تعددت الأجهزه .. وبلش طلفاح ...

[طلفاح]

صبحكم / مساكم الله بالخير والعافيه ...

لي أسبوع .. وأنا ما غير أحربث بالنت هنا وهناك .. أدور جي بي اس ...

محرك البحث قوقل صدع مني .. لدرجة إني أحس أنه يضيق خاطره ليا دخلت النت ..

الزبده .. وعلشان ما أطول عليكم ...


كنت بين خيارات متعدده ..

الاسطوره .. 276 سي .. مع اني ما أشوف فيه زود كثير على الأجهزه الأخرى ...

النعومي .. اللي ما أعرف أستخدمه بالبر النوفي ..

والكارثه .. المونتانا ...

واستخدامي .. للكشتات .. وأبي شي زين .. وسعره ما هو غالي ..


تراني استشرتكم .. لأن محرك الحث قوقل كرشني .. وقال لا عاد أشوفك هنا .. تراك أشغلتنا ..

انتم وش رايكم بالموضوع ..

والله يعينكم علي ...

هذا والله أعلم
والسلام ختام

[محمد المعارك]

اخوي طلفاح
ذكرت شيئاً وغابت عنك أشياء

القالاكسي يمدحونه في الملاحة
وأجهزة الآي باد فيها أنظمة متعددة للملاحة ومجربة
الشاشات الصينية رائعة ومن واقع تجربة ارى انها منافس حقيقي للي انت ذكرت

لكن بالأخير أنا أرشح لك جهاز مونتانا لما سمعت عنه من مزايا مهمة

وأكيد الاخوان يفيدونك أكثر

بارك الله فيك.

[راعي الشاص]

ارجو لك التوفيق اخوي طلفاح
وفعلا والله الواحد يحتار بالاختيار

وفقك الله

[ابو عبد الله 1432]

حيا الله الجميع كلن باسمه

اذا كنت اخي الكريم ستستعمل الجهاز للمدينه و الصحراء فالافضل في نظري ما كان من فئة الميتين يا 205W او 255W او 265W و خذ عنهن فكره على الرابط التالي

http://www.alrahlat.com/vb/showthread.php?p=198826#post198826

و اذا الميزانيه تسمح و تبي جهاز لك وللزمن فلا تتعدى المونتانا 650
و اذا استخدامك للمدينه فقط فاي جهاز مناسب و لكن يجب معرفة مدى حاجتك للمسائل الاخرى كالبلوتوث و مشغلات ال اف ام و ام بي ثري و عرض الخرائط ثلاثية الابعاد و نوع الشاشه عاديه او ال سي دي و سماكة الجهاز وما الى ذلك
ومتى ما رغبت بأي نوع من هذه الاجهزه فشرف اخوك بإتصالك و ابشر باللي يسرك إن شاء الله

وجميع الاجهزه المباعه عن طريقي تشتمل على احدث الخرائط و آخر سوفتوير للجهاز و معها ادلة تشغيل و تعليمات و دفدي خرائط و تشتمل مفضلتها على اكثر المواقع التي يحتاجها راعي البر و اصحاب الطيور من مراكز علاج الطيور و توسيرها و محلات المقيض و محلات الرحلات بالاضافه الى الاستماع بكل انصات لجميع استفساراتكم و تساؤلاتكم

[طلفاح]

إخواني .. أبو أحمد .. راعي الشاص .. أبو عبد الله 1432

حياكم الله كلن بإسمه..

استخرت على المونتانا 650 .. وكنت أمس بالدمام .. ومريت دار موجه .. وشريته ..

من امس وانا مبلش الجهاز .. ما غير اقلبه .. واشوف وش به وش مابه ..

إلين حسيت إنه ندم إنه طاح بيدي ... ههههه

الملاحظات الأوليه .. كمستخدم .. غشيم ..

الجهاز سهل التعامل معاه .. جدا..

لا يوجد خرائط من دار موجه الا بدفع 550 ريال قيمة السي دي .. اللي هي الخليج والصحرا..

حدثته للإصدار الأخير .. 4.1 وما أشوف فيه فرق .. يمكن لأن الجهاز جديد علي ..

اللمس .. أحسه بدائي .. خصوصا اني متعود على تلفونات اللمس .. الآيفون والجالكسي ...

الكاميره .. أشك انها 5 ميقا بكسل حقيقي .. صورها ما هي هاك الزود .. ولكن يشفع للجهاز .. بقوه .. إن الصوره تصير احداثيه .. وهذا أمر جميل ..

قوائم الجهاز .. أعتبرها سهله .. حتى على الغشيم زيي ...

إخواني .. أشكر مروركم من كل قلبي ..

و أخص بالشكر والاعتذار أخوي أبو عبد الله ... لأني شفت رده متأخر ... ويشرفني اتصالي بك ومعرفتك ...


قيمة الجهاز في دار موجه 2560 ريال بدون قاعدة سياره ..

قاعدة السياره 240 ريال ..

الحمد لله على ما قسم ...

الفاجعه .. إن ال 276 سي قيمته فلكيه ...

بدون مبالغه .. وشوف عيني ... عند دار موجه .. 4500 ريال .. يا دافع البلا ..

أشكركم مرة أخرى من كل قلبي ..

هذا والله أعلم ..

والسلام ختام ..

[محمد المعارك]

مبروك الجهاز
وياليتك تشرح ولو شرح بسيط عن الجهاز ومميزاته ومقارنته بالاجهزة الأخرى

بارك الله فيك.

[طلفاح]

هذا اللي يبي يبلشنا ..

