الاخوان الغالين
السلام عليكم
مشرقنا اليوم بيتكلم عن بعض من ادوات البيت القديم منول.
العرزاله .
تنبية
(هذه الصورة من كتاب) صور من الماضي تاليف عادل محمد عبد المغني (من دولة الكويت الحبيبة)
وهي مصنوعه من اعواد الجريد والخوص سعف النخل او صناديق الموز منول من الي يذكر ها منكم وتعلق بطريقه خاصه لتكون بين السماء والارض بحيث تكون في موقع مناسب بعيده عن الحراره او الشمس وان تكون في الضل ويوضع فيها الاكل يعني ثلاجه 16 قدم صناعه وطنيه بس معلقه
وعاده مايوضع فيها الحم او الكرعين او اروس المهم اي شي يوكل السبه حتي لاياتي القطو او التفه وياكل الي فيها وانا اشك في ذلك واعتقد ان خوفة الاهل من الاطفال ان ياكلو مابها لذلك رفعوها عنا وبعض المناطق يسمونها المرفاعه اي انها ترفع الشي وفي وادي الدوسر يسمونها القفص و في الكويت يسمونها ملالة
..............
الكوله (السولة)
وهي ادات تستعمل لطبخ وذالك بان يوضع فيها القاز ثم يشب في فتيلتها ويوضع القدر عليها ولا تستعمل الا قليل وذالك لئن القاز غالي منول ولا يجي الي الديره اي القريه الا كل اسبوعين وكانو يستعملون بدل عنها الكرب و الجريد او الحطب وهنالك انوع مشهوره منها ام اسد والهنديه واذا قضي الطبخ الله يعين الي بيغسل
الموعين تغدي قاعتها سودا (سنو) ولا يطيره الا الطين ومنول يدين امهاتنا الله يجعلهن في جناته خشنه اذا حكت خدك او اذا جت تفليك مشخة وجهك غاديه كنها صنفره اهههههههه ياحريم قبل مهوب مثل الحين غديه يديتهن مثل عرقيب البزير الي توه مولود من النعومه.
...............
المغرفه
وهي بماثابة الملعقه الكبيره في عصرنا الحاضر مهيب مثل مغرفنا الحين لا اكبر اذكر منول اذا غرفة ابها تقوم يدي ترقل هذا اذا منكب الي فيها.
منها الحجري و منها مايصنع من خشب الاثل
..................................
المحقان
ويستعمل للدهن او السمينه او البن مصنوع من الخشب بطريقه فنيه تنم عن مهرت الصانع
وهنالك محقان اخر مصنوع من الحديد
بس يستعملونه لحقن السراج او الكوله بالقاز
...............................
المثعوبه
وهي اناء من النحاس ذو ثعبه مثل ثعبة الدله حقت القهوه بس اكبر ليسهل صب مابها من سوائل مثل الدهينه او البن او سمينه البريه
......................
المحجان
وهو خشبه معموله بشكل خاص و المحجان يربط بحبل في سقف البيت ويعلق عليه القربه حقة الماء
وهنالك للقربه معلاق اخر من ثلاثة ارجل او اعود وهي هرمية الشكل تربط بشكل خاص وتسمي القناره
هذي منول عدة البيت وادواته مهوب الحين اذا دخلت البيت ورحت الي المطبخ ولاك تعثر من كثر البلوي الي فيه وعلي كثرهن مانشوف الا طبخه وحده رز مع دجاج او لحم مع رز او جاك اتصال قبل لا توصل ويه ابا كلف عليك مر البخاري الله لا يهينك وجب معك رز حتي الطلب رز وان كانك وسيع صدر ودمقراطي تسال ليش
ي ام .........و شفيك ما طبختي ردت ويه نسيت اقولك البارح ان الغاز قضى ولا ما قمة الا مصيفه ولا م امداني
ولو تقول لها ان فيه عرس في الظهر ومعزومين عليه قالت هو مر ني تراي زاهبه اهه ياحريم قبل
الخوفه من القادم لايا اكلنا يصير مثل الاندومي الاندونوسي وسلامتكم
قهوة المشراق (ادوات البيت القديم)
العرض الشجري
