الصاعقة التي كادت أن تفتك بنا في السودة " مقطع فديو "
سلام عليكم ورحمة الله وبركاته
أهلا وسهلا بالرحلاتيين... أتمنى أن تكونوا بخير
هذا الله يسلمكم
يوم الثلاثاء الحادي عشر من شهر ثمانية لعام تسعة والفين ميلادي
وحيث أننا وبحمد الله قررنا أن تكون عودتنا يوم الأربعاء ...اللي هو اليوم التالي اللي هو يوافق الثاني عشر من الشهر ذاته
فكان الإتفاق على أننا نروح لم السودة من بدري ...فعلا بعضنا ماصارت الساعة ثمان ونصف إلا هو هناك ... ذيبان
أما أنا فبسبب بعض المشاغل لحقت متأخر
مالكم بالطويلة ..الجو أصلا من بعد صلاة الظهر وهو يحارش ...ويوم طلعنا لم السودة ...وش تشوف
غيوم وسحب تهيل العقل
حنا وصلنا ...ماقلنا بسم الله نبي نقعد
وهي تمطر علينا مطر خفيف واصوات الرعد تسمع مع كل مكان ... وصلت دورة المياه أعزكم الله
يوم دريت ...ومير تستهل علينا ...ماشاء الله ..وأنا اللي أطلع من دورة المياه عاضن شليلي ...يقال لي أدل ربعي ..أثري ضيعتهم ..مسوي واثق اني مع الإتجاه الصحيح ..والمطر يضرب ..والبرد يقزع اصابع يديني
المهم يوم شفت أثري منب لم جادة ..واشوى الاقي سيارة نسبينا واقفة قلت اكيد انهم منا << أجل ييصيرون مناك يالذهين
المهم ...انا وصلتهم ..اثر الدنيا صارت شعبان ...ومطر ...وضرب ...كانوا تحت الشجر ...قلنا مالكم إلا السيارات ..ويروحون لم السيارات ...أنا رحت لم السيارة أنا والبزورة ...وهناك من كابر وقال لا نبي نجلس لمين ياقف المطر
المهم ...حطوا على روسهم طربال أزرق ...وحنا جلسنا بالسيارات ...وجلسوا هم تحت الشجر ...والمطر يضرب ..والبَرد بعد ماشاء الله يضرب ....يوم درينا ونشوف خط كهرب على اليمين بالنسبة لي وتضرب ذيك الصاعقة لا إله إلا الله ...صوت مخيف جدا لدرجة أن ولدي اغرورقت عيناه من الدمع بسبب الخوف العظيم الذي خشه << خشه يعني دخله << وش هاللغة الله لايوفق الظالم
المهم ...من محاسن الصدف أن أخوي كان يصور فديو بجواله ...وأخذ اللقطة .... عاد هم كانوا ينشدون ...ومير يخمرون كلهم ههههههههههههه شي عجيب سبحان الله
المهم بعد الأمطار التي استمرت حوالي نصف ساعة صار الجلوس بالمكان مستحيل ..الفرشات مانشوفهن تحت الماء ماجبناهن إلا بسنارات
لقينا مكان ثاني رايق وطلعت الشمس ودفينا شوي وصار أحسن يوم مر علينا بهالرحلة مع اني ربصت لمين قلت بس بسبب الخروج من السيارة كل شوي ياعشان اصور أو أجيب أو أودي أو أشيل العفش
بعض الصغار احتاجوا دورة المياه وبحكم أن الأمر صعب جدا جدا ...تم التعامل مع الموقف كما يجب
عاد أنتم افهموها
الصاعقة يالربع كانت قريبة ... شوفوا فوق تندة اليوكون من طرف الشجرة البرق القريب
وهذا المقطع
قبل المقطع ...ما أدري كتابة صاعقة بالإنجليزي صح أو لا ...إذا فيه خط أتمنى تقولون لي وشو عشان أعدل العنوان الإنجليزي
لأني أحس إن هالمقطع يبي يكون عالمي واحتمال نأخذ عليه جائزة نوبل لتصوير الصواعق
أجل مسوين قناة المجد وانقطع البث يوم سمعتوا الصاعقة وبغت تروح هالأناسة تعاسة
الحمد لله على سلامتكم
==========================================
للمعلومة أخي العزيز :: ـ الصاعقة ذُكرت بالقرآن الكريم (( 10 )) مرّات
منها قول الله تعالى(( ويسبح الرعد بحمده والملائكة من خيفته - ويرسل الصواعق فيصيب بها من يشاء.. إلخ)) فلا حول ولا قوّة إلا بالله
الصاعقة التي كادت أن تفتك بنا في السودة " مقطع فديو "
العرض العادي