يا أبو أحمد .. ترا ما أبخص به شي ..

يمكن أقدر أتبيخص .. بس أبي أحط تجربتي الشخصيه ... ورأيي الخاص عنه ...

وأبشر يا حبيبي .. دام الدعوا هرج .. أبشر باللي يدوخ راسك ..

هذا والله أعلم..

والسلام ختام

[ابو عبد الله 1432]

الله يبارك لك فيه اخوي و ينفعك فيه و لا والله ودي لك بالحسوفه لكن الجهاز اللي كلفك ب 2800 بدون خرايط من دار موجه موجود عند اخوك بكامل ملحقاته من شواحن بيت و سياره و قاعده و سبيكر و احدث خرائط الشرق الاوسط 2013.10 و الصحراء السياري 2012 و دار موجه 6.3 و البراري 2 و غيرها ب 2350 ريال و انا ذكرت هذا هنا حتى باقي الاخوان يشوفون السعر قبل يشترون و يقررون اللي ترتاح له نفوسهم

و بالنسبه للي وده بجهاز 276 عربي مستعمل استعمال حشمه و اخو الجديد موجود عندي بكرتونه مع كامل اغراضه و ملحقاته و وصل سومه 2800 و انا قريب من البيعه

[طلفاح]

بيض الله وجهك يا أخي .. وجزاك الله كل خير ..

فعلاً .. أحس إن دار موجه مبالغين بالسعر .. ولكن شريت وانتهى الأمر ..

باقي علي الخرايط .. وللحين أحوس بإعدادات الجهاز .. وما قدرت أشغل التوجيه الصوتي ..

وراح أحط هنا مرئياتي عن الجهاز أول بأول ..

هذا والله أعلم ..
والسلام ختام

[طلفاح]

مرئيه جديديه ...

بالنسبه للخرايط .. حاولت انزلها من النت .. ولكنها ما ظبطت معاي ..

الخط العربي .. يدبل التسبد .. وأعتقد أنه يحتاج لتغيير ..

أسامي المناطق .. والفياض صغيره .. ما توضح الا اذا حطيت خشمي عن الجهاز ..

الجهاز واضح حتى تحت الشمس ..

فيه ميزة تدوير الشاشه .. سواءا الطول أو العرض ..

ما زلت ما أعرف شلون أشغل التوجيه الصوتي .. لفه بلفه .. للأسف ..

ولي عوده بإذن الله ..

[محمد المعارك]

حيا الله طلفاح

الحربثة تطلع المغبا

واصل الاكتشافات وخبرنا هنا اول باول

والفائدة للجميع ان شاء الله

بانتظارك بارك الله فيك.

نغزات ودقشات وصدمات ... مافيه ؟؟ ليه؟

[طلفاح]

هلا أبو أحمد ...

نغزات .. مافيه .. لأن جد جدي خشم الحصان ماهو هنا ..

الظاهر انه زعلان اني فاخت ال276 سي .. خبرك هو من معجبينه ...

والا كان تشوف علوم ..

هذا والله أعلم ..

والسلام ختام

[ابو عبد الله 1432]

المشاركة الأصلية كتبت بواسطة طلفاح

مرئيه جديديه ...

بالنسبه للخرايط .. حاولت انزلها من النت .. ولكنها ما ظبطت معاي ..

الخط العربي .. يدبل التسبد .. وأعتقد أنه يحتاج لتغيير ..

أسامي المناطق .. والفياض صغيره .. ما توضح الا اذا حطيت خشمي عن الجهاز ..

الجهاز واضح حتى تحت الشمس ..

فيه ميزة تدوير الشاشه .. سواءا الطول أو العرض ..

ما زلت ما أعرف شلون أشغل التوجيه الصوتي .. لفه بلفه .. للأسف ..

ولي عوده بإذن الله ..

حياك الله اخي الكريم
الخرايط تستطيع تركيب ما تشاء من الخرايط و تسميها باسماء عربيه اذا رغبت

الخط العربي نعم صغير لكن يتم استبداله بخط كبير و واضح

التوجيه الصوتي و سماع الاصوات يتطلب توصيل الجهاز بالقاعده و الاخيره مدمج فيها سماعات الصوت

[طلفاح]

أبو عبد الله ...

القاعده موجوده .. والصوت ما يشتغل لما أحط عنوان أو اتجاه ..

يشتغل لما أوقف الملاحه .. يقول لي ( ري كالكيوليشن) اللي هو اعادة احتساب المسار ..

وما زال الصراع مستمر .. وبقوه ..

والخط .. ما لقيت أي خط خاص فيه بموقع قارمن ...

هذا والله اعلم

والسلام ختام.

[طلفاح]

سالفه جديده ..

حدثت لآخر إصدار من برنامج التشغيل ..

ونزلت خرايط الصحراء والمدن .. للسعوديه والكويت ..

وظهرت معاي المواقع البريه والمدن ..

ملاحظه :- التوجيه الصوتي .. مايعمل الا بشبك الشاحن ..

ميزه .. حتي بدون توجيه صوتي .. يوجد نغمات يمكن ضبطه عن الطريق الجهاز للتوجيه .. ويبيله تعويد ..

بالنسبه لجهازي .. طن طن .. يعني لف ..

ويق ويق .. يعني وصلت ..


وما زال التقليب بالجهاز مستمر ...

ونوافيكم بالأخبار .. عند حدوثها ...

شعارنا دائماً .. دقه .. حياديه .. حربثه ..

هذا والله أعلم

والسلام ختام