[هزيم الرعد]

أحد الأيام جزمنا على الخروج إلى الحبلة ...والحبلة معروفة عند الجميع ...وهي تبعد عن أبها 45 تقريبا ...ويقال أن هناك طريق مختصر لها ... طيب تقولون معين أنا أقول لكم
لما تاخذ غريضات الطلعة من الغنيم مول ..وتطلع قدام متجه لم دلغان ...وبعد ماتمشي مسافة .. تجيك نقطة التفتيش ...وتراه نقطة مهيب واجد ...وبعدها تمشي لك شوي تلاقي اللي سافطين جنب الخط يبيعون فواكه وتلاقي العالم مهدين عندهم ..ويشترون منهم ويكون االخط عندهم مزحوم لوجود مطبات أيضا .... بعدهم على طول الخط تلاقي مفرق يمينك ..هالمفرق يروم لم وين ؟ لم آل يزيد ...امسك هالخط الله يسلمك وتبي تمر على دلغان ويبي يكون علي يسارك ...همن بعده بشوي انتبه يجيك مفرق الحبلة يسار ...عاد الدرب للحبلة فيه لوحات بس أنتبه بعضهن مهيب واضحات ...طيب ممكن أحد يقول لي والطريق الغير مختصر وينه ؟
أقول له ياطويل العمر إذا جيت عند المطبات وراعين الفواكه لاتلف يمين اطلع سيدا ...تمشي لك مسافة لمين تجيك إشارة في تقطاع ... تطلع يمين لحد مايجي على يسارك دلغان وبعده مثلث رح يسار
<< طيب أنت بالخط الأول تقول يجيك دلغان على يسارك ومع هالخط بعد دلغان يصير على يسارك
>> إيه ...هذا صحيح بس يكون اتجاهك متغير ...مع طريق آل يزيد الي مختصر تكون متجه شرق تقريبا أما الطريق اللي فيه إشارة تكون متجه جنوب تقريبا ... بعدين ياخي لاتدقق واجد
طيب ... احد ممكن يكون كم يختصر الطريق ... يقول لي أحد الزملاء إنه يختصر نصف المسافة" 20 كم" ... والصراحة أعتقد أنه فيها مبالغة ... تقريبا يختصر 31% من المسافة << يادقيق أنت
الحبلة جميلة بأرضها المنبسطة والمناسبة للتخييم والتكيات ...وهي تقريبا المكان اللي يجتمع فيه الشباب ويكشت فيه العوائل نهارا
وفي الطريق إلى الحبلة ...وبعد ماتتعدى الواديين ... يجي طلعة تتجه يسارا مع الطلوع .. تبي تشوف الناس واقفين ..تقول وش يسوون ذولا قط كلهم مبنشرين ؟
طبعا لا ...لأن هالمنطقة منطقة فرجة على القردة ...حلولات من رض ذيل هالقرد

.
.
وصورة أخرى

.
.
لما توصل الحبلة تبي تشوف العالم يمين ويسار كاشتين ..وفيه أسواق ومحلات صغيرة ومطعم قريب من الحبلة وهي قرية صغيرة نسيت إسمه
المهم عاد تجي للخيام حقات العزابية وتشوف هالشباب متكين العصرية قدام خيامهم اللي الوحدة منهن كلنه كلوش عجوز محيوسات ولاهيب مشدودات تمام وحالتهن حالة والشباب شكلهم أهم شي بس ينامون كله واحد ..وبعدين تشوف سياراتهم وحركات التحصيص << هي يقال له التحصيص أو وشي
>> بالله وش لون صارت التحصيص ؟
<< من الحصا هماهم يحطون السيارات تحت الحصا ؟
أنت صيدك التحجير لأنهم يرفعون السيارات على الحجارة مهوب يحطونهن تحت الحصا يالذهين
>> إبه صح ... بس مدري عاد هي يقال له التحجير أو لا ...المهم
من حركات الشباب بالسيارات

.
.
من يعرف منكم موشي ديان ... اللي كان وزير الدفاع بالكيان الصهيوني جعله بجهنم ...ابوريكم صورته

.
.
هذا اللي يسلمكم لقيت كامري في الحبلة أشك أنها كانت معه أيام الشبابية
.
.
.
.
.
.
.
.
.
.
.
.
.
.

