حاولت إني أدخل أكثر من موضوع وأسأل واكتب ردود لعل وعسى أحد يفيدني ولكن للأسف ماحد عبرني
فلجأت لكتابة موضوع جديد وفيه قصتي الغريبه مع قير الفتك سوبر سفاري 2007 تماتيك
بدأت المشكلة يوم الأربعاء هذا 23\5\1432هـ
توني شاري الموتر له معي أسبوعين أو أكثر والموتر ماشي الحين 211 ألف كيلو
قلت خلني أغير زيوته كلها بحكم إن توني شاريه وانا رجال راعي خطوط واجد
دخلته عند محل تغيير زيوت وطلبت منه يغير لي زيت المكينه مع السيفون وزيت القير مع السيفون ... انا كان معي لومينا وكل 80 ألف أغير زيت القير والفلتر في محلات تغيير الزيوت .. وماشيه معي زي الحلاوة
المهم
قالي واحد من اليمانيه ... إنه مافيه معيار لزيت القير فلازم أوديها للوكالة !! قلت اما وكالة وانا بأمشي الحين للرياض << انا من الشرقية طبعا
قال مامعك الا كذا
ونط لي يماني ثاني في نفس المحل وقال أصبر أشوف لك ... وجلس يطالع وينزل تحت ويرجع فوق .. قال أغيره لك ماعندك مشكلة .. بس الزيت حقه مهب موجود روح جيبه
قلت طيب .. ورحت لمحل قطع غيار << هو الوحيد اللي موجود عندنا
قلت له زيت قير باترول 2007 تماتيك .. قالي كله واحد حط إيسي ديلكو يمشي .. قلت لا أبي أصلي حق الوكالة << نظامي ما أركب الا أصلي في كل شي
عطيته الإستمارة وكلم جوال وقلب وقلب وقلب .. قال هذا مايوجد الا في الوكالة فقط ويباع باللتر وبيطلع عليك بـ 480 ريال من غير الفلتر
قلت وحتى لو بادفع هالملبلغ متى بيجيني الزيت ؟؟؟
قال بكره .. قلت مع السلامة بس
وارجع لمحل تغيير الزيوت ولقيته قد نزل زيت القير كله وجالس ينتظرني
قلت له مالقيت زيت ... رجع الزيت الأول وطبقه مثل ماكان
قال ياولد الزيت أسود رايح عندك مره
قلت وش أسوي مامعي حل ثاني وانا لازم أمشي للرياض ضروري الحين
تفاجأت يوم الجمعه إن فيه تحت الموتر بقعة زيت .. ورحت لأقرب محل زيوت وقلت شيك لي وين هالتهريب معه ... قال من كارتير زيت الدركسون
قلت طيب شد عليه سو شي يوقف هالتهريب .. قال مامعك الا مكانيكي
وهنا النكبه .. فريت كل محلات صناعية الشفا والصناعية القديمه ولا فيه أحد يعرف وش السالفة .. تقول مدخل عليهم روز رايز مهب جيب باترول .. كأنهم أول مره يشوفونه
طحت في واحد .. ومن كلامه معي باين إنه فاهم ... سوري إسمه أبو جميل ... وعلمته بالسالفة .. وقال دام الزيت أسود من قبل سالفة تنزيل الزيت معناه إن القير فيه مشكلة << يعني ماله دخل راعي محل تغيير الزيوت !!؟؟
قلت ياولد انا بأمشي للشرقية الحين وش الدبره ؟؟؟
قال بنشيك لك عليه بالكميوتر أول ونشوف .. وشيك عليه بالكميوتر وطلع عندي 4 حساسات مخ القير ماتشتغل !!
هو ما اقتنع وركبنا انا وياه السيارة ومشينا فيها .. الرجال مستغرب من عزم الموتر يقول هذا ماهوب فتك ... فزة الـ 4500 أطلق منه .. معناه قيرك فيه مشكلة مليون بالمية
ورحنا لمحل ثاني عنده كمبيوتر احدث من اللي عند أبو جميل .. وشيكنا عليها وطلعت نفس المشكلة
أدري طولت عليكم ...
قال مامعك الا ان حنا نفك لك الكارتير ونشوف الزيت .. إذا الزيت بس أسود ولا حصلنا مثل برادة الحديد معه .. فالأمور زينه .. بنغير لك حساسات مخ القير ونغير الزيت وان شاء الله الأمور زينه
فكينا الكارتير الا وهو مليان من برادة الحديد هذي ...
قال هذي من كلتشات القير .. يعني توضيب .. نغير لك كلتشات القير + حساسات مخ القير + زيت القير من الوكالة = 6500 ريال
المصيبه إني كلمت صاحب الموتر اللي كان معه .. وقالي انا مغير زيت القير في الوكالة يوم كان ماشي 170 ألف لاتغير زيت القير
وطلع الزيت أسود وفيه برادة حديد !!!!
والحين الموتر في الورشة وبيسوون له توضيب
هل الكلام صحيح هذا ؟؟ سالفة برادة الحديد و و و ؟؟؟
لان القير تبديلاته وكل شي تمام .. لكن ضعف العزم في الفزة واضح بقوة وانا على بالي فلتر بنزين والا فلتر هواء وخلاص
يا مرحبا اخوي عبدالله .... المشكلة وضب القير وخلص ... وليتني ماوضبته .. لان القير صار أردى من أول وطلعت مشاكل ثانية .. أو شي .. فيه تفويته في النمره الأولى ... تجي خمات ماتجي دايم ... ولاتجي في القومة .. تجي لمن أهدي مثلا عند لفه وأجي امشي يطيني فصاوه شوي وبعدها يلقم النمره
ولاتجي دايم ... خمات ... والمشكلة الثانية .. صار الموتر فيه كتمه ماهيب طبيعيه .. يعني لمن أدعس له ... يقوم بس تحس الموتر مكتوووووووووووم وينفك شوي ويرجع يكتم ...
ليتنا من زيتنا سالمين في ذمتي ...
الحين كلمت صاحب الورشة أبو جميل ... وقالي جبه لي .. عاد مشكلتي ماراح أجيه الا يوم الأربعاء .. والله يعيني
ياعزيزي لاتسوي شي ابد قبل ماتروح لأبو صالح بالصناعية القديمه متخصص بالباترول وفاهم تكفى لايلعبون بالموتر
والله يا الوكالة أرحم من أبو صالح ... رحت له .. ودقيت عليه ويالله رد علي .. وبعد مارد علي قال نص ساعه واجيك ... والعمال في الورشة ماهم راضي يفتحون كبوت موتري لين يجي أبو صالح ... وطبعا جلست 3 ساعات في الورشة وأبو صالح ما جاء ..
وأسأل العمال عن تكلفة أشياء عاديه ... والله ياهم يلزخون بالسعر لزخ ...
بعد محاولات وحب خشوم وزنوا لي الديلكو ... وقسم بالله حرك المسمار حق الديلكو وقال 50ريال !!!!
الله يعوضك بخير
انا كنت بغير زيت القير عند هندي
وقالي مافيه اعيار لانه تماتيك
وقالي لازم عند الصناعية علشان تغير الفلتر
وانا عقب سالفتك الظاهر ماني مغيره
واذا تهورت ورحت بغير وش تنصحوني
(( اي نوع من الزيوت )) وكم يكلف مع تغيير الفلتر
راح قير الفتك بسبب محاولة تغيير الزيت
العرض العادي
