اخواني واحبابي هذي سالفه دامنا في مقيض نقطع بها الوقت والايام
يروي لي احد الزملاء هذه السالفه الجميله في احدى مقانيصهم من قرابة سبع سنوات في الرمله
يقول : ذهبنا لرحله قنص في احدى مناطق المملكه العربيه السعوديه وكان مقناصهم او بالاصح اغلبهم اهل سلق اعزكم الله وكان ابن عمه اللي يصغره سنا معه وكريه ومعهم رجل اخر في الاربعينات من عمره معه طير حر.
راعي الطير الحر رايح يوسع صدره مع اخوياه ولا له نيه يهد طيره على الارانب يقول الطير طير حبارى ولا قد هديته على ارنب ولانيب هاده ( الطير مسكت بما تعنيه الكلمه ولا يشق له غبار ومعروف الطير بالفعل الطيب والجناح النفاث ما شاء الله عليه ) وراعي الطير به حبتين شوفت نفس يمكن عشانه امير رحلتهم وغيرته ( المرتبه الجديده ؟؟؟ ) او طبعه كذا والله اعلم
راعي الوكريه صغير سن لا يتعدى 17 سنه ولاكن ابوه صقار محسوب عند الناس وكلن يعرفه بديرتهم اللي هم فيها وايضا اخوانه اللي اكبر منه صقاقير على والدهم وفيهم خير وكانو يقنصون مع والدهم خارج المملكه وراعي الوكريه ما يروح معهم ( يمكن يجلس عند اهله لانه اصغر اخوانه ؟؟؟ او انه مهوب متولع ويمكن ما الح عليهم بالروحه ؟؟ الله اعلم ) والوكريه هذي اللي معه جابوها اخوانه معهم وهم راجعين من ليبيا ضمن مجموعه من الطيورفي مقناصهم الاخير وكانت قرناسة وقالهم ابوهم عطوها اخوكم الصغير رضاوه عشانه ما راح معنا ويتعلم زين عليها
الشاهد : هم الآن في المقناص واول يوم ويهدها على ارنب جايبها معه من الديره وتذبحها وامورها ماشيه تمام التمام ولاكنه تنقصه بعض الخبره القليله وراعي الطير الاخر يشوفه وساكت سأله خوينا وش رايك بوكريتي ؟؟؟؟؟؟؟
رد عليه ( زوينه حقت ارينب ويالله السلامه ) اخوياه استغربوا منه هذا الرد ؟؟؟ وتوقعوا منه انه يرد عليه رد زين مثلا ( ما شاء الله عليها والله زينه وهددها زين وصامله .... والخ ) وهذا الاطراء في محله حيث انها تستاهل الطيره بحقيقه
راعي الحر راحت ايامهم الخمسه الاولى وهو يدور جرر الحبارى ومالله رزقه وراعي الوكريه مع الايام علمها تهد مع السلق اعزكم الله ومستناسين اخوياه وطايرين من الفرحه وخاصه انهم مهوب اهل طيور ويشوفون هالطير يهد معهم ولا اروع وتنافس ووساعة صدر ...والخ
راعي الوكريه اذا جت الساعه 9 والاه نايم ليه؟؟؟؟؟؟ عشان يقوم قيل الفجر بساعتين ويقوم ولد عمه اللي يروي لي السالفه عشان يسون( المجرور او السحبيه او السويحبه ) عشان الارانب من زود الشفقه على الهدد اللي غامره بالفرحه والدنيا ماعاد تشيله
في اواخر ايامهم بالمقناص قامو هذاك اليوم متاخرين شوي وصلو الفجر وافطرو وجلسو يضفون عفشهم وراعي الوكريه يوم افطر قال لولد عمه بمشي على رجولي با اسبقكم للمقناص لين تجوني وراح
وهو يمشي الا وذيك الجره اللي مهيب غريبه عليه ؟؟؟؟ قد شافها ويعرفها زين !!!!! نا ضر بها الا والله اثر حبارى طبعا الولد يشوف صور واشرطة فديو لابوه واخوانه وشاف جرة الحبارى كم مره ويعرفها زين الولد من طيبة قلبه قعد عندها يحتري ولد عمه ليه تتوقعون ؟؟؟ احترام لراعي الطير اللي يكبره سننا واللي بيخلص مقناصهم وهو ما هد على شي وبالفعل جا ولد عمه وقال وين فلان قال له كالعاده راح هو واخوه يدورون لهم اثر حبارى عسى الله يجيبها لهم
قال راعي الوكريه ابشر بها والله شف جرتها ( ولد عمه ماله بالحبارى كما ذكر لي ولا قد شافها الا بالتلفزيون وما توقع ان راعي الوكريه بيجيب العلم صحيح )
قال طيب خلنا ندور راعي الطير الحر نبشره بها راسلوه بالكنود ولاكن ما من مجيب ( يمكن بعيد او ما شغل الجهز او...)
