=== لاتجعل تعبك في الرحلة يؤثر عليك ===

[يعقوب الوهيب]

ابو كريـّـم واحد من الناس اللي ما تشبع من الجلسة معه، وتلقاه دايم يراعي ربعه ويحثهم على الامور الزينة، كان، الله يذكره بالخير، يوصينا بمراعات النفسيات ويقول ترى هي اللي تخليـنـا نسـتـانس و نـسـتـفيد من الرحلات وننسى تعبها.
سالناه شلون؟
قال كلنا يعرف ان الرحلات جهد مادي وتعب، والبعض منا يتحمس في اداء الواجبات المادية/الجسدية قبل واثناء الرحلة، واذ صار تعبان ومتحمس وجاه واحد وسيع صدر يمزح معه تلقاه يـتـنـرفز ويضيق صدره وهو بعده بالديره ما طلع للبر.!!
والسبب انه ينسى او يـتـناسى بعض الامور المعنوية اللي في الحقيقة تـبـيـن معادن الناس اثناء الرحلات والسفر، واكثر شيء يوصينا به ابو كريم ويحذرنا منه هو آخر يوم من الكشتة لأن ضيقة الصدر على فراق البر تظهر والشوق للاهل يزداد.
يقول ابو كريم ترى الكشتات فرصة للواحد انه يمارسة مكارم الاخلاق مثل: الصبر والتسامح والشفقة والكرم والتعرف على الاخرين ويعانقهم والبشاشة لهم ويقول حاول طول الرحلة تضحك لهذا وتمدح هذاك وتجبر نفسك انك تسمع سالفة ما تعودت انك تسمع من اشكال هذي السوالف. !!
الصراحة كل اللي قاله ابو كريم يطبقه وزيادة.
سالناه شلون وصلت لهذي المقدرة؟
قال: كلما زادت السفرات وتـنـوع المرافقون كلما زادت خبراتـنا واهتمامنا في النواحي المعنوية، والناس اللي تمكنوا من الربط بين جهودهم الجسدية والمعنوية يصير عندهم لياقة بحيث يقدر يطلع مع كل الاجناس ويصاحب كل المستويات، اضافة الى انه ما يتعب من الرحلة ومستعد يطلع في أي وقت.
وفي هذا المنتدى عندنا نماذج الله يبارك فيهم ويمد في اعمارهم على طاعته، لا يملك من يرافقهم الا ان يقف لهم اجلالا على ما جمع من فوائد صحبتهم ما جعل تعب الرحلات يهون عنده، وتعلمنا منهم بان نجعل اهتمامنا مـتـركزا على اظهار وتـنـمية الصفات المعنوية كما يفعل الخبراء.

[سحمان السبيعي]

فعلا اخي الكريم وكلامك على متمه انه هذا المفروض في نفسية الرحالة والله يجزاك خير على التذكير الطيب بالاخلاق الكريمة النبيلة التي هي اساس في دينا السمح

[ثامرالماضي]

بسم الله الرحمن الرحيم

مشكور يابو يوسف على هالمعلومات الرائعة ...

والله يجزاء أبو كرّيم خير على هالنصائح اللي من الواجب أن يتبّعها الجميع ... لأنها هي مصدر الألفه والمحبه بين الأصدقاء ...

وأنا داري إنك تقصدني بآخر الكلام ... والصراحه أحرجتني كثير يابو يوسف ...

لاهنت يالغالي ...

وننتظر المزيد ... من هالنصائح ...

,,,,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,

[ابو فراس]

ابو يوسف سلم لنا على ابو كريم

وقله نبي نسوي نسخ ولصق

نبي ننسخهن ونلصقهن على طبلون الموتر

ولكن ( السؤال موجه لك يابو يوسف ) اذا ما قاموا لصلاة الفجر وش نسوي بهم ؟

منكم نستفيد

[أبو مروان]

السلام عليكم ورحمة الله وبركاته

مشكور أخي الغالي أبو يوسف المربد على هذه النصيحة القيمة ، وأتحفنا بالمزيد من مثل هذه المشاركه الرائعة

فجزاك الله خير

[شايب الصمان]

تشكر ياأبويوسف وأظن من جمعت البخرا ماشفناك نسمع عنك من عيال البد..... ودنا بشوفك يالحبيب .

[يعقوب الوهيب]

الغالي كان
الف شكر على مرورك يا خلفهم .

[الروقي]

((الحكمة ضالة المؤمن))
وصاحبك ابو كريم إنسان مثالي وصاحب حكمه ومعرفة
شكرا لكما

[يعقوب الوهيب]

ابو شعلان
يسلم عليك ابو كريم ويقول امثالك قليلين. ولو هو شرهان عليك ما عزمته على صيد الكراوين.....!!

[حامد الغامدي]

صحيح اللي يطبق هذا الكلام نقول عليه راعي بر، نفسيتك لازم تكون مثل يوم انت طالع للكشته يازينك مبسوط ونشاط فيك يهول، ترى ياأخوان الكشته ملحها النفسيه الطيبه والوجه الطيب، لا تقعد مكشر وتخرب الجو على الباقين، كل اللي ضاربين بوز ما يحبون يشتغلون في الرحله، قم تحرك سويلك حاجه، الشغل والحركه تصلح النفسيات وتبعد الأفكار اللي ما هي زينه، وهي كذا و كذا لابد تحصلك واحد على مزاجك تسولف معه وتصير طلعه ماتنساها، فـما هناك داعي انك تشوف نفسك على غيرك ولا تقعد تستعرض انك فلان أو علان، والرحلات تهذب النفوس ولا تنفرها

شكرا لك أبو يوسف على الموضوع الحساس، وجزاك الله خير على هالنصايح.

[يعقوب الوهيب]

ابو فراس
امثال ابو كريم واجد، وما عليكم زود
اما سؤالك فيقول ابو كريم: لكل مقام مقال. بعض الناس مقامهم اللين والتودد ، وبعض الناس مقامهم نسف الفراش.....!!

ابو فراس بالمناسبة
ابو كريم معجب بعزبتك ، ويقول ما عليك من كلام الناس اللي يقولون "بصل نابت ".

[يعقوب الوهيب]

ابو مروان
يسلم عليك ابو كريم ويبارك لك بقاعدة الكمبيوتر واسلاك الانارة خصوصا العمود حامل الكبس.

[يعقوب الوهيب]

شايب الصمان
تسلم يا خلفهم ، وما عليك زود .
ولعل الله يكتب لنا جمعة نلتقي بها .
وترى امانة يسلم عليك ابو كريم سلام خاص ، وهو معجب باجتماع الشرقية الاخير.

[يعقوب الوهيب]

الروقي
مشكور يا بعدهم على مرورك . وكذلك ابو كريم يهديك تحياته

[يعقوب الوهيب]

مهراس
تسلم يا بو فهد على هالنصيحة ، فعلا الفاضي يعمل قاضي.
تحياتي وتحيات ابو كريم