وهذي صورة الكامري

.
.
.
.
نكمل معكم
شوفوا هالفورد وش لون مسوي ...حتى الكبوت ماسلم

.
.
وهذي اللوحة معروضة للبيع لأنها مميزة ... يجي معها بير

.
.
المهم يومننا تكينا بهكالمحل المنتاز ...اللي ماودك تقعد به ابد << قصدك ماودك تخليه أبد >> إيه صح هذا صيدي
وأنا اللي أجيب لكم هالصور من المحل
أولا كاميرتي على الحامل

طبعا قبل مكان جلوسنا هذا بمسافة تقريبا 500 متر فيه لوحة هالكبر << مادن يديه يعلمكم وش كبر اللوحة .. تقول ممنوع التخييم
بس بعض الناس يحسبون أنفسهم فوق النظام
شوفوا هذولا جايبين البيت المسودس وطاقينه في مكان ممنوع ومعهم باقي الخيام وراعين طويلة... ...طبت عليهم الدورية

ووصار فيه مفاوضات ...يمين يسار لمين خلوهم يفكون البيت ويحملونه على التريلة

.
.
بالمناسبة التواجد الأمني طيب الله يبارك فيهم
وهنا بعض الشباب يعبرون عن حبهم للوطن << قل إيه بس ...
بعضهم يمسكون لك هالخط وطالعين مع فتحة السيارة ومغير هبال وصراخ من الظهر لمين المغرب ..أنا ما أدري للحين وش الفايدة

.
.

بغغغغغغغغغغغغغغغغغ <<< صوت المعجون يومنهم وطوه

.
.
وماتحلى التكية إلا بشبة النار ... وعلى فكرة هناك إذا حصل لك خذ الفحم ... مرة أخذت من حطبهم مدري وش لون هوقايل تحس إنه بلاستيك مستحيل يشتب ..عاد أنا آخذن معي غمرن طيب

.
.
في الحبلة ... صفط جنبنا راعي موتر ...ونزلوا معه أولاده ...وراحوا البزورة حقوني لم اولادهم يلعبون معهم
وانا اللي ازأر زئير الزرافة وأناديهم ... قلت لهم وين رايحين هي علي كيفكم ..؟؟
هماي متفق معكم ماتكلمون أحد ولاتروحون لم أحد بأبها ولاتشوفون أحد << الله لايسلط علينا
قالوا وش فيها طيب نبي نلعب معهم
قلت منهم ذولا وش يقال لهم
قالوا من عائلة ............
عاد هذي عائلة معروفة بالرياض وتجار ...وأنا اللي ألتفت على هزيمة قلت له وأنتي الله يهديتس خليهم يتعرفون على الصغار مافيها شي ولاهيب عيب ولاشق جيب ...ولاراح يجيهم بالعكس إلا سعة صدر
وهذي صورة الشباب يومنهم لعبوا معهم كورة همن تكوا


بس خلوا عنكم إني حقدت على ولدهم الصغير ...ياسر الله يصلح أمره مهكاكة ...قال له ولدهم الكبير رح اصفق اخوي كف ..ماصدق خبر ... راح وعطاه طراق ...أثر الولد الصغير شيطاني ..وشوف عيوني يومنه تماسك هو ياسر ..ومير يطرح ياسر ...ويجلس على راس ياسر وياسر ياحول وجهه انرعص بالتراب ..ومير هو اللي يصيح ويومنه قام عنه الولد صار كأنه طالعن من قبر اشهب الهب ..وخذ ياصياح ... قلت له الله يهديك وأنت وشو له تعطي ولدهم كف ..ماتدري إنهم أغنياء ؟
عاد أمهم ماقصرت فتحت باب السيارة ونادت ياسر قالت له تعال خذ بسكوت ... بس ياسر كان جاي لمنا وشكله ماسمعه ...بعذره أذنه مليانتن تراب ولايسمع زين
.
.
.
.
ومير إنه يجهز غدانا في جو كان رائع جدا جدا جدا جدا مانقصه إلا المطر ...غيوم والشمس ماشفناها

.
.
.
عاد بعدها رحت أبي الله يعزكم دورة مياه ...والاقي اللي قد كتب عنها هنا بأن الحمام بـ 5 ريال والتروش بـ 10 ريال
عاد المشكلة انك تدخل مع باب واحد ... يمينك بقالة ..ويسارك دورات المياه ..والباقلة لها شباك يفتح على الحمامات ومن عند هالفتحة تشتري من البقالة ..والمكان مغلق والتهوية فيه ضعيفة ..والريحة ..... المشكلة إن هاللي بالبقالة شكله مستانس ...تذكرت طاش ماطاش يوم السدحان من جنوب الرياض ومدمن ريحة مجاري
المهم ...قلت له ياخي ليش بخمسة وعشرة وش هالأسعار .. على الأقل ياخي بريالين وبثلاثة معقولة بس بعشرة ؟
وقلت له ترى هالمحل مكتوب عنه في النت ... قال الناس قلوبها مليانة حسد ..عاد أنا أبت نفسي إني أدفع 5 ريال عشان اقضي حاجتي ...تشطرت
عاد بعد الكبيسة ... من الخطأ إنك تفوت على نفسك براد شاي أخضر من شركة تويننجز بنكهة النعناع

.
.
نسيت أحط لكم صورة التريلة اللي شالت بيت الشعر وبقية الخيام

.
.
الخروج من الحبلة عادة يكون قبيل المغرب ...وتواجه شي من الزحام ...
وانتظرونا مع بقية الايام والصور وشكرا