الاخوه الغالين
السلام عليكم
هاليومين زان الجو و الربيع وبدو الرحاله بعد الذبح والصلخ وعيد الاضحى بتزهيب اعمارهم للرحلات
بعض من الكشاته الله يهديهم اذا طلعو الي البر وخاصه في الليل وبذات في النفود او الصمان تلقاهم مابين الارض والسماء جلدي بهالموتر تقول شايفين هلال العيد ويبون يعلمون الناس وياخذون البشت ويالخمس ميه اللهم يكافي ولا... في سباق رالي سيارات مغير تقول الموتر صابونة مسك في بانيوم اذا طاحت من يدك وانت تفرك روحك.
والمشكله انه مايشوف الا قد مقدار نور سيارته وشوي ولا الدرب منتهي في مراح الحلال ومجفلهم او ناحر بيت الشعر ثم خذ لعلعه وصياح ورا هالبدوي نازل في وسط الخط ضاقت به الدنياء مالقاء الا الخط ينزل فيه لاياخيي البدوي مانزل في وسط الخط.
لانه مع كثر روحاته وجياته صار خطه مطروق وانت يالحبيب تحسبه خط (ام رجوم النقيان) غاديه عويناتك تقول عداد بنزين مره يم الخط ومره يم الجهاز (القارمن ) خايف لا تضيع وناسي ان رجيلتك علي البنزين ولا تهدي والليل علي مايقلون اعمى.
يعني ارفق ياخيي وسق بركاده حتي لا تصدم بيت الشعر او البعارين ولا تدوش الصخال و البهم والغنم
ثم بدال ماتروح رحلة تروح في خريطها .
و الطامة الكبرى هي ان بعض الخطوط او الدروب تنتهي بدحل تخيل ؟؟؟
بيقول البعض وش يدخل الدحل انا اقولك كثرة الروحة الي الدحول جعلة لها دروب تنتهي عندها بالضبط وبعض الدحول
ماعليها صبات تردك يادسكفري البر
مانيب اقول الركاده زينه حتي ولو في النهار
اخوكم
خشم الحصان