قصيدة في المراجــــــــــل جميله وايد

[حاتم الحمداني]

{السلام عليكم ورحمت الله وبركاته }

ياقلب ياقلب العنى يا معذب = يلي عليك الوقت ياقلب مالى
ياقلب تشكي من غثى الوقت متعب = حالك ودمعي من على الخد سالى
اوجس تقل جمر الغظى فيك مشتب =يالمنحجر بين الضلوع النحالى
سهم الدهر مدميك ياقلب معطب =وصابك سهومن غير هذا توالى
ياقلب اشوفك تالي اليل تنحب =نحيب ولفن فارقت للرحالى
يا قلب لجلك تسهر العين ترقب =نجمن مقابل من شمالن تتالى
لجلك اذلل كل صعبن تصعب =ولجلك تسير الرجل شرق وشمالى
ولجلك نضمت القاف واحرص وأجنب =ماينقده ياقلب هذا محالى
صيراف للمعنى بخيصن مجرب=واصرف كما صرف الذهب والريالى
حريص عما يردي القاف يشذب=واحرص على صيغ البيوت الجزالى
ابي اليا هذت قوافيه تطرب=وتشوق سامعها ليا جا مجالى
ياقلب كانك من غثى الوقت تشرب=قبلك قلوبن وصطها الهم طالى
كم قلبن يشكي من قريبن مقرب=يبور لو فضله رجح بالطوالى
تلقاه للقاصي فزوعن يغرب=يزمر وكنه لكثر الطيب نالى
وينسى جمايل وحدن لجله أتعب=حاله وخيره كم يومن تتالى
ليته على فعله بهرجه تأدب=على الردى يبغي يبين الخمالى
قال المثل ياقلب قد قيل جرّب =ناكر جميل حمار قيلت مثالى
وكم قلب به نار المحبه تلهب=يشكي فراق الي كمل بالجمالى
وكم قلب عودن تالي اليل يقنب=يقنب قنيب الذيب فوق الجبالى
كبير سن من القرايب مجنب=وزودن على ذالك عقوق العيالى
وكم قلب من جور اليالي تغرب =مضيوم وقت ولكثر الهم شالى
وكم قلب محزون رجا الله يطلب=يغفر لمنهو بين الكبر حالى
وياما كم قلب وقلب يشكي مصوب=هذي هي الدنيا جواب وسؤالى
وياقلب انا بخبرك احذر تقرب =من رجل بواقن وفيه احتيالى
ياقلب كم رجل من الطيب يهرب =تلقاه يهرب للعلوم الهزالى
وكم رجل في بير الردى وسطها طب=ودك على وجهه تحط الشيالى
وكم رجل قلبه بالشحاحه تشرب= عن الكرم والجود صابه جفالى
وكم رجل بين القرايب ينشب=وده يجي بين القبايل قتالى
حقه عقب موته على الوح يصلب=ومن قبل موته ينوطي بالنعالى
وكم رجل حورف له ولا فاد به طب =تبغا ترزه ماترز الحبالى
وياقلب كم رجل على الطيب يجذب=قاع المراجل صال فيها وجالى
وياقلب به رجلن من النطق ينحب =زانت فعوله بالكمال وجمالى
وياقلب كم رجلن صفا مايخيب=لوهو عليه الحول ياقلب حالى
وكم رجلن نفسه له ذلولن وتشعب=يسوقها للطيب سوق الجمالى
ويا قلب كم رجل المثل فيه يضرب =للطيب راسه للمعالي تعالى
هاذي بعض اصنافهم لا تعجب =وينبيك عن حال الرجال الثقالى
ياقلب خلك لليالي تحسب=العمر يمضي واليالي طوالى
خلك فطين وما جرالك تجارب =واحفظ دروس التجربه لاتزالى
ياقلب عن درب المعاصي تجنب=جنب حرام الفعل للي حلالى
احرص على الي تعمله يرضي الرب =بالله خلك دوم تمشي عدالى
امسك عرى التقوى وفيها تقضب=واكسب رضى ربك عزيز الجلالى
لوطال عمرك بالمنيه تصوب =مصيرنى ياقلب العنى للزوالى
وصلات ربي عد ما الحرف يكتب=على النبي وعداد حب الرمالى

والسلام عليكم ورحمت الله وبركاته