تسلم يابو عبيد
إليك القصيدة كاملة
يا تل قلبي تل دلو(ن) من البير
من عروته تله من البير ظامي
يطرد ورا خمسة نياق(ن) مغاتير
ضيعهن الله من ثلاثين عامي
وأتلا حلاله شاة مكشات وأبعير
من عقب ذود(ن) بألف ذود(ن) يسامي
وإلا كما تل الرشا للنواعير
لاشد حبل بكارها بالخطامي
تصيح مثل صياح ليلى على الزير
وين النشاما لابسين الحزامي
يا بو حمد ماعاد بالراس تفكير
والجسم ماعادت تشيله عظامي
على الذي لامنّي أطريته أعصير
يفز قلبي له بأدب وإحترامي
شبيه نفسه فاق وصف الغنادير
الطول بصري والمحيان شامي
أدعج عنج كن الزهر والنواوير
تفتحت في خد بدر التمامي
سبحان من صور حلاياه تصوير
وخلاه فتنه للبشر والانامي
وخلى حياتي من تولعت به غير
لاشفت زوله صرت مدري علامي
أكّن له حب وموده وتقدير
وأصير له بالنار برد وسلامي
له بالحشا لجه وصفقه وتصفير
يفيض حبه ويتبعثر غرامي
من عذره ليامن مشا يخلف السير
ولامن وقف في وقفته أمر سامي
ماعندي بهّزه للاكتاف تفسير
إلا أن قلبه فوق الأشواق حامي
مشكاي يا ملجاي يا مسندي طير
عجل وقلي يا رفيع المقامي
وشحيلة اللي صوبه سهم تخدير
من عينه اللي عوفتني منامي
واذا اشتكيت لقاضي الحب يا منير
صار الحلال بشرع غيري حرامي
وإلا حكمني حكم جاير وتعزير
ما كنه بدنياه صلى وصامي
يا وجد حالي وجد راعي مخاسير
من عقب نومه فوق ريش النعامي
يطقها عوجا وتقفي مدابير
حتى تنكر للزمن باللثامي
على الذي يامنير مامنه تقصير
كامل مكمل فوق صدره وسامي
كن العسل يقطر من شفاه تقطير
ممشوق قامة عود ريان نامي
الزين ملكه والحلا فيه تأثير
والحسن لامن شاف حسنه يظامي
تكتب من أوصافه روايه وتعبير
فيه الطبيعه لابسه ثوب خامي
وأنا الطبيعه وكلتني خوابير
ما تعترف بالطيبين الحشامي
ياللي تسوي بي كذا ماأنت والخير
حكمتني بالموت وأنت المحامي
خف بي من الله يالله بدون تفكير
إسرج لي ركابك وشد اللجامي
ما بين تهليله وما بين تكبير
حسبي على اللي مايقدر كلامي
يامنير راح وروحته المقادير
وبروحته خلى حياتي ظلامي
ياكثر ماقضيتها بالمشاوير
في غيبته كنت أحسب اليوم عامي
يوم وشهر واسبوع وسنين تدوير
أدوّره حتى وأنا في منامي
أنشد وأدور وأسأل الناس وأصير
بعيونهم من شان عينه حرامي
وليا وصفته جوك حولي طوابير
كلن يقول بخاطره مايلامي
وأقول مثل اللي تقول الأساطير
عمي وتكرم لأجل عينه عمامي
يامنير صار القلب لوح وطباشير
يكتب حروف أسمه على جرح دامي
يابو حمد بالشور قلي وش تشير
عجل قبل يجمع شتاتي حطامي
الشاعر عبدالكريم الشداد