إذا موترك يوكون وتواجه هالمشكلة ..حلها عندي

[هزيم الرعد]

سلام عليكم
مساء الخيرات عليكم جميعا يالله حيهم يالله حيهم
بدون ما أطول عليكم ...
اليوكون ..الموتر الذي لايقهر << بدت الدعايات ..
نرجع لمحور حديثنا << أنت بدت عشان ترجع
اليوكون ياجماعة الله يسلمكم من كل شر ... خصوصا من الموديل 2000 حتى تقريبا 2003 منب متأكد
لكن المقصود هي الموديلات اللي فيها سنتر مسج على اليسار مربع ....
وش به هالنوع طيب ؟
أنا أقول لكم ... هالموديلات ...لما يمشي 5000 كم ... تظهر لك رسالة تقول لك غير الزيت ...مع إنه إحتمال تكون توك مغيره ...
وهذي هي الرسالة


طيب وش لون تطلع الرسالة رغم إني توي مغير الزيت ؟
أنا أقو لك ...الموتر ما يدري هو أنت مغير الزيت أو لا .. والله لو إنه يوكون 3007 م
الموتر مجرد انه يمشي 5000 كم بعد الفرمتة راح تظهر لك الرسالة حتى و انك مامشيت بالزيت إلا متر وربع
طيب وش لون اسوي للموتر فورمات عشان تروح هالرسالة ؟
كل ماعليك هو تطبيق الخطوات التالية
1-الدعس على دواسة البانزين 3 مرات
2- وضع المفتاح مكان التشغيل وتشغيل السوتش فقط " إضاءة أنوار الطبلون" دون تشغيل السيارة والدعس 3 مرات على دواسة البانزين
3- إخراج المفتاح والضغط على الريموت بشكل متتالي على lock & un lock
4- تكرار الخطوة رقم 3 مرة آخرى
.
.
بعدها ماراح تظهر لك رسالة تغيير الزيت إلا بعد 5000 كم
بالنسبة للضغط على الريموت بالشكل المتتالي يكون على اليونلوك بعدين لوك يعني لاتاخذون حساب إختلاف ترتيب الكلمات الإنجليزية لأني أخذته بالحساب
وإن شاء الله أكون قدمت مايفيد
أخوكم هزيم الرعد .... من المهجر .... اليونان ...العاصمة أثينا ... شارع البحتري ....مقابل محل كل شي بريالين للإتشاءات المعمارية والمقاولات وإستخراج رخص العمل ورخص العطل

[الباشق]

مشكور أخوي (هزيم الرعد) ..

تقبل مروري ..

[باترول 4×4]

يعطيك العافية
أعتقد هذه الطريقة تعتبر برمجة ياليت تفيدنا ، يعني هل هي متوقفة على هذه اللمبة إذا اشتغلت أم أنها تستعمل لأشياء أخرى .

[عبدالكريم اليوسف]

الغالي
اثرك منتب سهل يالامير
عساك على القوة
اخوك

[سحمان السبيعي]

شكرا لك اخي هزيم الرعد على هذه المعلومة فعلا كنا راكبين مع واحد ما الشباب و طلعت الرسلة وانقهر مسكين بس باذن الله بارسله هذا الموضوع حتى يتعلم بارك الله فيك.

[يعقوب الوهيب]

الف شكر لك على هالملاحظة
ما عندك حل لطرمبة البنزين ؟

[هزيم الرعد]

المشاركة الأصلية كتبت بواسطة الباشق

مشكور أخوي (هزيم الرعد) ..

تقبل مروري ..

حياك الله يالباشق ...وشرفتنا

[هزيم الرعد]

المشاركة الأصلية كتبت بواسطة باترول 4×4

يعطيك العافية
أعتقد هذه الطريقة تعتبر برمجة ياليت تفيدنا ، يعني هل هي متوقفة على هذه اللمبة إذا اشتغلت أم أنها تستعمل لأشياء أخرى .

أخوي باترول ...الطريقة هذي علمني عليها مسؤول صيانة فلبيني عند الجميح قبل تقريبا سنتين أو ثلاث
وانا من خلال 6 سنوات من مخاواة هالذيب << أنت يايوكوني
مالاحظت إن فيه أي مسج ممكن أسنخدم معه هالطريقة
وربي محييك

[هزيم الرعد]

المشاركة الأصلية كتبت بواسطة راعي الذوق

الغالي

اثرك منتب سهل يالامير
عساك على القوة

اخوك

ماشفت شي ياراعي الذوق ... هذا وأنا يقال لي بعد مستحي منكم ولاحجيت هالسنة
<< وش عنده هالشايب اللي مزاحمن الحجاج كل سنة يجح
الله يسلمك وهلابك والله يقويك

[هزيم الرعد]

المشاركة الأصلية كتبت بواسطة كان

شكرا لك اخي هزيم الرعد على هذه المعلومة فعلا كنا راكبين مع واحد ما الشباب و طلعت الرسلة وانقهر مسكين بس باذن الله بارسله هذا الموضوع حتى يتعلم بارك الله فيك.

