رحلتنا لم نفود السر يوم الربوع19-1-1428 هـ..صور

[هزيم الرعد]

السلام عليكم ورحمة الله وبركاته
إتفقنا نحن والمجموعة المباركة على القيام برحلة إلى صعافيق لثلاثة أسباب
الأول هو تقرير أبو عيون الطيب اللي يسلمه
الثاني هو إني ماعمري طبيته
الثاث بس تسذاتا بدون أي سبب
المهم ياجماعة وحنا اللي نتفق ...ونتفق مرتن ثانية ...ومير نتزهب ...قلنا الوعد يوم الربوع الظهور << هي الظهر بس عشان تكون على السجع
المهم وحنا اللي نركب مواترنا ...ونمشي على وصف أبو عيون المنتاز << ماسكن ورقة أبو عيون وملصقه بالقزازة قدامه وكم مرة شوي ويسوي حادث بسبب هالورقة ...عموما النفود إختلف على تسميته ..أحدهم يقول أنه السر وصعافيق عنكم شمال وأحدهم يقول هذا صعافيق ..
المهم ما أطول عليكم ...
رحلتنا كانت من الربوع اللي هو قبل أمس ..لمين الخميس اللي هو أمس ليلا
*ملاحظة .. يرد في السالفة إسم أبو عيون ..هذا واحد من أهل طريف ماتعرفونه
وهذي الصور
لا
قبل الصور
خارطة الطريق

حيث أن حركة السير كانت من الرس - المذنب - روضة الحسو من نم روضة الحسو يسار همن الدخول بالنفود

هذي أول صورة بعد ما انحرفنا ( الله يستر ) عن الممهد (البطناج) يسارا ولقينا هالمحل وقررنا تنكي بوه ..على فكرة ..تأريخ الصور ماكان مضبوط بس زيناه عقب ..وعلى فكرة ثانية.. كشتتنا بالأساس كانت للربيع وشوفة الربيع وهالمكشات الطيب ..أكثر منه تلقيط فقيعات

من الأشياء اللي شدت إنتباهي عند محلات البر هذا الشئ ..وشريته عشان أستفيد منه
صورة أولى

وصورة ثانية

صم أوف بعيرز واز ذير

كان الأرطا متوفرا ..اكسر وشب ....خلاف الأخبار التي وصلتنا بأن الحطب غ م << يعني غير متوفر ..هنا وكما هو مخطط له من قبل الزعيم ... شب المزيد من الإرطا من شان المجمار الدولي << مثل حق السفير

صباح يوم الخميس ...وبعد نومة هنيئة ولله الحمد وفي ليلة لاباردة ولا دافئة قمنا وصلينا ومن ثم بدأت حركات تجهيز القهوة والشاهي ( أبو إبراهيم يسوي قهوة جدا رهيبة ) لايفوتكم اكشتوا معه


يتبع

[هزيم الرعد]

إكتشفنا في هذه الصورة أن أبو إبراهيم يتمتع بعراقيب خالية من الشطوب ...ماشاء الله ..ياحمبي له والله

كما هو معروف أن الزعيم كان قد وضع مجماره ليلا ...وتكتك وضعه ...همن صباحا ... أخرجه ..ونظفه فظهر لنا هذا المجمار ( القرص ) اللي ماهنا أزين من منظره

وصورة أخرى مقربة أكثر .... ياجمالوه

طالب التختور الإستشاري أبو محمد بأخذ أشعة مقطعية للقرص حتى يستطيع الحكم على جودته فكانت هذه الصورة

8
ماشاء الله يابو صالح يازعيم ... أنشهد إنك تحكر القرص

ماطولنا ...أخذ الزعيم في فرك المجمار وحنا مغير نشوف ( كاشتن مع زولة ) ومن ثم أضاف البصل ..وزيت الزيتون ..وبالأخير التمر المفتفت .. وقال إقلطوا ..عاد حنا إستحينا منه قلنا ما سوينا معك شي بهالقرص على الأقل نساعدك بأكله
وهذي الصورة قبل الهجوم الثلاثي العدواني على مصر هكالحين

الزعيم بعدها أخذ في التمشي فوق النفود .. فكانت هذه اللقطة ( الصورة بعيدة بس الزوم مقربه )
ومن هنا يلاحظ تعديل تأريخ الصور من إعدادات الكاميرة

لقطة زود

يتبع ...

