|
افضل التجهيزات للباثفايندر
السلام عليكم ورحمة الله وبركاته
ياجماعة الخير انا عندي باثفايندر 2003 وودي اجهزه للبر يعني مثل تركيب تانكي مويه<<<وش افضل نوع وكم سعره رفع السياره من الخلف علمن اني مركب يايات استرايه لاكن مارفعت واجد ودي ارفعه اكثر كيف الطريقه ودي اركب طبق في الشنطه وين افصله او وين احصله وبكم سعره ودي امدد للكنود وكذالك اركب لمبات في الكبوت و اركب محول كهرب مع افياش داخليه وين الاقي الي يركبونهم ويمددون الأسلاك بطريقه احترافيه وأمنه بأسعار ممتازه وش احسن نوع للفرارات وين احصله وبكم ابغا ارب ماطور للهوا وين احسن مكن يثب فيه الماطور بالنسبه للباثفايندر المهم انا موقعي بالرياض وين الاقي الي ذكرته فوق بالرياض ياجماعه لوحصل صور باثفايندر مجهز للبر او فيه اي اضافه من الي ذكرت فوق ياليت ينزل صور له وودي بعد تشاركوني وش اضيف فيه بعد من تجهيزات ((ابي فضل الورش في الرياض مع الوصف لها التي تقوم بعمل تربيط للجيب من الصدام لصدام ويكون سعرها جيد وغير مبالغ فيه واهم شي الأمانه في الشغل)) انتظركم يالقروم لأفادتي والفزعه معي |
|
كان ياماكان في قديم الزمان كان هنا اثنين من المميزين ولديهما باث فايندر وهما (بسام والجارمن) وبدلا سياراتهما الى سفاري يمكن يفيدونك |
يا هلا بك يالغالي وحياك الله في بيتك الرحلات اولا: ابيك تزور موضوع تجهيزات سيارات الرحاله على الرابط ادناه وتزيدنا مما عندك وان شاء الله تستفيد منه. ثانيا: الباث وما ادراك ما الباث (اول سياره بريه امتلكتها والصراحه حبيته كثير ولكن لصغر مساحتها وبحكم اني عندي اطفال فاصبحت صغيره علينا وشرينا باترول , ولكن الشهاده الله الباث ما عليه كلام) ثالثا: التجهيز تانكي الماء : انصحك بالواقف خلف المرتبه الخلفيه من عند السنيدي 80 لتر المنيوم بحدود 600 ريال( بس انت من النوع اللي ينام بالسياره فركب التانكي المنسدح حق الوادي عشان يسهل النوم مع سدح المرتبه الخلفيه) رفع السياره من الخلف: ركب بوالين استراليه داخل اليايات الخلفيه وتتحكم برفعها بالهواء وموجوده عند الرمايه. الطبق: من عند السنيدي جاهز للباث بحدود 250 ريال او تفصيل على مزاجك عند الورش تجهيز السياره بالبطاريات والمحول والافياش في الرياض (لا اعرف الممتاز منهم , بس الشباب يبي يفيدونك ان شاء الله) بس الدمام فيها محل متخصص وشغله تمام والعنوان ارسله لك على الخاص. الفرارات : ما عندي اي معلومه ماطور الهواء: انا كنت مركب ماطور الهواء في الباث داخل الكبوت ولكن لا انصح فيه لانه سيضطرك لتركيب ماطور صغير , وانصحك بماطور ابوجمل وقم بتثبته بالشنطه او داخل الصدام الامامي. بقيه المعلومات لا تتوفر لدي عن اسئلتك الباقيه وحنا حاضرين للطيبيين. ونصيحتي لك لا تستعجل بتركيب اي شي من الاضافات الا بعد التاكد من الشغل الزين ومكان التثبيت المراد تثبيت الاجهزه بها. موفق بإذن الله ... لك مني أجمل تحية . |
عبدالحميد الحربي
ابوفراس جزاكم الله الف خير وماقصرتو بسام... الله يعطيك العافيه عز الله ان كفووو كفيت ووفيت يالذيب ننتظر بقية الأعضاء لأثرائنا بما لديهم حول الباثفايندر |
شفت اني اعرف بسام ما يصبر لين يعطيك الفائدة والاجابة المطلوبة
فشكرا لبسام ابو محمد |
لا شكر على واجب وتم ارسال عنوان الورشه على الخاص موفق بإذن الله ... لك مني أجمل تحية . |
ممكن افيدك بهالمقطع مركب بلونات التحميل
اضغط لمشاهدة المقطع http://www.youtube.com/watch?v=StOXQLvxPGA |
| الساعة الآن 11:24 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir