خبرة صقار

[مجبور]

فى يوم من الايام جالس فى سوق الطيور وكان والدى جالس وزنى ومثل ماتعرفون سوق الطيور فية دلال يدلل على الطيور وهذا طير داش السوق وهذا طير طالع وسوق كله طيور وشياهين حتى يومها كانت فية أحبارى داخل كرتون مكشوف من فوق ومبرقعة الحبارى بعد اشوى دلل الدلال على طير بحرى وافى ولكنة ليس بالريشة الحلوة ووجه ليس باوجه الى تبية وقام الدلال يدلل عليه وسأل الدلال راعي الطير عن علوم الطير وقال الطير هداد حبارى وتعرفون ياأخوان صعب أنك أتصدق لان الغش واجد وكان راعى الطير غير معروف ومن دولة جارة لنا يعنى وين أتصيدده !!!
بدأ الدلال يدلل على الطير وبدأ السوم علية قال أبوى أنا بشترى هاطير !! استغربت لكلام أأبوى وقلت لية أشتبى فية طير مو هذاك الزود وراعية مجهول رد على مو شغلك !! سكت طبعا وبلش الوالد يساوم بالطير لين وقف الطير على قيمة متوسطة وكان السوم للوالد شاور الدلال راعى الطير وقال بيع واشترى الوالد الطير وان طبعا دايخ لية يشتريه خذينا الطير وبعد اشوى مشينا للبيت وحنا بالطريق أسولف مع أبوى وقوله طير لاهو حلو ولاهو معرفة وحين وقف الطير على يد الدلال باعة راعية على طول وشتبى فية ضحك الوالد !!
وقالى ياغشيم الطير يعرف الحبارى معرفتنا طيبة طبعا أنا تفاجئة بالهلكلام وقلت أشدراك قالى الطير هذا أوله خلوى قلت أشلون قالى الطير شفتة لخص الحبارى الموجودة بالسوق وهى رابضة داخل الكرتون وعرفها وهى رابضة وهذا الطير خلوى وطيرا زين وتشوف بعدين أنشاللة وبعد مدة يأخوان جربنا الطير وطلع الطير ووخيذة سبوق بشكل موطبيعى ولا راحت علية ولا أحبارى هد عليها وفعلا طلع اخلوى ويعرف الحبارى وهى رابضة
وملاحظة أكثر الطيور الى تعرف الحبارى رابضة الخلويات وسنتين ضاع هذا الطير من الشايب وهو يطرد حبارى ومالقيناه لليوم وهذا حال الطير ياميت وألا غادينا فى هداده بس شوف الخبرة اللى عرف بنظره ان هطير زين ويصيد وجنسه خلوى
هذا ياأخوان ليس مدح بوالدى بل الخبرة للستفادة للجميع وعدم حقران الطير بالجنس او الريشة أو الحجم
الطير البحرى كيف تعرفه
1- لايوجد فية دق فى أظهرة نهائيا
2-الذنبا لايوجد فيها دق نهائيا
3-فية مدامع أودعوج فى وجهه
يقال واللة أعلم يعيش قريب عند الانهار والبحار
وسامحونا على القصور .

[ثامرالماضي]

بسم الله الرحمن الرحيم

أخوي مجبور ...

ماشاءالله على الوالد ... عزالله إنه بخيص الله يعطيه طولة العمر ... وماحد يولد عالم ... كلها خبره وتجارب بهالدنيا ...

مشكور أخوي مجبور وماقصرت على هالسالفه الحلوه ...

وننتظر المزيد ... من كل ماهو مفيد ...

,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,

[الوافي عزام]

هلا بك يامجبور

هذا الشبل من ذاك الأسد ...

شاكر لك على هالموضوع الجميل
ومعلومات جيدة عن شيهانة البحر

الله لآ يهينك يالغالي

[مجبور]

أبوشعلان
وعمرك طويل يابوشعلان



أبومحمد...............وافى الأشبار

ماعليك زود

[عبدالكريم اليوسف]

مشاء الله تبارك الرحمن
الله يعوضكم خير يالامير
وفعلاً لابد لنا ان نتعلم من من هم اكبر منا
وكان درس جميل ونقلته لنا بجماله

لاعدمناك يالامير

اخوك

[مجبور]

كلك ذوق ياراعى الذوق

[صبحي سويلم]

عز لله الولد صقار وبيض لله وجهك

[شموخ]

بالعكس الشيبان دائما لهم نظرة صائبة من معرفتهم وخبرتهم


طيب اخوي مجبور وش معنى خلوى طير خلوى ويعرف للحبارى كيف يعني ممكن توضح ؟

[مجبور]

المشاركة الأصلية كتبت بواسطة فارسة العتيبي

بالعكس الشيبان دائما لهم نظرة صائبة من معرفتهم وخبرتهم


طيب اخوي مجبور وش معنى خلوى طير خلوى ويعرف للحبارى كيف يعني ممكن توضح ؟

شاكر مرورج وبخصوص الطير الخلوى أى الذى له أكثر من سنه فى الخلاء و لم يطرح من قبل الطواريح او الصيادين وهذا الطير يعرف الصيد بحكم خبرة والعتماد على صيدة بيده بالخلاء .

ويقول الشاعر


الفرخ لايغرك فى صفت الريش
طير الحبارى يريش العين قرناس