[ثامرالماضي]

بسم الله الرحمن الرحيم

إخواني الأعزاء ... أعضاء وزوار هذا المنتدى الغالي ...

كما وعدتكم من قبل أن أدرج موضوع عن مقناص الكراوين بالحرار ... هاأنا أفي بوعدي لكم ...

وأتمنى أن ينال على إستحسانكم ورضاكم ....
ـــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ

في آخر شهر 1 / 1428هـ كان الربيع في بداياته وكان وقت الكراوين ... وتوقعنا أن تكون هذه السنه هي أحسن سنه للكراوين ولكن لم يحالفنا الحظ ... والحمد لله على كل حال ... المهم :

أخر أسبوع من شهر واحد مشيت لم الربع يوم الخميس بعد الدوام مسيّان ... كانوا قانصين ولا لقو شي يوم الخميس ... دورنا مراحٍ زين وفليناها وإستانسنا ذيك الليله ... ويوم أصبحنا الجمعة ...
كان الجو خيال والأرض كاسيها الخضار والشغايا حلوه بالحيل .

هذي شغية من الشغايا بس وعره شوي ...

والصراحه جانا ملل من المقناص ودك تكشت <<<< إيه هيّن .... وصرت أتمشا بهالربيع الزين

ولا بعد كل شوي نازل أصور يقالي محترف

وفجأه صوت لنا واحد من الربع قال عندي جرت كروان جديدة ... ولكن مافيه إلا خطوتين والأرض وعر ماتعطي أثر واجد ..

قلنا له كفو والله جيناك ... ويوم جيت ولا الربع مجتمعين ويدوجون حوله ...

وبينما حنا ندوّج إلا طاحبهن واحد من الربع قال شوفوهن عندي ...

والصراحه هن ثلاثه بس واحد بعيد عنهن شوي ... وحاولت أصورهن مع جهه ثانيه بس ماش ... حتى الصورة إختلفت مادري وش جاها ...

وصفينا صف واحد ... طبعاً بعضنا ماصف مثل اللي يبي يهد واللي يصور واللي مابعد جاء ...

وبعدها عزلنا واحد منهن وهدينا عليه وصاده الطير ...

وبعده عزلنا الثاني ... عشان مايطيرن مع بعض ويتعازمن على الطيران ...

وطيّرناه وهدينا عليه ... والربع متحمسين مع الهدد ... مع إن الأرض وعره بالحيل ... شف وشلون الحصى

والحمد لله صاده الطير بعد عناء ...

ورجعنا لم الكروان الثالث وكان واقف عنده واحد من الربع عشان مايضيعة ولقيناه رابض ...

أبشركم هدينا عليه وصاده الطير ولله الحمد ...

وهذا كروان بعد ماخلصناه من أحد من الطيور ...

والحمد لله كل الطيور صادن .

وبعد ما إستانسنا بالهدد ... وجاء وقت المضّحى .... وقفنا للغدا وحينها زانت السواليف والقهوه ....

وهذي آخر صوره للكروان وهو أسير بالشبك مع الحمام ...

وبعدها أتمنى من الله العلي القدير ... أن ينال هذا الموضوع على رضاكم ...

ودمتم بخير وعافية

,,,,,,,,,,,,,,,,,,,,,,,,,,,,,,,,,,,,,,, تحياتي لكم ,,,,,,,,,,,,,,,,,,,,,,,,,,,,,,,,,,,,,,,,