قناة فضائية شعبية تسحب البساط من منتديات البر والصيد

[القطار]

التردد لهذه القناة في آخر الموضوع.. لكن لا تسحب الماوس.. اصبر
++++++++
السلام عليكم

يحدثني من أثق في كلامه عن تلقيه مكالمة هاتفية قبل أيام من أحد أصحاب القنوات الفضائية يطلب منه إعداد برنامج عن ( الصحراء والصيد ) {{ كذا خبط لزق
( صاحبي محل الثقة ) سأل عن فكرة البرنامج.. وكيفية إعداد السيناريو..
فرد عليه صاحب القناة.. الذي عدل خبرته من متخصص أعلاف مزاين الإبل إلى معد ومخرج ومنتج برامج تلفزيونية رغم أنه من إولئك الذين لازالوا يسمون الصور الفوتوغرافية بـ( العكوس ) فيقول لا ( أسكت الله صوته وقناته ): تعال عندي في بيت الشعر وراح نضبط لك (مع راس المعسل ) السيناريو من طقطق إلى سلام عليكم..
ومع (أنفاس المعسل ) قال صاحب القناة أو (المزاين) لصاحبنا: أقعد خلف الشاشة في خيمة وتكلم عن البر وجب لك واحد من هالشباب ويستحسن يكون أثرم وسنونه المتبقية صفراء ويلبس شماغ أسود وعلى كفه طير أو حتى بومة ..وخله يقول أي شي.. المهم كل ما أخذ وأخذ .. خله يرمي كلمة مثل: ويوم كنا قانصين السودان ..
ولا تبالي .. بعد كلمة السودان.. وش يقول.. فالمهم ( قانصين السودان )..
وأنت لا تخليه إذا شفته يشطح بسواليف عن الشاص أو أبو شنب أو جميحيات الجمس المدبلات .. أخطم عليه وقل,, حدثنا عن مقناصكم بباكستان.. ولا تنسى تلقنه الاجابه قبل بدء البرنامج.. يعني ممكن يقول ردا على سؤالك: دخلنا بطعوس وحنا قانصين تورا بورا وطحنا بالرباضات وغاصت سياراتنا (الرنجات واللاندكروزرات ) إلى التندة.. ثم هجموا علينا عصابه.. ولهذا اتصل واحد من خويانا ( الواصلين ) على مسئول كبير توري بوري وقال له: ارسل لنا طياره..
ولا يهمك لو جاء واحد من حقين ( رسائل الاس ام اس ) اللي سيظهر كلامه في أسفل الشاشة يقول: تورا بورا منطقة جبال مافيها نفد ورباضات.. ترى الكنترول في القناة هم ( اللي حاكرين الشغلة ) وجاهزين يبي يدخلون بأسماء مستعارة ويشعلونها هجوم على اللي أرسل العبارة الأخيرة وسوف يردون عليه بعبارات متسلسلة ( وش دراك يا خشاش الناس .. اترك المراجل وعلومها لاهلها) ..
وبعد هذا التلاسن المفتعل بالرسائل سيأتي رد (اس ام اس ) من شخصية سوف نسميها الهاربة المحترشة تقول ( أحلى يابعد كل قبايل تورا بورا.. فديتك ).. طبعا تقصد هالأثرم
وإذا شفت هالاثرم يبي يتوهق ويترزز ويفشلنا هو وثرمته يوم يشوف رسالة الهاربة خاصة كلمتها ( فديتك ).. أقطع كلامه وقل: ( فاصل ونراسل ونفلها ونتواصل )..

........... يتبع.. التكملة مع تردد القناة على هلسات