الله يحييك أخوي كان ....وقل لخويك الحلاوة يرسله على الإيميل

[هزيم الرعد]

المشاركة الأصلية كتبت بواسطة المربد

الف شكر لك على هالملاحظة
ما عندك حل لطرمبة البنزين ؟

الطرمبة وما أدراك مالطرمبة ...موتري مريت معه بتجربة مع الطرمبة ...كنت وأنا ماشي بالطرق بين المحافظات والمدن من أدري إلا ويطفى من روحه .. ألبق على جنب ..أشغل ..يشتغل ولا كأن به شي
ويوم من الأيام زادت هالحالة وصارت لي 5 مرات مابين بريدة والرس ...بالأخير وديته ورشة القافلة ببريدة وهي ورشة مشهورة .. صلحوه قالوا لي بوسط التانكي ومدري إيش ...قلت بكم قال بـ 250
قلت دوكم ...
وأطلع من عندهم ...وبالطريق طفى علي
جيت الرس ووديته ورشة اللزام ..قالوا لي طرمبة بنزين ..
طيب بكم
بـ 1000 ريال " كاني منب واهم "
ركبتها والحمد لله عال العال
مع إني من النوع اللي يحرص إن مؤشر البانزين ماينزل عن الربع أبدا
المشكلة إن الطرمبة ما يصلح تأخذها من تشليح ...لأنها من الأمور اللي تستهلك مع الوقت يعني مهيب مثلا صدام أو رفرف أو لمبة
وهلابك وكان الله بعونك ...

[محمد المعارك]

أخوكم هزيم الرعد .... من المهجر .... اليونان ...العاصمة أثينا ... شارع البحتري ....مقابل محل كل شي بريالين للإتشاءات المعمارية والمقاولات وإستخراج رخص العمل ورخص العطل

كان هذا عنوانك ياهزيم الرعد .... لو عندي يوكن والله ما اوثق .. الا بشهادة محل كل شيء بريالين.

[الزينون]

اذكر معي يوكن


ما كنت أحاتج لضغط الريموت لبرمجة لمبة الزيت


وبالنسبة للطرمة لتحافظ عليها تجنب الآتي

لا تعبي بنزين أخضررررررررررررررر فهو العدو الأول للطرمبة


لا تبقي السيارة شغالة أثناء التعبئة وراااااااااااااااااااااااح تحافظ على الطرمبة



ولتتأكد من تاثير البنزين الأخضر على موترك الي معه يوكن دينالي او جمس يلاحظ كيف الكمبيوتر يلخبط في حساب كمية الوقود والمسافة بعد التعبئة بأخضر حتى لو رجعت تعبيه أحمر ما ترجع البرمجة

[عمار السفينه]

وعليكم السلام

هلا بالغالي هزيم الرعد

اي ولله ماقصرت بس عساها تنفع ل 2005

المشاركة الأصلية كتبت بواسطة الزينون

لا تعبي بنزين أخضررررررررررررررر فهو العدو الأول للطرمبة
ولتتأكد من تاثير البنزين الأخضر على موترك الي معه يوكن دينالي او جمس يلاحظ كيف الكمبيوتر يلخبط في حساب كمية الوقود والمسافة بعد التعبئة بأخضر حتى لو رجعت تعبيه أحمر ما ترجع البرمجة

بس يالحبيب الزينون الكتلوج والوكاله وأرامكوا يقولون عب من 91 (أخضر) !!

[Amer-911]

أخي الحبيب لدي يوكن 2001 استخدام امريكي وعندما تضهر الرسالة أعرف ان الزيت منتهي واغير الزيت واصفر العداد ولا تظهر الا اذا مرت مدة عليه من يوم صفرته .. ولكن تظهر لدي لمبة ترجمتها صيانة المحرك قريباً service engine soon هل لديك خلفية فيها علماً أني طفيتها بالكمبيوتر ولكن ظهرت مرة اخرى ...

أشكرك على طرحك لهذه المعلومات القيمة ..