الله يسعد اوقاتكم بالخير
هذي بعض من سواليف اهل نجد الاولين
منت عليك وسلمت:
في عنيزة طلب أحد الوجهاء من رجال يجيه بعد صلاة العشاء مباشرة يساعده عشان بيجونه ضيوف.
وصلى الرجال بمسجد الشيخ عبدالرحمن المانع وكأن الشيخ طول بالتشهد الأخير.
فسلم الرجال قبل نهاية الصلاة وراح بسرعه عشان مايروح عليه موعده,
ولما جاء المدعوين كان من بينهم الشيخ عبدالرحمن ,, قال الرجال: ياشيخ عبدالرحمن تراك طولت في التشهد الأخير, ومنت عليك وسلمت .
قال الشيخ: عد صلاتك, ولاعاد تمون علي مرتن ثانية
ــــــــــــــــــــــ
يصلحونها على حسابهم:
قالت وحده لرجلها : شباك الحمام طاح.. جب واحد يصلحه..
وعدها يجيب واحد ويصلحه قريب.
وكررت عليه كثير وقالت:أخاف يشوفوني الجيران !
قال: تطمني لو شافوك بيصلحونها على حسابهم
ــــــــــــــــــــ
القاضي النطاح:
كان هناك قاضي ملقب بالنطاح والسبب أنه لما ينطق بالحكم يغضب المحكوم عليه , فيحاول القاضي يطلعه وان ماقدر ينطحه >> حشا هذا ثور
وساله الوالي عن السبب: قاله يالوالي يجيني خصمين وكلن يقول بحجته وأحكم بينهم..
فيحمق المحكوم عليه واحاول اقنعه ولا أقدر.. همن مالي الا أن انطحه
وطلب من الوالي أنه يحضرله أحد جلساته.. وحطوله ستارة وقعد وراها الوالي.. وجوا الخصمين عند القاضي.. ويوم سمع منهم حكم لواحد منهم , رفع الثاني صوته وأخذ يسب القاضي ويوصفله باوصاف.. والقاضي ساكت ماتكلم..
فطلع الوالي من ورى الستاره وقال :أنطحه وإلا نطحته أنا
ـــــــــــــــــ
الكعبة مهيب طايرة :
كان هناك عجوز وتقدم لها رجال يخطبها ووافقوا عليه..
وكان وقت الحج وهم قد عزموا يروحون للحج هالعام
قالوا لها تبين نزوجك الحين ولا اذا رجعنا من الحج؟
سكتت شوي ورفعت راسها وقالت:
الكعبة مهيب طايره ... ابحج السنة الجايه ان شاءالله
^
^