|
يا ثامر الماضي عليك السلامي.....تسليمة ٍ عطرتها بالرياحين
يا ثامر الماضي عليك السلامي.. تسليمة ٍ عطرتها بالرياحين.. قريت موضوعك قبل حول عامي.. ورجعت أنا أقراه من قبل يومين.. موضوعوك أطيب من عبير النوامي.. وابرد على قلب ٍ غدت به طواعين.. لا صارت همومي ورود ٍ حيامي.. في وسط صدري مثل حم البراكين.. فتحت موضوعك وزال العسامي.. يا زين موضوعك ,, يسر الحزينين.. يشدّني شدّة بروق الغمامي .. للي يخيله من عسوس ومقيمين.. منهو يشوفه ما يجيه المنامي .. تبدا طواري فكرته وين ومنين.. يطري على وقت ٍ مضي له عوامي.. يوم اننا فوق المواتر مقفين.. صوب الديار الي لها القلب ضامي.. نجي لها عقب البطا مستهيمين.. وأنا على جيبي وربعي أمامي.. أربع مواتر ,,لاند,, سبعه وتسعين.. في ماقع عسر ٍ بعيد المرامي.. ما ياصله ياكود ناس صبورين.. على يميني حر ٍأرقط قطامي.. طرح البلد في عام الالفين واثنين.. يتل قلبي لا انّزع بانصرامي .. واطلب وخابر طلعه بعيد بالعين.. ثم لحقها لحق عاصي وحامي.. كنه يقول اليا ضربها على وين.. وجتها مخاليب ٍ سوات السهامي.. وطاحت صريعه .. صيدةٍ قبل يومين.. هذا ترى شفي وغاية غرامي.. طرد الولع ياخوك ما فيه تثمين.. هذا جوابي والسلام اختتامي.. لثامر الماضي فدوه الرديين.. وعسى إلهي يقبل إلنا الصيامي.. ولازم نقوم لضيفنا ياكريمين.. طلال العيد |
صح لسانك وابو شعلان يستاهل وكلامك صحيح عن ان بعض المواضيع تعالج القلوب |
صح بدنك يابو فراس ,, شرفت موضوعي يالغالي ..وفعلا ً لو الموضوع ما حرك شي بقلبي كان ماجت هالابيات,, |
يطري على وقت ٍ مضي له عوامي.. يوم اننا فوق المواتر مقفين.. صوب الديار الي لها القلب ضامي.. نجي لها عقب البطا مستهيمين.. وأنا على جيبي وربعي أمامي.. أربع مواتر ,,لاند,, سبعه وتسعين.. في ماقع عسر ٍ بعيد المرامي.. ما ياصله ياكود ناس صبورين.. صح لسانك يابو فهد قصيدة معبرة عن واقع جميل ومحبب لاهل الصيد والرحلات |
مشرفنا العزيز .محمد المعارك ,,شرفني تواجدك ومرورك يالغالي ,, صح بدنك ,, ولاهنت |
صح لسانك يالغالي قصيدة جزله بيض الله وجهك |
أخي الكريم / أبو فهد . . . صح لسانك . . . يستاهل أخونا الغالي ( ثامر الماضي ) من القصايد الجزله و رجل قول وفعل بجميع الأموري . . . و هذي القصيده قليله بحقه لأنه معرفة الرجال معادن و ذهب و شرف عظيم . . . و نتمنى لك التوفيق . . . محمد الملحم - ابو تالا |
ألف ياهلا ومرحبا يابوفهد
وصح لسانك ولاهنت وأبونجد يستاهل وكل عام وانت والجميع بخير وصحة وسلامة والشهر مبارك وعدت بعد غيبة ويعلم الله كم اشتقنا لك محبكـ عبدالله |
اقتباس:
مشرفنا الغالي صح بدنك ..ووجهك أبيض ,,شرفني مرورك اقتباس:
محمد الملحم / صح بدنك وأبو شعلان وانت وكل من هو في هالصرح ونعم ويستاهلون كل خير .. أسعدني مرورك وتعليقك يالغالي اقتباس:
ألف مليون هلا ومرحبا .. صح بدنك يابو محمد , وأنت بخير .. وماتفقد غالي يالغالي ,, لاهنت يابعدهم |
اقتباس:
ماشاءالله تبارك الله ... ياهلا والله وغلا يابو فهد ... وصح لسانك مليون ... بارك الله فيك على هالمقطوعه الحلوه ... قرأتها أكثر من مره ولم أملّها ... والله يشهد إنك شوقّتنا للمطاريش:) ... مدري وش أقول وش أخلي ... لكن لي عوده بإذن الله http://www.alrahlat.com/vb/images/icons/icon14.gif.. لاهنت وبيض الله جهك ,,,,,,,,,,,,,,,,,,,, تحياتي ,,,,,,,,,,,,,,,,, |
صح لسانك واعتلى شانك ولاهنت يابوفهد
عز الله كفيت ووفيت وابونجد يستاهل وعز الله رسمت الخيال ببياتك لا عدمناك |
الله عليك يالامير
انا اشهد انك علم وابو شعلان يستاهل لاعدمناكم جميعاً |
| الساعة الآن 07:24 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir