المراوح الكهربائية (موضوع مهم)

[عبدالرحمن الدرويش]

السلام عليكم ورحمة الله وبركاته

الإخوة الكرام.. مشكلة تواجه الكثير منّا في سيارته.. وتحديداً في فئة الدفع الرباعي بإختلاف أنواعها.. هذه المشكلة تتمثل بالصوت المزعج للمحرك ، والضعف العام عند اللزوم وبالتالي ضياع العزم ، وإرتفاع الحرارة بشكل غير طبيعي (بالذات في أجوائنا الجميلة) تستدعي هذه المشكلة إستبدال المروحة الميكانيكية بأخرى كهربائية وأحياناً إثنيتن ونلاحظ كثرة الأنواع وبالتالي إختلاف المزايا والعيوب فسمعنا عن مروحة الفورد ومشكلة سحب الكهرباء ومروحة السوبارو وميزة تنوع الحجم وقلة التكلفة ومروحة المكسيما بكثرة تعطلها وأخيراً مروحة الجراند شيروكي بإرتفاع سعرها وأحياناً حسن أدائها.. فالتساؤل (هنا) والآن عن مدى جودة هذه العمليـة.. فهل هي ذات فائدة ملحوظة.. وهل لها أضرار.. شاركوني بآرائكم (فضلاً) ولكم كل الشكر والتقدير..@@

ملاحظة لمن جربها.. أرجو أن يتم ذكر مدة الإستخدام..!!

أخوكم.. أبو فهــد..

[أبوأحمد98]

حياكـ الله (أبوفهد)
بالنسبة لمراوح الكهرب انا جربته على هايلكس لمدة سنه ونص قسم بالله علاج رهيب فعلا فيه فرق واضح من عدة نواحي الصوت وصرف البنزين ونشاط الموتر ياخي صوت المروحه يطربك هاذي تكفي
نوع المروحه سوبارو ثنتين وسط على مااظن ركبتهن عند الكهربائي السعودي المعروف عبدالرحمن الدغيري
ومشكور ابوفهد على طرح الموضوع اتمنا الفايدة للجميع

[عبدالرحمن الدرويش]

أبو أحمد 98.. ما شاء الله تبارك
حضورك جميل.. ومن ناحية المراوح فالبشر فريقين الأول يثني عليها وينصح بها والثاني يحذر منها وهنا يحتار الواحد لأي فريق ينضم
لكن لدي سؤال.. المبروك اللي بالصورة (الله يطعمك خيره ويكفيك شره) ركبت له مراوح او لا..؟

شكراً لك.. أبو فهد

[محمد المعارك]

هلا ابو فهد

موتري باترول صالون ديزل ( تيربو)

أنا اشتريت مراوح سوبارو ( غير متأكد ) ونويت اركبهن واخذتهن للكهربائي السعودي محمد العثيم ببريدة وأخبرني أن البطارية لن تتحمل ورجعتهن.

أرجو أن أكون أفدتكم.

[عبدالرحمن الدرويش]

الأخ الكريم صقر.. بداية حياك الله

يليه اعتقد كل سيارات الديزل كهربها دائماً ضعيف
وغير كذا ما تحتاج مراوح كهربائية
لأنها ما شاء ما تعطيك أفضل أداء إلا نوعاً ما لما ترتفع حرارتها شوي (والله أعلم)
الديزل بارد علّة ومشكلة

أخوك .. أبو فهـد

[ابو لافي]

السلام عليكم

انا جربت مراوح السوبارو على جيب شروكي مده سنتين ولا قد اشتكيت منها

ومن فوائدها قله صرف البنزين وتقليل واضح من ارتفاع الحراره (للشروكي)

وزياده العزم بشكل واضح وترتاح من صوت مروحه المكينه المزعجه ....

هذا الي جربته وامل اني وصلت المعلومه...

ولك جزيل الشكر....

[راعي الهدد]

يوووووووووووووه يووووووووووه

موضوع طويل عريض ...

المراوح الكثير جربها ... ومنهم من يرفضها بتاتاً ...

انا كنت باركبها على الربع الي عندي الباترول ...

ولكن المهندس فوزان نصحني ما اركبها ...

وقال لي كلام منطقي وعقلاني وهو يقول عن تجربه صارت له ...

يقول ان الموتر اذا احميت عليه بالدعس خصوصاً في النفود ...

فالمروحه لها سرعة قصوى تتوقف عندها ...

لكن الموتر موآصل السرعه ... مما يتطلب من المروحة زيادة لف ودوران لكنها تقف عاجزه خلاص هذه نهايتها ....

فبالتالي يحتر الموتر ويسخن خصوصاً في النفود ... ومع الدعس المتوآصل ...

اخونا فوزان يقول صارت له مع ربع سخن وتأثر الرآس يقول وغيرت الرآس ولانفع صارت الحرارة مبتله فيه ...

يقول الين بعته وافتكيت منه ...

فالمروحة والله مخيفه ... وشغل اليابان ترى ماهو هين ....

انا عن رأيي مانيب مركبها ابد ... والسلامة مايعدلها شي ...

شاكر لك هالموضوع الحواري الطيب ...

محبك ابو حمد ...

