طق طق طق طق طق طق طق ....

[العنبري]

السلام عليكم ورحمة الله وبركاته

.
.
.
.
.
.
.
.
.
.

البلاكستون وما ادراك ماالبلاكستون
تلك الماكينة العريقة والتي خدمت في زمن الاباء والاجداد
خدمة لاتقدر بثمن ...
فما أن ينفلق الصبح إلا وتسمع صوتها يدوي في أرجاء البلد
ما يشعرك بيوم مليء بالحيوية والنشاط .

البلاكستون ليست الوحيدة في ذلك الزمن
ولكنها الاكثر انتشارا والاقوى تحملا
حيث كان يضرب بها المثل بقوة التحمل والصبر ...

أما الان فقد استغنى عنها الناس الا ما قل
بعد أن تطورت الصناعة وخرجت لنا مكائن قوية
كالفلفو والمرسيديس وغيرها ...
فتجدها الان جاثمة بجانب الآبار القديمة
قد استغنى عنها أصحابها وتركوها

البلاكستون صناعة انجليزية عريقة
خرج منها حجمين :
الاول حجم 16 وهو الدارج والاكثرها استعمالا ,,,

اما الاخر فهو 26 وهي اكبر حجم واضخم
واقوى من الاولى ,,,,

وهي تتكون من بستم واحد داخل قميص
يوجد بالبستم شنابر عديده منها للهواء والزيت
كذلك لها بلوف عددها 2 واحد موجود في الاعلى
يسمى بلف الهواء , اما الاخر موجود في الاسفل
ويسمى بلف النار ,,,,
اما البكرات الموجوده في الخارج فتسمى الحذافات
فالحذاف الايسر مربوط به طارة يركب عليها
السير ليدور بالطرنبه والايمن يوضع به الهندل لتشغيلها ,,,

صورةللطرمبة

صورة توضح الهندل

صورة توضح الحذاف الايسر الي يركب عليه السير

صورة لماكينة مغطاة لمحاولة المحافظة عليها

ماكينتين محالتين للتقاعد كنهن في معرض

صورة للتمديدات القديمة في بلدة القرائن من احد الابار
باتجاه الخزان ومن ثم الى البلدة

نغزة جعلك ماتركب السير إذا أنفك أو فرط
دقشة تشغيل الماكينة لايحتاج الى عضلات بقدر مايحتاج الى معرفة وممارسة
همسة ترى عنوان الموضوع مهوب دعاية لموقع طق طق

معليش تعدينا على حقوق أخونا خشم الحصان

اتمنى أن يحوز هذا الموضوع على رضاكم واسحسانكم

تقبلوا تحياتي

[أبوعبدالعزيز]

عليكم السلام ورحمة الله وبركاته

مشكور يا ابو ابراهيم على الموضوع والصور النادره

[أبو مروان]

وعليكم السلام ورحمة الله وبركاته

مشكور أخي الغالي العنبري على هذا الموضوع الرائع والصور المعبرة

وجزاك الله خير

[الوافي عزام]

الله لايهينك

وموضوع اكثر من رائع

ذكرتنا بالماضي الجميل والايام الحلوه
وذكرتنا بطق طق طق طق تسمع صوتها من كيلوين هههههههههههه

لاكن والله من بزر راح ضحية هالمكينه وسيرها الفتاك

ذكرتني هالمكينه بعنز كانت عندنا بالديره خمها السير ولا وقعت الا بحوض نخله
واشوى لحقنا على العنز وهي تلفض انفاسها الاخيره وذكيناها

تراني مانيب كبير سن لاكن لحقت على اخر وقتها كانوا يجربونها بس بيبيعونها

والف الف شكر

[سحمان السبيعي]

شكرا اخي العنبري على الموضوع الشيق فعلا ذكرتني بما مضى .

[حامد الغامدي]

الله يازمان، صوت المكينه هذا سحري، اذا سمعناه يعني ان هناك فيه مويه تصب، وفين تصب؟؟؟؟؟؟؟!!!!
في البركه اللي في البستان، يعني انه فيه سباحه، ولسباحه كانت في مزارع وبساتين الطايف، اذكر منها، بساتين حوايا، نخب، بستان سنجر وبركة العبد اللي كان ياخذ على النفر نص ريال.

تسلم يالعنبري على ارجاعنا الى ذكريات طرمبات الماء.
على فكره: كان بعض المزارعين يحطون قوطي على الشكمان علشان يسمعون صوت الماطور اذا طفى.

[يعقوب الوهيب]

الله من قارورة فكس حطوها الاولاد الشياطين في الشكمان علشان تطير مثل القذيفة.

