لايفوووووتك × لايفوووووتك ... شي خيااااال × خيااااال .. مع محبكم راعي الهـــــدد

[راعي الهدد]

بسم الله الرحمن الرحيم

حيا الله قرووووم منتديات الرحلات

هلا بالغالين

الوقت والجهد والصحة والنضر وتعب الأصابع وبحلقت العيون في الشاشة

فدوة لكم يا أحبتي

بعد تحقيق طويل عريض عن الدلال

وجدنا ان افضلها وأنسبها وأقواها وأمتنها وأزينها وبلا مبالغة
هي

دلةً حلوووة

دلةً زيييينه

دلةً مافيها عذروب ابد ابد

لاتــصـــدي

ولا تـــهــجـــر

ولا يــتـغـيـــر لـــونـــهــا

ومآخذه زين البغدادية وجودة الستيل في نفس الوقت وش رايكم

الا وهي دلة العساف المزيوووونة

قد تقولون مستحيل مايصير ابد يابو حمد كيف كل هالصفات في دلة وحده

اقول لكم الصور خير برهان

ولو شاهدتها على الطبيعة لما غادرت مكانك الا وهي معك

وللمعلومية انا كنت اشرب فيها منذ زمن من اكثر من اربع سنين او اكثر اذا سيرت على جدتي الله يحفظها

واشوف هاالدلة ومتزاينها مرة ولكن مالله انطقني اقول وش هالدلة ولافكرت اقلبها واشوف قفاها وش ختمها

المهم لا أطول عليكم

ذهبت اليوم في رحلتٍ استطلاعية

وقلبت سوق السبالة وسألت عنها وعجزت اجد جواب الين سخر الله لي محل ولقيتها عنده

قد يقول البعض ليش مالقيتها بسهولة ...؟؟؟

وليش ما أحد جاوبك ....؟؟؟

اقول لاتستعجل والصور تبين لك

تعال معي لاهنت ياراس الرجاجيل لاهنت

الصورة الأولى

هذا طرف من سوق السبالة الشارع الي يروح يمين اول ماتدخل شارع السبالة



الصورة الثانية

وهذي المزيونة بسم الله ماشاء الله ماشاء الله عليها

خصر يحبه قلبك هههه

وقاعتها وسيعة

ومعروف الدلة اذا صار بطنها كبير او قاعها كبير أنها تشتمل على فوائد من الفوائد اقولها باختصار تبقى قهوتك حارة اطول من غيرها وتكون راسية يوم تحطها على الملة او مكان رمل او غيره ومنضر أجمل وهو مانشاهده في هذي او البغدادية كذلك





الصورة الثالثة

هذي احد الفروقات الي تميز بها دلة العساف يوجد في ممر المثعاب حديدة على طوله والصورة واضحة جدا شف الحديدة الي مايلة مع المثعاب الين الأخير



الصورة الرابعة

يوجد من دلة العساف لونين الذهبي والفضي وكلها ستيل من نوعية فاخرة وصحية 8/18




الصورة الخامسة

طقم من دلة العساف لون ذهبي يالله فتنة فتنة

عز الله أن الدلال ورزتها في المجلس وصبتها للرجال عز وأي عز




الصورة السادسة

هذه أحد الفروقات التي تميز بها دلة العساف الختم في اسفل الدلة او في قاعتها من برى



الصورة السابعة

هذا الختم نفسه بس بصورة مقربة أكثر




الصورة الثامنة

كرت مصنع العساف في حايل الصناعة كورية ولكن وكيلها في حايل وتوقف عن التوريد لم يعد يورد كمثل اول تقول لي ليش اجاوبك نهاية التقرير تابع معي





طبعاً يا أخوان الدلة لم يعد يوردها العساف

هذا يا أخوان على حسب علمي وعلى حسب مارأيته بعيني

فمن يريد يصدق يصدق او يجيب لنا دليل بخلاف كلامي

عبدالعزيز محمد العساف يقال انه شايب من أهل حايل وهذا مايبي نشدة لأنه حاط وكالته هناك في حايل مثل ماتشوفون في الكرت

المهم توفي الشايب رحمه الله

واختلف ابنائه من بعد وفاته رحمه الله على اموال والدهم او شيء من ذلك وتوقف المصنع عن توريد هذه الدلة من كوريا

عموماً أنا لم اصدق ولكن ذهبت لفرعهم الي كان في السبالة اول ماتدخل شارع السبالة تخش في اول ملف يجيك يمين وفيه محلات اواني هاه انتبه فيه محلات اواني لف معه يجيك هناك في صفت المحلات

المهم رحت بناء على وصف أحد الأخوة في المنتدى وعلى الرابط حق الأستفتاء الي كتبته وهو رابطه عندكم فوق اول هذا الموضوع

المهم رحت هناك وسالت وقالوا من متى يابوي انت وين عايش سكر من زمان

وبدأت اسأل اهل المحلات من زود الحرص

وأجاب البعض بما قلت لكم بعاليه من أنهم مختلفين الأبناء او شيء من ذلك

فصدقت ذلك لماذا صدقت ..؟؟

لأن الدلة لم تعد موجودة في السوق مثل اول

بل درت في السبالة كلها ماوجدتها الا في محلين فقط وبعدد حبتين أو ثلاث وكذلك طقم واحد ذهبي بس

ودرت في سوق بن دايل كله ماوجدتها الا عند محل واحد فقط ودابل سعرها وقالوا كلهم بأنها لم تعد تأتي المهم روحو لقطو الباقي تراني اشور بها

