سؤال بخصوص الونش للهايلوكس 2008 لا هنتم

[أبوخالد التويجري]

السلام عليكم ورحمة الله وبركاته



أخواني أنا معي هالموتر اللي بالتوقيع وسمعت إن فيه ورشة ترهم ونوش ما أدري هل عند أحد علم بها أو عنده فكرة مجربة مع الونش في الهايلوكس أتمنى تفيدوني بارك الله فيكم





نوماس سدير

[عمار السفينه]

وعليكم السلام ورحمة الله وبركاته

هلا بالغالي

ولله الونش على الهايلوكس زين و شين

الزين معروف استخدامه عند الحاجة

لكن الشين

عدة أمور

اولها انه يبي يطيح وجه السيارة

ثانيها انه مايجي مخفي في الهايلكس لازم يرهمون له قاعدة خارجية

مشكلتها تشوه وجه الموتر , وترد الهواء من الدخول للمكينة , وتزيد في الوزن أيضاً

لذلك نصيحة لاتركب ونش واستخدم بداله وسائل أخرى مثل (( البالون , العفريته الطويله , الصيجان ))

والله لايوريك شر ولا مكروه

والعذر والسموحة على الاطالة

أخوك

أبوعبدالله

[روافد]

حياك الله اخوي

واضيف على كلام اخوي عمار السفينه انك ستواجه مشكله الكهرباء لان الونش يحتاج الى كمية كهرباء كبيره قد لاتستطيع المكينة مساعده الدينمو على توفيرها

كما لاتنسى ان وزن الهايلوكس قليل وبهذا قد لان يساعدك في سحب اي سيارة وسيكون الونش عبء عليك وكذلك الشاصي يعتبر ضعيف مقاربة بالجيوب التي يمكن تركيب ونش عليها واخشى ان يتمدد ان ينكسر اذا قمت بسحب اي سياره .

مع التحية اخوي

[Abdullah K. AL-Hassan]

وعليكم السلام ورحمة الله وبركاته

الغالي نوماس سدير

حقيقة الأخوان ماقصروا جزاهم الله خير

ومثل ماقال أخونا عمار السفينة.. هناك بدائل

فلاتستعجل ...

تقبل مروري

أخوكمـ عبدالله

[أبوخالد التويجري]

أخوي عمار السفينة , روافد , a.k.h



لا هنتم وبيض الله وجيهكم وكلامكم على متمة لكن فيه ونوش خفيفة وأذكر إن عند الرميح ونش صيني ( يعتبر فك أزمة ) لا قدر الله ويسحب طنين ومتين بس عيبه وهو ميزة أيضاً إنه ما يثبت ... يعني متنقل ... ولآزم يكون مثبت في مكان معين بالسيارة عند الحاجة له

وهذا فقط اللي مخليني اتردد مع ضعف جودته


وكان سؤالي فقط إذا كان فيه شي خفيف ويفك ازمة ولا يشوه كثير يكون حلو






لأني وما أخفيكم فكرت اخذ لي صدام مقصوص مثل بعض الشباب وأروح للنويصر ولا بن مرضاح وأخليهم يدعمونها ويرتبون مكان للونش فوق العارض السفلي اللي يجي مع الهايلوكسات التاليات



هذي كانت فكرتي والحمدلله مانيب حاجته إلا لا قدر الله وكبيت العشاء أو في الطين وأخواتها




عموماً ... لا هنتم جميعاً ع الإفادة والنصيحة الطيبة





نوماس سدير

[عبدالرحمن الدرويش]

نوماس سدير.. هلا بك

حقيقة أنا مالي تجربة مع الونش ولا أقدر أفيدك عنه لكن لي ملاحظة بسيطة الهايلوكس يتميز بخفته وقوة عزمه والإخوة الكرام ما قصروا بينوا لك السلبيات اللي من الممكن ان تواجهك عند تركيب الونش لكن عمار السفينة وضح لك بدائل وتنفعك منها البالون ومنها الصاجات أما البالون فتحصله عند الرماية مكلف لكن ممتاز جداً ويعتمد بانتفاخه على الهواء الخارج من عادم السيارة ويفيدك بأمور كثيرة بالذات عند الرغبة بتغيير الكفرات في حال وجود بنشر او انسلاخ الكفر عن الجنط أما الصاجات فهذه يمكن تفصيلها في إحدى الورشتين (المميز/المواهب) وتفيدك في الخروج من السبخات والهلاش.

وهذه مجموعة صور..

طبعاً الصاجات فكرتها نفس الشيء لكن الشكل غير واللي موجوده بالصورة مكلفة جداً.

فأنصحك بالتوجه للبدائل منها توفر على نفسك مادياً ومنها تضمن الأداء وكان الله بعونك..
أخوك.. أبو فهد

[أبوخالد التويجري]

المشاركة الأصلية كتبت بواسطة ع.ف.الدرويش

نوماس سدير.. هلا بك

حقيقة أنا مالي تجربة مع الونش ولا أقدر أفيدك عنه لكن لي ملاحظة بسيطة الهايلوكس يتميز بخفته وقوة عزمه والإخوة الكرام ما قصروا بينوا لك السلبيات اللي من الممكن ان تواجهك عند تركيب الونش لكن عمار السفينة وضح لك بدائل وتنفعك منها البالون ومنها الصاجات أما البالون فتحصله عند الرماية مكلف لكن ممتاز جداً ويعتمد بانتفاخه على الهواء الخارج من عادم السيارة ويفيدك بأمور كثيرة بالذات عند الرغبة بتغيير الكفرات في حال وجود بنشر او انسلاخ الكفر عن الجنط أما الصاجات فهذه يمكن تفصيلها في إحدى الورشتين (المميز/المواهب) وتفيدك في الخروج من السبخات والهلاش.

وهذه مجموعة صور..

طبعاً الصاجات فكرتها نفس الشيء لكن الشكل غير واللي موجوده بالصورة مكلفة جداً.

فأنصحك بالتوجه للبدائل منها توفر على نفسك مادياً ومنها تضمن الأداء وكان الله بعونك..

أخوك.. أبو فهد

صدقت يالغالي ابوفهد ولا هنت والله ع الرد الوافي ويبدو لي إن فكرة البلونه أفضل بحكم وجود مسطح مستوي تحت صندوق الموتر ( تانكي الماء ) والله يجزاكم الجنة ولا خلا ولا عدم




نوماس سدير

[Microsoft]

طيب ممكن أدخل الشارع عرض.!!

وين ممكن أحصل مثل هالصورة



سمعت إن فيه مثلها لكن تتميز بأنها تتصفقط أو تنطوي شيء من هالقبيل

وين ممكن أحصله .. طبعاً حبيبنا نوماس يعرف ليش << من زين السواقة