دار الهواء فوق الشجـر بندراجـه
وانا هجوسي تتبعه كـل مـا راج
القلب نسمـات العليـل ابتهاجـه
والفكر خلتـه الدواكيـك مسهـاج
فج الخلا لاضاق صـدرك علاجـه
يغنيك عن بعض المجالس والازعاج
سحابـة البـارح قفتهـا عجاجـه
يلعبها صلف الهوى مثل الامـواج
هبت هبـوب مدوريـن اللجاجـه
يفرح بزلـة صاحبـه كـل هـراج
من غير سبه عاقـدٍ لـك حجاجـه
لو ان ماله مع هل الطيب منهـاج
اثر العوج دايـم يحـب العواجـه
لو ينعدل يرجع لساسـه وينعـاج
مايستوي طعم القـراح وهماجـه
ولايستوي نقع الصفا مثـل هـداج
الله ولا منـت محسـب خـراجـه
شين اللغا ومن البطر لابـسٍ تـاج
والله مـا يذبحـك ياكـود حاجـه
لاصار في وجهك حيا وانت محتاج
بالعسر يسـر وللهمـوم انفراجـه
يجيلها من والي العـرش مخـراج
ارفـع يدينـك للسمـا ثـم ناجـه
يظهرك لو دونك شرابيك واسيـاج