعية )) متوجهين شمالاً إلى داحس مرورا (( بالخنقة )) ثم سلكنا الطريق المؤدي إلى داحس والذي يربط طريق الرياض السريع بالدوادمي (( مزعل - الدوادمي )) وبعد الصولات والجولات أتممنا عملية الصيد والتي لم تكن وفيرة لقلة الربيع في المنطقة العام الماضي (( وعسى الله يرحمنا برحمته إن شاء الله )) توجهنا إلى أحس شعبان (( ماسل )) والمجاورة لداحس ...... ونزلنا العزبة ونتفنا صيدنا وصلحنا القهوة والشاهي والغدى وحمدنا الله وشكرناه .... (( يالله لك الحمد والنعمة على نعمك ))

بعد الغداء الله يسلمكم تقهوينا الشاهي قصدي الشواهي .... وأخوكم قام يتمشى في هالشعيب يمين يسار وشفت إن شجر الطلح مليان من الصمغ اللي يفرزه بشكل ملفت للنظر وأعتقد إن هالصمغ له إستعمالات في الماضي لكن والله ما أدري وشهي ولقطت كم حبه منه للذكرى ليس إلا (( أمحق من ذكرى )) .... بعدها من زود الحركة والبثارة قمت أرسم توقيعات ولوحات مجسمة على الأرض ..... تعرفون ماكل حجل ومبسوط والحمد لله و ما فيه ما يكدر بالي .... ويوم جاء عقب العصر عودنا يم محيرقة جعلها السيل لإكمال رحلة الصيد .....