[هزيم الرعد]

صورة للممسوح اللي يقول عليه أبو عيون

زارنا زائر في رحلتنا بطريقة أو بإخرى ... فقررنا أن نصوره ولكن لإنشغالنا وضعناه تحت المداسيس حتى يشعر بالدفئ والحنان ومن ثم نقوم بتصويره

مازال نائما رغم رفع المداسيس عنه

هالزاحف هذا استغربنا من أمره ونوعه ..هل هو أم حبينان صغيرة مثلا ؟ ( أم الحبين) أم لا
عموما الشئ العجيب هو إنه إذا صار بالنفود يسوي حركة عجيبة ويرج بسرعة كأنه على الهزاز ويندفن بالنفود ... سبحان الله وهنا له صورتين الأولى وهو متشقلب حيث إن الزعيم قال له نبي نصورك فديو وأنت تندفن بالأرض وعيا ورفض رفضا باتا يقول إن بيه وبين ART عقد وإنهم مشفرين هالحركة .. قام أبو صالح وعلقه تعليق قال إن تسان بتسبدك مر خله يحوس مريرك

بعد ماحس بالغثيان وتقلبت تسبده قال خلاااااااااااااص نزلوووووووووون ابزوووووووووووع نززززلون وأنا أسوي اللي تبون
ومير ينزله أبو صالح قال يالله سو الحركة ...وهو اللي يصلحه قال بسرعة تكفون ولا يدري صالح كامل

بعدها أطلقنا سراحة ولكن طلب حليب السعودية لأن معدته شوي تعبت
بعدها إتجهت أنا والزعيم في تحدي مع الذات لصعود النفود فطلعنا فوق أكبر طعس حولنا وكانت هالصورة .. واللي تحت السهم هذي سياراتنا ومحلنا ...بينما أبو إبراهيم شمر عن ساعديه لحكر الغداء

وصورة أخرى من فوق

باقي بعد كمن صورة

[هزيم الرعد]

بعدها عدنا منهكين فإذا بأبي إبراهيم وقد حكر ذيك الكبيسة اللي ماودكم إلا تاكلونه وأنتم جوعانين بقوة وكانت هالصور مع بدايات العدوان ( من أصعب لحظات التصوير انك تصور وأنت جوعان وخوياك يتلذذون بالأكل )




صورة مقربة .... ألغام أرضية وقنابل عنقودية




8
8
8



تسلم الأيادي يابوإبراهيم الصراحة إنك حاكرها صح



بعد وجبة الغداء حضر إلينا ضيف على إستحياء ...من بعيد فكانت له هاللقطة ( السهم )




التمتع بتقنية الزوم كانت من خلال هذه اللقطة




غادرنا بعد قليل ولم يمهلنا أن نقدم له واجب الضيافة
بعد الغداء إتجهنا إلى المانعية من أجل التمتع بمشاهدة المرهمات وما أدراك ما المرهمات ...وكانت المسافة تقريبا 12 كلم قطعنا فيها النفود بطريق مخالف للطريق الأول ..وكلما قربنا من من الأسفلت كثر الكشاتة خصوصا العوايل منهم...شفنا هالمخيم الكبير فتوقفنا لأخذ صورة له وهو خاص بأحد العوائل حسب اللوحة الموجودة على الطريق





طلعنا من النفود ...ومسكنا الأسفلت ....ومشينا برهة من الكيلوجرامات ...لمين وصلنا المانعية ..والمانعية هي ...أو تدرون ...اللي مايعرف وشي المانعية يرعص قوقل ويكتب المانعية ويعرف كل شي
بالنت مابه شي ما ينعرف
المهم ...وحنا اللي نوقف ...ونتفرج على الشباب الرايقين ...وكان فيه واحد معه رانجلر الصراحة أبدع بالطلوع .. يوم جيت أصوره فديو ومير ينزل تحت ويوقف ... بكيفه هو الخسران منول يينزله له ملف فديو بس هو الخسران
صور من المانعية على السريع لأننا ما أبطينا به



يتبع

[هزيم الرعد]

بعدها خرجنا من المانعية متجهين من لم أم حزم ناوين على شرب القهوة والشاهي بأقرب محل ونيس كآخر مشاريع الكشتة الطيبة
تكينا بمحل منتاز مرتفع ..,شفت لكم هالمنظر