الف شكر لك يا العنبري ان جعلـتــنـا نرى بعض وسائل القدماء ،
انا مثل اخونا "الوافي عزام" ما لحقت عليهن ولا اعرف نغمة صوتها من الصبح
ليت الاخوان الكبار في المنتدى يشرحون لنا عنها.

[عيسى العيسى]

أخوي العنبري

مشكور على هالموضوع الرائع
ياخوي ذكرتنا بالسباحة في الرتسه وطبات محيفرة ومعيقلة من فوق النخل على طبعاً البرتسة اللي عمقها مت ونصف
ولا شف المقاريد يومنا صغار ندورها دوره في عزة القايلة وأحيان مايصير لابس بعضنا نعال(أعزكم الله) وتتلسع رجليه من الرمضا ...وهات أشوف منهو اللي يطب أول في هالبرتسة اللي نصفها غرب وشبى ...وللا شف الأشكال إذا طلعت طبعاً سروال مقوصر وفنيلة علاقي ممصعه من المزح الأقشر ومتلصق عليها شي من الغرب ...وشف الضحك على عبيد ومحيسن.. الشبى فوق روسهم وما يدرون...
إيه ياذيك الأيام الحلوة والبسيطة والقلوب عند بعض!!
آسف على الإستطراد رحنا فيها
تقبل تحياتي
--------------------------------

[محمد المعارك]

طق طق طق ... ايييييييييييييييه يازمان فات مع البلاكستون ( الانجليزية الصنع).
ذكرتنا يالعنبري بالمكاين هذي وصوتها اللي من اول الفجر تسمعه ..

طبعاً القوطي والا قزازة الكريم المخصر هي لتنبه المزارع اذا ( أقطعت) يعني بدت تدو الطرمبة بدون ماء وهذا يخرب المكينة على طول لأن الماء الخارج من الطرمبة فيه ماسورة تودي على المكينة لتبريدها ( ليس لها راديتر) وعندما يتغير صوت المكينة وتسرع طقطقتها يعرف المزارع ان المكينة أقطعت فيأتي بسرعة ويطفيها ويشغلها لين تشيل الماء.

شكراً اخي العنبري على هذه المشاركة الرائعة ...

وبارك الله فيك.

[احمد الثقفي]

ماشاء الله عليك وعلى تقريرك عن الطقطقة أقصد السمفونية الجميلة التي تعزفها مواطير الابار وصوتها الشدي
خلاص تعطلت الان بعد انقطاع الماء وجفت الابار

نسأله سبحانه ان ينزل الغيث وان ترجع آبارنا كما كانت في سابق عهدها

[ابو فراس]

ياربيه اثريكم كلكم شيبان وانفضحتوا الا المربد

اما صوت المكينة بالقوطية فهو موسيقى الصباح وياما جيت اركض بكل قوة الحق على المكينة واطفيها وياما قرص السير على ايدي عند تركيبه على البكرة الكبيرة

كل ذولي كوم وتشغيل المكينة في صباح يوم بارد من ايام الشتاء كوم واسألوا مجرب

[شايب الصمان]

بنتوا ياالشيبان أقل واحد بكم حول تصفيرة العداد :d

تسلم وماقصرت أذكر فيه مزرعه بثادق كنا ناقف عنده وأستمتع بأنغام صوت الماكينه ..... تراي كنت صغير

[ثامرالماضي]

بسم الله الرحمن الرحيم

مشكور أخوي العنبري ...

الصراحه اللي يشوف هالمكاين ويشوف وقتنا هاللي حنا فيه يحمد الله ويشكره على هالنعمة ...

والصورة ا لمؤثر حقيقتاً صورة المكينة اللي مغطيها راعيها ببطانية ... يدري إنها في وقتنا ماتسوى شي ولكن عنده إنها غاليه إلى الأن ...

الله يرحم الحال ...

لاهنت أخوي العنبري ... وبيض الله وجهك ...

وننتظر المزيد ... من كل جديد ...

,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,

[ريع الدياب]

الغالى العنبرى

صوت البلاكستون لا يزال يطن فى أذنى كلما طلعت
للبر مع صقر وسمعت صوت باتروله الديزل !!!!!
ايوه كثر لنا من هالطقطقه تكفى ورجعنا لأيام الشباب

[ولد نجد]

وش ذالعنوان يابو ابراهيم
يانت قلبت الذكريات الجميلة
على فكرة مازالت تعمل في بعض الامكان التي لم يصلها الكهرب
واذكر كانوا يحطون قزازة أو علبه لتحسين الصوت
تسلم على الصور الجميلة