مشكلة الدبل ....

[اكليل الجبل]

السلام عليكم ورحمة الله وبركاتة

وكل عام وجميع الأعضاء بخير وصحة وسلامة واعادة الله علينا وعليكم باليمن والبركات ..

اخواني مابطول عليكم اليوم كنا كاشتين وطعست بالجيب طبعاً ربع باترول 99 ولما شبكت الدبل تفاجأت باصوت في الدبل زي الطق طق في الدبل الثقيل والخفيف والصوت قوي بالحيل وغريب يعني تقول حديد يطق بحديد .. مادري كيف اوصف لكم المهم اللي عندة خلفية لايبخل علينا الله يعطيكم العافية . والى اللقاء .

[محمد المعارك]

اذا كان الموتر سفاري فهو جنزير الدبل.. والله أعلم

[ابوخالد454]

السلام عليكم ورحمة الله وبركاته
اخوي كلام
صقر 100%
لاناها صارت مع واحد من اخوياي والصوت طقطقه متتاليه ططق طق ططق على طول اذا شبك الدبل والصوت كنه تحس شي يطق حديد بحديد
بس ضبطه عند واحد ماهر بالشغله
وذا بغيتني استفسر لك عند الشباب انا جاهز

[اكليل الجبل]

مشكور اخوي صقر على التواصل والله لايهينك

والشكر لك اخي ابو خالد . وبالفعل الصوت صوت جنزير لان اخوي عندة خبرة بسيطة وقال نفس الحكي . بس ماعندي خلفية عن الجنزير اقصد وين موقعة بالظبط وكم يكلف وكيف طريقة تركيبة . لاني اذا رحت للميكانيكي ابتفلسف علية عشان مايحس اني (فاغر) ههههههههه من جد والله مافية انصب من الورش . طبعاً بحكم خبرتي معاهم .
وياليت اذا احد يخبر لي ميكانيكي فاهم بتبوك يدلني علية .

والله يعطيكم العافية .

[محمد المعارك]

تبوك شخصياً ما اعرف فيها شيء وتمنيت اني أفيدك
لكن بالتأكيد ان هناك ورش متخصصة في السفاري وهذي الشغلة عندهم ماهي صعبة وما تكلف واجد .

وأتمنى لك التوفيق على كل حال.

[ابوخالد454]

سلام عليكم اخوي بندر
خويي طلع الخراب عنده ترس القير مع الجنزير والرجال فاهم فالموضوع
وقال خله يروح يم ميكانيكي شغله ممتاز ينزل القير ويفتحه وعلى طول يبين ان
كانه الجنزير والا الترس لاكنها غير مكلفه الا اذا شريت جديد . قال سألت سعر الجنزير بالوكاله ب900
بس الرجل راح يم التشاليح عندنا بالرياض لواحد يعرفه وضبطله القير بالقطع
ب800 ريال وعليه ضمان
وأي استفسار اخوي بندر انا نخدمك..

[البجلي]

ياهلا ومسهلا ابو عبدالعزيز
الحمدلله على السلامه
ماقصروا الشباب بيض الله وجيههم بالطيب والخير
ونا مندوبك بالرياض اي خدمه من التشليح والا الوكالات ولا محلات القطع
ابد اتصل وابشر

تقبل تقديري

[اكليل الجبل]

بارك الله في الجميع وكفيتو ووفيتو والله لايهينكم يالربع .

واشكرك اخي ابو فهد وماقصرت يالذيب وخيرك سابك والله لايهينك .

وانا الحين والله مافضيت للجيب ابتركة الى الشهر الجاي لاني مشغول والله وربنا يجيب اللي فية الخير ومادام السالفة جنزير هينه والله الحمد نطق واحد جديد ونزينة ونزهبة للربيع الجاي ان شاء الله تعالى ..( ياني اتحرى الربيع على احر من الجمر ) هههههههههه . حلوة هاه .... استخفيت ..