السلام عليكم
صار بعضنا بالمملكة ينتظر سنويا المزاين. وحتى بالخليج العربي صاروا ينتظرون هذا التجمع اللي هو( مزاين أم رقيبة) مع أن مزاين أخرى (بالهيبة.. وأحيانا بالخيبة) تبي تخرب على أم رقيبة {{ ترى ما اقصد شي بس جايزنلي السجع .. وكله مزاين لإختيار أجمل الإبل وفق معايير يعرفها خبراء مشهود لهم بالخبرة والمعرفة المزاينية يتم بعدها اختيار أجمل الإبل من حيث جمال الوجه واللون ومميزات أغلب الجمهور والحاضرين ماجاب خبرها، توزع بعدها الجوائز على (أصحاب المزيونات الفائزات) علما بأن الفائزين ما جاب خبر الجوائز .. فالمهم يفوز ويحقق مركز متقدم ثم .. ولد ابوك تسوم مزيوناته بأقل من طعش مية ألف.
هذا المهرجان اجتذب عشاق البر والرحلات على اختلاف فئاتهم ومشاربهم ( ولا تفوتكم مشاربهم = يعني رجال شروى الطيبين ..شواربهم مفتلة ).. وغير هالعشاق تجذب المزاين من ليس لهم خبرة في التعامل مع الصحراء القاسية... ولا يعرف عنها غير انها هلي أو كبسولة توقف على راس طعس..
الحقيقة قعدت على (رأس طعس) في زيارتي الاسبوع الفايت للمهرجان اللي يقول إنه من (سياحة صحراء) مع أن عرفي عن الصحراء إن مافيها صياعة أقصد سياحة بالشكل اللي يصورونه المنظرين للصياعة (أوووه قصدي السياحة ).
الحقيقة وانا على (راس الطعس) فكرت وسألت وش اللي متغير هالسنة؟
ما أدري لكن استرعى انتباهي الاهتمام الزايد بالإبل وتزيينها بالسفايف والمحاقيب والاكوار .. مع أني ما اعرف وش تعني هالمصطلحات.. لأني ما ألقى أحد يشرحها ويوضحها هناك .. يعني حقين السياحة ماوفروا محاضرين في ثقافة الصحراء.. وترى ثقافة الصحراء ماجازت لي.. لأني أتصورها بموقع المزاين تعني واحد جالس على كرسي (براس طعس) ويلقي علينا محاضرة مملة وحنا ناثرين معاميلنا تحت الطعس نحوف لحيمة الحاشي...
ما علينا تبرعوا ياحقين الرحلات ووضحوا لي وشي السفايف والمحاقيب وغيرها لأني مافضيت مشغول أفكر بالمحاضرة والمعاميل ولحيمة الحاشي كيف يجتمعن براس طعس (وش سالفة راس طعس معي .. الله أعلم)
إلا وش رايكم أطلع بكم ردمية وأقول شعر..
يتبع