[ابو ســــاره]

سمعت عنها من فترة وقررت اركبها رحت لم كذا كهرباء وما اعجبنى شغل مراوح السوبارو اخر حل توصلت له
1- رحت لم التقوى وشريت منهم مروحة فرد جديده مع الهواية تجي بحدود 400 ريال تجي سرعتين
2- بعدين فصلت قاعدة ماسكه في صدر المكينة وتمسك المروحة من عند الدينمو يعنى الي يشوفها كنها
مروحة ميكنيكة .
3- بعدين فصلت عند حقين الديترات قطعة معدنية يتم تركيبها في الخرطوش حق موية الديتر ويثبت فيه حساسات الحرارة
3- بعدين رحت لم كهربائي طيب بالحيل وصفه لي احد الاخوان في السويدي شايب فلبيني شغله نظيف بالحيل لو ما يجيك منه الا انه يلحم الاسلاك بالكتاوت تلحيم اظمن من المشكوبيات الي تنفصل .

الشاهد من هذا كله ان السيارة خفة بشكل كبير و ما عاد فيه حنة وسافرت عليها خطوط طويلة منها خط ابها والامارات مريحة ولا شفت منها اي مشاكل لمدة ثلاث سنوات ومن ناحية النفود ما شفت منها شي مع اني مناب راعي مطاعس بس قطعت نفد الثوير مره وطلعت على جراب وما ارتفت الحرارة ولاشي .
السيارة كانت باثفيندر مديل 2000

[أبوأحمد98]

أبوفهد
الله يباركـ بايامكـ
بالنسبة للباترول نويت اركب مراوح ورحت لرفيقنا الكهربائي الدغيري وقال ماانصحك تركب قلت ليش.؟!!
قال عندك الاديتر كبير وجاي بالطوول مهب مثل الباترول الي قبله جااي بالعرض يقول تبي تروح الحنه لكن يقول يمكن الحراره ترتفع شوي بعني على الربع او اقل
قلت خلنا على مهبولنا لايجينا اهبل منه

[مريقب العيفار]

حياك اخونا ع. الدرويش

انا ركبت مراوح لومينا على جيب لاند كروزر

والصراحة ما شفت فرق

لا عزم ولا توفير بنزين

اذا مسكت خط طويل بالشمس الحرارة تعدى الربع وأول ما كانت تاصل الربع

والصراحة أظن اني برجع شد البلد لأني خاطري ما ارتاح

كل ما سافرت خفت لا تخرب علي

[سيد النشاما]

مامثل شد البلد يالربع

ولامانع من تركيب مروحة تبريد صغيرة إذا كانت إضافية (( في الوسط ................. بين الشبك والراديتر ))

[حامد الغامدي]

الواقع كنت اود الرد بالتفصيل عن هذا الموضوع ولكن مشغول، لكن باختصار:
سمعت من واحد ميكانيكي جيوب شيروكي يقول انها تأثر على البطاريه بسحب الكهرباء، وان شاء الله ارد عليكم بالتفصيل، شكرا على هذا الموضوع الهام.

[الصمت]

في عنيزة .......
رأيتها مركبة على جيب شاص من الجدد يمدحها راعيها
و ما شاء الله تركيبها رائع كأنها من بلدها
و مركبة مروحتين سوبارو على vxr موديل 2005 و يقول أيضا ممتازة جدا
===========================
و لكن ...!!! لإخلاء المسؤولية : يقول لي واحد يفهم في الكهرباء
ان هذه المراوح غير آمنة لسببين :

1- تتعطل فجأة بسبب عدم جودة ( الحساسات ) المصاحبة لها
2- كونها ملاصقه للراديتر حيث تؤثر عليه عند عدم
وجود دعامة قوية و التعرض لصدمة بسيطة لا قدر الله

[جيب النفود]

:

كل اللي جربوها على السيارات التاليه : باثفندر , هايلوكس , شروكي , جيب ربع , شاص

يمدحونها مره ويقولون تقلل صرفية البنزين وتخفف على الموتر بدال مايكون ثقيل

وهاذي أنا شفته بعيني .. مع أخوي باثفندر له الحين تقريباً سنتين وزود .. وماشاء الله ماشيه معه زي الحلاوه

وبعدها تحمست أني أركبها على جيب لاندكروزر ..

لكني تفاجئت بأنه على اللاند كروزر ماتصلح نهائياً وأيضاً الباترول الـ 4800 ..

أنا ويا راعي باترول رايحين مركبين سوى .. والحين فاكينه سوى ..

الحق ينقال ماتنفع على هالسيارتين ... أبد

يعني مافرقت معي لا خفه ولاصرفية بنزين ولانشاط ولاشي مغير خسارة فلوس

لكن على اللي قلت لك بالبدايه .. ممتازه جدأ جداً .. وأولهم أخوي وكثير من أخوياي .. ولاإشتكوا منها نهائياً

سلبياتها بشكل عام :

مع المطامر الشين والجلعده قد إن الأسلاك تحتر أو الكتاوت يجيه شي ... وأنت بالنفود مالمك أحد .. وتطفى

وصارت لي كم مره .. لكن الحمدلله كان معي أخوياي .. وجبنا له كتاوت وركبناه ..

طبعاً قلت لك ماتطفى منا والطريق .. لكن مع المطامر قد تتحرك .. لكن تمشي بدربك مظبوط لاتخاف منه ..

أخيراً بالنسبه للموضوع بيع المراوح .. قد إنها تركب على موتر ثاني غير اللاند كروزر .. الله أعلم

طيرت سوقنا الله يهديك
شكرا لكم

[مريقب العيفار]

اذاً كلام الاخ جيب النفود نفس الكلام اللي انا ذكرته

وكلانا ينطلق من تجربة

وانا الحين ناوي على فكة المراوح الكهرب واعادة الشد بلد