بسم الله الرحمن الرحيم
السلام عليكم ورحمة الله وبركاته
وبعد بتوفيق من الله ومنته منه ذهبت الجمعة الماضية لرحلة استطلع فيها جمال وابداع الخالق سبحانه بنعمه التي لا تعد ولا تحصى وكانت الرحلة خفافية وكنت متنقل من مكان لمكان ووحيد بنفس الفترة لانشغال الزملاء بظروف وتم استغلال الوقت وادرج بين يديكم مقتطفات رحلتي...
كانت اول ما اتجهت اليه بعد خروجي من الرياض ب 90 كيلو تقريبا امتداد نفود الخاتله الذي من بعده اتجه شرق باتجاه العتش ومصب وادي الشوكي على التنهاة
وكانت هناك بعض الصعوبات التي واجهتها مع الرمال والمصيبة اني لوحدي لاكن (الله الحافظ والمعين)
كل المصايب تهون ليما تجلس في الخلا وتذكر الله وتسبح وتظبط القهوة والشاهي وتشم ريحة الربيع خاصة بعد المطامر على ها النفيدات (( واستراحة محارب ))
وهذي نمونه
بعد ماتقهويت حركت الا والله المصيبه (TOYOTA) مغرز واخذت صور تجسسية عليه قبل لا نوقف عنده قلت اخاف يقول وراك تصور ثم ننحرج معه لاكن سوينا اللي علينا وكانت المشكله ان الدبل الالكتروني معلق يعني مخبط مره يشتغل مره يفصل مره يشتغل الثقيل لحاله ماشاء الله حاولت اسحبه ماقدرت طلع روح الموتر وما حركه (بس قديمك نديمك لو الجديد اغناك عطايا الله الشاص وراعيه)
بعدها توجهت نحو الشرق واتمشى يمين ويسار وكانت الوجهه الى أخر وادي الشوكي من جنوب شرق (فجأه شفت ارض صفررررراء تسر ناظرك) وجى في بالي اتصل على واحد من الربع كان توه جاي من شرق آسيا وكل سواليفه الله يسلمه عن حدائق الفراش وحدائق الزهور وقلتله وانت في شرق آسيا مامريت على حدائق القرقاص قال لالا قلت اجل لك منها نصيب الليله بسولفلك عنها وسئلني اين تقع تلك الحديقة مير من فرحتي نزلت من الموتر وهو يمشي واقفل الخط مادريت عنه واتسدح على هاك الربيع واجمع من القرقاص لحد ماصار وجهي وخشتي صفرا من كثره
(سبحان الخالق عز وجل )
بس يالربع لا تشرهون علي شي يبهج النفس ترى الصور اللي صورتها والله العالم فوق 100 صورة من الشفقة بس مالكم بالطويلة بعد توديعي للارض القرقاص وضيق الوقت اتجهت لصلاة الجمعة وكان لي هناك صدفة كان اللي يصلي امامي في المسجد والله العالم انه ابوي ابو فراس اذا مانيب واهم لان عقب كثرة القرقاص كل شي اشوفة وردة صفرا
بعدها اتجهت للحزوم منها اجمع الجنى وتونس ونصور ..
واقتطفت لكم كم صورة اتمنى تعجبكم وفيها شئ جميل وقفت عندها اتأمل خلق الله
يالله العفوا والعافية بعد ما اذن العصر صليت وتوجهت للديرة العزيزة على قلبي (عودة سدير ) اسلم على الجماعة سريع سريع ثم نحرت روضة الساحبة تكون على طريقي وانا راجع للرياض وانزلت عدتي ووسعت الصدر وتمددت على الروض الاخضر وريحة النفل تفتح نسمات خياشيمك صفاء ذهن وهواء نقي ولله الحمد وبديت في اعداد الغداء وبراد الشاهي واحتسي واسولف على نفسي ..
وبالهنا والعافيه دجاج تزدرية مع رزيزة نثرية وهذا انا محاتسيكم صورة للذكرى مع تشغيل المؤقت الذاتي للكميرة ..
وفي امان الله جميعاً
عروق الدهناء
العب لحالك ترجع راضي !!!
العرض الشجري
