السلام عليكم ورحمة الله وبركاته
تحية طيبه - كنت أطلع للبحر وكان معنا خيمه صغيره يمكن شفتوها في بعض المواضيع، لها سبعة أعمده، ونصبها عذاب، وكنا نتحمل تعبها، ما عندنا بديل والشمس حاره عند البحر في الصيف
لا بد من الظل.
تركنا الخيمه الصغيره وغثاها وصرنا نستعمل شراع بلاستك أخف وأسهل لكن الظل صغير وتربيطه عناء والهواء ما يخليه يثبت حتى نشد عليه بقوه بالحبال، وتمشي الأمور، ريحة أبو على ولا عدمه
تقطعت أطراف الشراع من المكان اللي نربط فيه الحبل، واسترخصت واشتريت شراع ثاني ب 8 ريالات أكبر شوي من عند محلات مواد البناء، وهذا الشراع له ميزه فريده وهو اذا نصبته وجلست تحته والهوا البحري يهب، ما تسمع رفيقك كود انك تستخدم الأشارات، عليه صوت مزعج تقول كانك تطبل في تنكة تمر، خسارة الـ 8 ريال مثل بعض الهدوم لبسه واحده.
أخر مرة اشتريت قلع 3 في 4 بـ 60 ريال وهذا الطربال امتاز بالعناد وتحجر الرأس ويقول اذا انت ولد أبوك أربطني، ومثل ما توقعت الهوا يشده منا ونحنا نشد بالحبال من الجهة الأخرى، مصارعه، كرهنا البحر ذاك اليوم، تقطعت أيدينا من كثر الشد وتربيط الحبال بالأسلاك اللي نحصلها منطوله عند البحر، عاد مشينا الأمور في ذيك الطلعه وفي اليوم التالي جا على بالي مظلات كنت أشوفها في بنده في قسم أغراض البر والرحلات، قلت ياولد ازرق لبنده وشوفها.
جميع مستلزمات البر في الأسواق الكبيره ليست بمستوى المحلات المتخصصه كالسنيدي، ولكن قد تجد انت بعض الأدوات اللتي تفي باحتياجاتك ولو لفترة قصيره من، كهذه المظله سهلة التركيب خفيفة الوزن علاوة على منظرها الجميل، اشتريتها بمبلغ 279 ريال من سوق بنده ونصبتها في أقل من خمس دقائق ان لم اكن مبالغا.
الصوره أخذت أول ما رزينا المظله، لاحظوا المكان نظيف والبلديه وضعت براميل الزباله، يمكن علشان الصيف، شي جميل
المظله لها عراوي في الأركان لربط حبال التثبيت اذا لزم الأمر وكان الهوا شديد، ويمكن تقصر قوائم المظله وتصبح على مستوى منخفض بمتر واحد عن اللي في الصوره.
البحر كان خالي يوم أمس الخميس بسبب الأختبارات والجو كان لا باس هواء خفيف ومنعش ولكن الشمس حاره والبحر شارد اي به جزر، كان معي أبو فواز وصديقي في العمل أبو سعد
والحمدلله ارتحنا من المعاناة اللي في السابق وحكرت الكبسه وهذي الكوسه والبطاطس تعلمتها من المنتدى وربعنا في القصيم ولا اهل الحجاز ما يسوونها. تعرفون ان المره السابقه نسينا الرز والزيت وصلحنا ايدام بدال الكبسه والمشكله ان قائمة أبو علي معنا
كلش تمام المره هذي ما نسينا حاجه، لكن نسينا نملح الكبسه
اللهم لك الحمد، اللهم ادمها نعمه واحفظها من الزوال، كانت طلعه حلوه للبحر، أحلى ما فيها هذه
المظله الوذفه
شكرا لمتابعتكم