ماهوب بكره انزل موضوع عن طلعة او مقناص وتشوفون الدلة مرتزة على النار تقولون من وين ... هههه

يتبع >>>>

[راعي الهدد]

دخلت على موقع العساف الأكتروني

http://www.alassaf.net/index.htm

ووجدت انه يعمل

عموماًوجدت في موقعه صور لمنتجاتهم وهاكم بعض صورها
الصورة الأولى يسميها بغدادية العساف طبعا ستيل من نوع 8/18






والصورة الثانية

نفس الأولى بس فضيه





والصورة الثالثة

نفس الدلة الي عرضتها لكم بالضبط ويسميها

الدلة الأصلية
وهذ صورة حلوووة يسميها بغدادية العساف






تحققت من الموضوع اكثر الي هو موضوع توقف التوريد

واتصلت بوكالتهم في حايل

وقالوا لي صحيح ماقلت من انه مسكر الفرع الي في الرياض من اجل خلافات بسيطة


بس مازلنا نوردها من كوريا

ويجي الموزع للرياض بأذن الله يوزع

قلت عطني رقم الموزع

وهذا هو الرقم
0506170707
بسعر الجملة سعر لايصدق ابد

يعني الدلة الوسط محصلها في السبالة وحبة وحده بس بــ 140

وعنده اقل بكثير مرة

[ابو فراس]

فعلا دلة مميزة وتريح البال

ارتحنا من تغيير الدلال من بعد ما شرينا هالدلة الرائعة

اخي راعي الهدد شكرنا الجزيل لتعريفك لهالدلة

[الليل]

تشكر أخي الكريم ..
وكما ذكرت .. أخي مميزة في نواحي عدة .

[هزيم الرعد]

يامال العافية ياراعي الهدد
تقرير طيب ووافي الصراحة
شكرا لك

[فهدالدوسري]

الاخ الغالي
راعي الهداد
السلام عليكم
اخي الكريم الله يجزاك عنا كل خير علي التقرير
اخوك
خشم الحصان
.............
نغزه........ سنها نوع من الدعايه ...........ولا:d

[يعقوب الوهيب]

مشكور على هالتعريف
ولكن
في اي مدينة يقع شارع السبالة؟
وكيف الوصول له؟

[ثامرالماضي]

بسم الله الرحمن الرحيم

وش هالزين يابوحمد ... عز الله إنك وفيّت وكفيّت يالذيب ...( وتسنك موزع مصري ) ههههههه

والظاهر اللي ماعنده نيّه يشتري .... يبي يشتري عقب هالحكي ....

عموماً مشكور وماقصّرت ...

وننتظر المزيد ... من الجديد ...

,,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,

[النداوي]

الله يجزاك خير يا راعي الهدد
كفيت ووفيت ما تركت شئ الا ووضحته
بخصوص هذه الدلة والحقيقة انها تحفة فنية
مشكور يا الغالي ولا تحرمنا من جديدك

أخوك ابو عبدالله

[المغترب]

يامال العافية ياراعي الهدد
وشكرا وماقصرت

[الإكليل]

:d مشكور ياراعي الهدد على الدعايه الجميله والله انك نشمي وهذا دليل على حبك للأخرين ونحصك لهم وتحب الخير عسى الله يرزقك الإخلاص وهذا شي كبير .

[راعي الهدد]

الأخوة الغالين على قلبي والله يشهد على ذلك

ابو فراس ... الليل ... ابو شكاع ... خشم الحصان ... المربد ... ابو شعلان ... النداوي ... المغترب ... الأكليل

حياكم وبياكم ويعلم الله لم نقصد الدعاية يامعقد الشوش ياخشم الحصان ههههههههههههههههههه

بس وش نقول خشم الحصان واستلمك بنغزاته مالك الا الدعاء بالفرج هههه

الله يغفر لك ياغالي

ابو فراس اكيد الي مثلك وشرواك بيعرف هالدلة لأنك راعي الطيب والكرم يابعدهم

النداوي ابشر بكل جديد

ابو شعلان كني مصري هاه اوريك ياالأفريقي ههههه

والله من زود الحماس وحبي لكم ابيكم تشرونها لأنها والله دلة تستحق من يشريها اي والله

تقبلو المحبة والتقدير يابعدهم كلهم

[ولد نجد]

الغالي راعي الهدد
والله انك صدقت في وصف هالدلة المزيونه ... بس لايكون لك نسبة ولا ناوي تشتري الوكالة
مشكور والله يجزاك خير

[راعي الهدد]

المشاركة الأصلية كتبت بواسطة ولد نجد

الغالي راعي الهدد
والله انك صدقت في وصف هالدلة المزيونه ... بس لايكون لك نسبة ولا ناوي تشتري الوكالة
مشكور والله يجزاك خير

هلا بك اخوي شرفتني بمرورك

والله العضيم تلاته ماليش نسبه ولاحاقه أزاي بتعملو معاي كدا يخرب بيت الفرنطا

هههههههه

ياحبي لكم ومزحكم

[أبو شايع]

المشاركة الأصلية كتبت بواسطة ولد نجد

الغالي راعي الهدد
والله انك صدقت في وصف هالدلة المزيونه ... بس لايكون لك نسبة ولا ناوي تشتري الوكالة
مشكور والله يجزاك خير

الف شكر راعي الهدد بس لوتكرمت مادامك بحثت عن الدله ابحث عن المحماس الزين الاصلي والنجر
حتى تكتمل العده..والسلام