اشوف في جو الصقارة تعاكير ×× ناس ٍ على المقناص بيّن قردها

[أبو فهد العيد]

الحمدلله والصلاة والسلام على رسول الله وعلى آله وصحبه أجمعين
هذي أبيات رداً على أبيات أحد الأخوة.
فأحببت أن تشاركوني بها.

..
يامرحبا عد الزهر والنواوير
وعداد ما هلت مزون ٍ بردها

ترحيبة ٍ مثل اللبن بالغواضير
والذ من شمع الخلايا وشهدها

قافك لفاني يا زبون المخاسير
وفرحت به فرحت عجوز بولدها

اسندت قيفانك وسقت التعابير
ياجزلها وياجزل منهو سندها

قريتها وامعنت فيها بتفكير
وحللتها تحليل وفنـّد فندها

عقب النتيجة شفت كل التقارير
وعرفت سبة ضيقتك مع نكدها

واخذ العلاج بدون وصل وفواتير
ان كان تبغى وصفتي فاعتمدها

الطير يالخرجي دراية وتقدير
ما كل من شال العليقة حشدها

اشوف في جو الصقارة تعاكير
ناس ٍ على المقناص بيّن قردها

تشوفهم مثل الجحلّط مثابير
نفوسهم شينه ويظهر حقدها

مثل الغنم تمشي على ساقة آمير
ومنين ما يبغى يوجّه رشدها

تقديرهم للشيخ كذب ٍ وتزوير
ولولا العطية كان كلن جحدها

خاويتهم فترة وشفت التعازير
ناس ٍ على خيرك يفاوح حسدها

اخص ناس ٍ ما بهم ذرّة الخير
والا الرجال الطيبه مااقتصدها

وانا تراني آخذ الشور وآشير
والنفس عند الله توافي وعدها

هذي يابو هتان بعض التصاوير
عن حالةٍ جتنا وطوّل سهدها

صارت صقارتنا ملاهي وتقزير
نقنص ونرجع والطيور بوتدها

مامن حباري غير جره وتذكير
وكلن على البرقا نصاها ورصدها

تمت وصلو عد ماغرد الطير
على نبي ٍ سنته طال أمدها
....
طلال بن فهد العيد

[خالد الشريهي]

صارت صقارتنا ملاهي وتقزير
نقنص ونرجع والطيور بوتدها

مامن حباري غير جره وتذكير
وكلن على البرقا نصاها ورصدها

صح لسانك يا ابو فهد

ابيات رائعه ومعبره

تقبل شكري وتقديري

[أبو فهد العيد]

صح بدنك اخوي خالد..
اتحتفتني بمرورك وتعليقك .
لاهنت وبيض الله وجهك.

[القطار]

صح لسانك ياشاعر الصيد والمقناص
أجدت يابو فهد في وصف الحالة
وتقبل مروري يابعدهم

[أبو فهد العيد]

صح بدنك يالقطار..وشهادتك افخر بها يالذيب.
اسعدني تواجدك يالغالي.

[ثامرالماضي]

المشاركة الأصلية كتبت بواسطة أبو فهد العيد

تشوفهم مثل الجحلّط مثابير
نفوسهم شينه ويظهر حقدها

مثل الغنم تمشي على ساقة آمير
ومنين ما يبغى يوجّه رشدها

تقديرهم للشيخ كذب ٍ وتزوير
ولولا العطية كان كلن جحدها

أبو فهد الابيات هذي بالصميم واللي شاف ماهوب مثل اللي سمع عنهم .

والله إنك جبتها

صح لسانك وعلا شانك يابعدي

ولاتقطعنا ولو بيت أهم شي ننطرب كالعاده

بيض الله وجهك

,,,,,,,,,,,,,, تحياتي ,,,,,,,,,,,,,,

[أبو فهد العيد]

هلا بك يابو شعلان .
وصح بدنك يالغالي..
ابرك الساعات يوم اقرا ردك..وتعليقك.والموضوع ما يكتمل ولا يزين الا بتواجدك ومن هم مثلك شرواك.
....
اما الي جرب غير اللي سمع..صدقت والله .

والله الموسم اللي فات صار لنا موقف مع بعضهم .. والله موقف يقهر.
لكن اشوى ان الشعر متنفس لنا ويبرد حرتنا والا كان متذابحين وقتها..

و على قول المثل/
الباب الي يجيك منه ريح .... سده واستريح
وابشر بعزك ان شاء الله متواصلين معكم .ولنا الشرف .

[عبدالكريم اليوسف]

وعليكم السلام ورحمة الله وبركاته

وانا تراني آخذ الشور وآشير
والنفس عند الله توافي وعدها

تسلم يالامير
وقول وفعل وهذي علوم الرجال
لاعدمناك ولا عدمنا جزالتك

اخوك

[راعي الشاص]

صح لسانك يابو فهد
ابيات جزلة وتعبر عن حالة حقيقية

لاهنت.

[أبو فهد العيد]

عبد الكريم اليوسف..
سلمت يالقرم .
ولاهنت يالغالي.
والجزالة ما هي الا منكم ولكم .
حياك ربي

[أبو فهد العيد]

راعي الشاص ..
صح بدنك . يالغالي.
شرفني وسرني مرورك الكريم

[عبدالحميد الحربي]

صح لسانك يالغالي

أبيات رائعه ,,, الله يوفقك