راحو يدورونه لعدة ساعات وما حصلوه ( واهل السلق اعزكم الله سيارتين وهم الثالثه حول بعض وكل شوي ها لقيتوه لا مالقيناه راح اليوم عليهم وجت الساعه 10 وهم مالقوه ) وعلى فكره راعي الطير الحر هذا طبعه يروح الحاله وبينهم وياه وعد على احداثيه ووقت معين يجتمعون عندها كل مره يروح لوحده فيها
لقوه على الاحداثيه بوقتهم اللي متفقين عليه ( والمشكله العظمى ان السافي قام عليهم قبل ما يلتقون واكيد ان اثر الحبارى بيروح مهوب بين او بيصعب التاكد منه الا ان كان من صقار مثل راعي الحر بحكم الخبره )
علمه خوينا وبطل قصتنا راعي الوكريه بالعلم اللي صار ولقاه اول الصباح ولاكن ما اعاره انتباه !!!! يمكن ماتوقعها منه والا قال صغير ما عنده علم ؟؟؟؟
راعي الوكريه قعد يتطلبه انه يجي يشوفها قاله طيب بس اذا برد الوقت وركد السافي .
وبالفعل ركد السافي الساعه3 العصر تقريا بعد ما تغدوا وبرد الوقت وراحوا لها ولاكن راعي الطير ما له نفس حتى انه ماتكلف ولانزل من سيارته وتعذر بانه اثر طير صغير والا غراب ؟؟؟
راعي الوكريه يقولي ولد عمه دمعته بغت تنزل من القهر لانه ماعبره وحسسه بانه جاهل ولا عنده علم
راحو كلهم الا راعي الوكريه عيا لا يروح ويقول لولد عمه والله انها جرت حبارى وجلس يحلف له لين زهق منه ولد عمه ( طبعا مثل ماذكرنا لكم ولد عمه ما يعرف اثرها وجلس بين نارين عدم التاكد ويبي يرضي ولد عمه ) قاله ابشر باقعد انا وياك وندورها لين المغرب وبالفعل بداو بالتدوير حتى ان ولد عمه يقول انه فاقد الامل ولاهوب متوقع ولا 1في 100 انهم بيلقون حبارى
ويوم اخذوا لهم حول ساعه الا وذيك الحبارى يوم قامت من تحت (الحاذه) شجره بريه معروفه )وراعي الوكريه الضعيف ما همه نفسه ولا توقع هالوكريه وقعد ينادي راعي الطير وما سمعوه وقاله ولد عمه جرب هالوكريه يمكن ان الله يجيبها وبالفعل هد الوكريه وطارت الحبارى ويسوقها الله باتجاه مواتر اخوياه ونزلتها الطيره قبل اخوياه بمئة متر على جيتهم وهم يشوفونها ترددها بالسما لين الولد نازل يصيح ويبشرهم من الفرحه يوم طرحتها
ذكاها الولد وقعد يعلف الوكريه منها من الفرحه اللي لا يمكن انها توصف ولسان حاله يقول ( ليتك فيه يابوي تشوفني ) وايضا ( هذا جزائك ياللي ما صدقتني ولا احترمت مشاعري البريئه )
نزلوا كل اخوياه اللي يناضر بذهول واللي اول مره يشوف حبارى وراعي الطير ( المتغطرس ) يقولي ولد عمه انه مانزل من السياره وعلى باله ان الامر عادي وانه ما اعار له انتباهه وحس بعيونه نظرت ندم وحزن ولسان حاله يقول( ياليتني سمعت كلامه ) وانتهت قصتهم بمقناصهم اللي يقولي انه لايمكن انه يتكرر عشان هالقصه المعبره
وقصيدة راعي الوكريه بهذه المناسبه
احمد الله يوم عطاني وما لااحد علي منه *** جزل العطايا على النيه عطاني
ليتك يابوي تشوف اليوم طيرتي مزنه *** اللي ارسلتها نيتك على ايدين اخواني
واليوم خل راعي الطير الحمر بحزنه *** ليته خذا الشور من فرخ ايراني ......( يقصد بالفرخ نفسه لصغره )