عائلة يوكون بن جنرال آل موتورز ...المطايا الطيبة

القائد الركن ...المهيب ... في حالة شموخ

وزانت السمرة ...والتكية ...وغابت علينا شمسنا مودعة يوم جميل أضاف لي الكثير عن هالمنطقة المجهولة بالسابق بالنسبة لي

ومع آخر الصور هنا ...السمرة الطيبة على الضوية

بعدها توجهنا إلى أم حزم وملينا الكفرات هواء ومنها إلى الطريق السريع همن الرس
أتمنى إني قدمت المفيد ..وعذرا على الشرح البدائي والسريع

[ريع الدياب]

الله يمتعك يأبوشكاع انت وخوياك فى طاعته
كما متعتنا معك وأشركتنا فى كشتتكم الرهيبة
عشنا معكم كل تفاصيل الرحلة من أولها لآخرها
الطريق والطعوس وقرص الجمر والكبسة والزوار
والأرطى وضويته والمرهمات .. ما خليت شىء

[الرحال]

مشكور اخوي ابوشكاع هلى التقرير الرائع

رحله رائعه وتعليق اروع . وأطلق ما بالكشته

هالصوره ..

يا اخي بعض الناس اذا قضاء كاشت يتعمد يوسخ المكان . وهذا غباء..

لوه في بيته كان ماخلى المكان وسخ ...

على العموم بارك الله فيك وماقصرت يالغالي ..

[النداوي]

الله يجزاك خير يا ابو شكاع
الحقيقة وصف ممتع
ماقصرت الله لا يهينك
مشكور يا الغالي

[محمد المعارك]

وش هالزين يابو شكاع

اثنين يوكون وكامرات تقرب البعيد ... ونظافة .... وش السالفة ؟؟؟؟

انا خابرن الاسهم طايحة .... ؟؟؟؟؟؟

لكن تبي الصدز .... والله اني كني معكم بهالرحلة ... ذلك من جمال التعليق والوصف الدقيق .... وهذا هو الشغل الزين في طرح المواضيع.

شكراً يا بو شكاع .... على هذا الجهد الرائع .... وياعلك كل اسبوع تقوم برحلة ... علشان نشوف طرحك الرائع .

بارك الله فيك.

[خالد الشريهي]

أبو شكاع

ما شاء الله رحلة طيبه ورفقه طيبه والجميل فيها القرص والنظافه

ابوراشد وابوعلي ماكانوا معكم؟


مستمرين في رحلات التسمين الله لايضركم

مشكور ابوصالح وتقبل أجمل تحية

[الليل]

تقرير مصور رائع ..
تشكر على هذا البيان الكامل
لتلك الرحلة الممتعة بحق .

[القويره]

اخوي ابوشكاع


ماقصرت بالمره على التقرير والصور والتعليق


وقرص الجمر

عليكم بالعافيه

واختيار موفق للمكان

[أبو مروان]

وعليكم السلام ورحمة الله وبركاته

أخي الغالي ابوشكاع ، جزاك الله خير على هذا التقرير الرائع لرحلة ولا أروع ، والمناظر الجميلة والصور التي تسر الخاطر وتبهج النفس

[ثامرالماضي]

بسم الله الرحمن الرحيم

ماشاء الله تبارك الرحمن ...

رحله موفقه أخوي أبو شكاع ... الله لايهينك ... إسلوب رائع وسرد مميز... الصراحة تمتعنا وكشتنا وإستانسنا .. مع هالصور الرائعة ... وعساكم دايم بهالوناسه يارب ...

أخوي أبو شكاع ... لاتبخل علينا بالتقارير القادمة ..

وننتظر المزيد ... من الجديد ...

,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,

[هزيم الرعد]

كان عندي إشكالية بالإتصال فتأخرت عليكم فالمعذرة يا إخواني

المشاركة الأصلية كتبت بواسطة ريع الدياب

الله يمتعك يأبوشكاع انت وخوياك فى طاعته

كما متعتنا معك وأشركتنا فى كشتتكم الرهيبة
عشنا معكم كل تفاصيل الرحلة من أولها لآخرها
الطريق والطعوس وقرص الجمر والكبسة والزوار

والأرطى وضويته والمرهمات .. ما خليت شىء

ياهلا والله بريع الدياب
تسلم يالغالي وماقصرت على مرورك واللي نطرحه هو نقطة من بحر إبداعاتكم جميعا
شكرا لك تشريفك محلنا وياهلابك