هذ اللي يحضرني من ابياته المعبره واعذروني على الاطاله وعسى انها ماتكون ممله وشكرا للمتابعه
هلا ومرحبا بك يا المربد
وشاكر لك مرورك وتعليقك يالغالي
وبالنسبه لمعاني الاسماء اللي طلبت استفسارها هي :
وكرية = نوع من انواع الصقور وهي تأنث بالاسم وتسمى وكريه ولا يقال لها طير انما يقال لها طيره ايضا بخلاف الحر يقال له طير وايضا الشيهانه بكل انواعها يقال لها طيره
وهي اقل مستوى من الحر والشيهانه البحريه
ومقاربه نوعا ما للشيهانه الجبليه احيانا وليس دائما
واسعارها لاتتجاوز 2000 ريال الا ماندر وهي تنفع للأرانب دائما والكراويين احيانا وليست مثل الطيور الاخرى من ناحية الارتفاع لمسافات مثل الحر او الشياهيين
حر = نوع من انواع الطيور وهو افضل الطيور اطلاقا وهو الطير اللي يعتبر بالدرجه الاولى وله انواع كثيره ومقاسات مختلفه
وهو الطير الانسب للحبارى واسعاره غاليه جدا للطيب منها والذي لون ريشته ممتازه ويكون صافي الضهر وراسه كاشف ( يعني لون ظهره واحد مافيه اي دقوق الوان اخرى )
ومن الوانه الاشقر والا حمر المجهم والاشعل والابيض والادهم والاسود وغيرها من الوان
ويوجد منه مقاسات
1ـ الوافي
2ـ اللزيز
3 ـ المثلوث
هذه الانواع المعروفه والمتداوله بين الناس تقريبا
المجرور او السحبيه او السويحبه = هذي الله يسلمك دائما يسونها اهل المقانيص اللي يقنصون للربع الخالي لان ارضها رمل وتساعدهم على رؤية الاثر بصوره سهله جدا وهي مخصصه للأرانب ولم يخترعها الا القنوص للأرانب
وطريقتها : تكون آخر الليل اي قبل الفجر بساعتان او ساعه ونصف ويمشون بالسياره لمسافة 10 كيلوا تقريبا ( يفرفرون بالسياره بخط مستقيم )
ويبدا التحرك من مكان ممساهم ويقوم بها شخص واحد فقط ( اي لاتحتاج اكثر من شخص )
ويمشي بالمناطق المفتوحه واماكن تقاطع الارانب ومكان ملاعبها والا مكان اكلها بالليل
ويكون ممشى السياره هادى جدا لكي تكون جرة السياره معروفه بين سيارتهم الاخرى
ومن ثم يرجع لاخوياه ( من طريق اخر وليس على جرته الاوله ) يعني اذا راح منهم من شمال يرجع لهم من جنوب يعني روحه وجيه على شكل دائري
واذا جا الصبح ذهبوا لجرة السياره اللي سواه خويهم ويلقون جرر الارانب اللي قطعت على جرة السياره ( يعني جرت الارنب داعسه جرة السياره )
فيعرفون ان الارنب هذي ليست ببعيده لان وقت السحبيه متاخر وهو وقت ممسى الارنب لبحثها على مكان الاختباء
ويقتفون اثرها وهو واضح جدا وخصوصا وانه بنفود حتى يصلون لها بدقائق معدوده ويقومون بصيدها يا اما بالطيور والا غيرها
وهذي الطريقه ممتعه جدا وخصوصا للأرانب لان صيده بالنهار ومتعتها بهدد الطير والا السلق ( اعزكم الله )
وصيد الليل عادة مايكون بالمناطق الجبليه الوعره اللي ماتبين فيها الجره
قصة رائعة ومشكور على هالسرد القصصي الأكثر من رائع
وما يخلو كل صقار صقر الطير وهو صغير إلا حصل له شي من هذا القبيل
وخاصة عند لقي الجرة أول مرة
وننتظر المزيد من هالسواليف المفيدة اللي تدقم روس المتغطرسين
وتقبل تحياتي
أبو محمد
المواضيع المتشابهه
سالفة صقار مبتديء وصقار مخضرم
العرض المتطور
