رحلة الصوالح بدون بسكوت مالح لم صعافيق 3/2/1428 هـ

[هزيم الرعد]

بسم الله والصلاة على رسول الله نبينا محمد وعلى آله وصحبه أجميعن
.أنا / السلام عليكم
أبو صالح / عليكم السلام هلابك أبو صالح
أنا / هلابك أبو صالح وش علومك ؟
أبو صالح / بخير ابشرك ..
أنا / أبو صالح ....
أبو صالح / سم
أنا / والله ياحبت لك وصف للفقع على كيف كيفك بصعافيق....وش رايك ماتبي نطلع ؟
أبو صالح كان جالس وقام على حيله وقال /وين ؟ متى ؟ وش لون ؟ وراه ؟؟؟
أنا/ بسم الله عليك وش بك عسا ماشر ...؟؟
أبو صالح / ماهنا شر بس جبت طاري الفقع ..قلت فرصة نكشت عشان أجرب موتري بالنفود
أنا / يعني انت فرح بالخبر بس عشان تجرب الموتر بالنفود ؟
أبو صالح / إيه
أنا / أنا أحسبك فرحت بالفقع ....ما يخالف ...أهم شي الخوة ... سواء لربيع أو نفود أو فقع ...
أبو صالح / تم تم ...نمشي الربوع ونرجع الجمعة وش قلت ؟
أنا / قداااام يالله معك ... من يبي يروح معنا ؟
.....وهنا بدأت الترتيبات للرحلة ....وإتفقنا 5 على الرحلة ...
وأعضاء الرحلة هم
1- أبو صالح
2- أبو صالح
3- أبو صالح
4- أبو صالح
5- أبو صالح
حقيقة ... لأننا خمسة ...كلنا يقال لنا أبو صالح
ثلاثة إخوان وأثنين مهوب إخوان ..
المهم ...زهبنا كل شي ...وكان الوقت المحدد هو ظهر يوم الربوع ... كل شي سار كما هو مخطط له ولله الحمد ...توجهنا إلى الصعافيق ...مشينا مع الممسوح ...لحد ماخلص ..وللمعلومية هو طوله 22 كلم تقريبا .... هالهرج صار تقريبا خمس إلا ...عصرا ....اختلف علينا الوصف ...قلنا نروح للوصف الأبعد لأننا ما ندري هل حنا تعدينا الوصف ..أو إن الوصف تعدانا ...أو إنه قدامنا ...أو انه ورانا ...المهم ....تقدمنا شوي ...وشفنا ربيع وش زينه ...بأرض فضاء واسعة وطامنة ...أخذت لها صورة لقاهر الصحراء وبلاط السيراميك .. اليوكون

بعدها تقدمنا قليلا ...همن نزلنا ندور زبيدي ...درنا شوي ...همن قلنا وش رايكم بس ما نكثر من الزبيدي ..خلوه باتسر أحسن ما يصلح نكثر منه ...
همن تكينا بمحل مدري وش لون هو قايل ...موحش وكله حفر << حقات برجون
لا حفر حصاني وتحس انه فعلا مكان مخيف ... بس عاد لازم نثبت إننا طيور بر ولا نخاف ...تكينا بالمكان قبل المغرب بتقريبا شوي ..همن حطبنا ...وشبينا نارنا ...همن سمرنا سمرة طيبة ...بس ازعجنا الهواء ....وكانت هالصورة من شبتنا ...

همن سوينا عشانا قصديرة دجاج مع قرع وكوسة حكرها أبو صالح << إبحل عاد أيهم أبو صالح ...وعطيناها القاز ...همن تقهوينا ...همن خلدنا إلى النوم كلن بفراشه .. بس أنا أبت علي عروبتي وشجاعتي إلا أن أنام بالخيمة ...ممكن تقولون أنت جبان ؟ لالا حاشا وكلا... أنا بس انام بالخيمة عشان لو خوياي قرصتهم حية ..اذبحه وأجيبه للمستشفى عشان يعرفون المصل المناسب ... يعني لو أنام معهم وننقرص كلنا همن كل واحد يبلش بروحه وبمقرصه... بالله وش لون ييعرفون المصل المضاد للسم وحنا ما كتلناه ؟
المهم ... صحينا فجرا ... بجو كان رايق ... أبو صالح كان قايم قبلنا... وشب النار ...ويازين شبة النار الفجر ... وريحة الشبة ... شي ...تقهوينا ... واللي منا بالخير ...همن أخذنا جولة رجلية حولنا ... أبو صالح كان يمشي وخفست رجله بشئ ... قال شكله ففقعة ...وهو اللي يحفر ...ومير يطلع له هكالشبث اللي ماهنا أكبر منه ولا عمري شفت أكبر منه ... صورته

في الليل وقبل تظلم العين كان أبو صالح << تراه غير اللي فوق كلهم ...أقول كان شايفن له جحر حصني .. ويوم اصبحنا قال ابروح اصوره ...ويروح ييصوره ...وينادي العيال عشان يشوفونه ..وما دري إلا اللي تحت رجلينه ..أثره عقرب كبيرة ...من كبره أتوقع ان عنده تفترين عائلة
وهذي صورةته

وهذي كم صورة زود لصباح يوم الخميس

شوي واثر خويانا اللي مواعدينهم حنا طبوا علينا << نسيت اقول اننا مواعيدن شباب بالليل معطينهم إحداثيات المكان ... جلسوا معنا وعلى ما افطرنا اخذوا جولة على رجليهم ..همن اتفقنا على المضي للمكان اللي موصوفن لنا ...المكان ماكان بعيد ...وبالطريق أخذت بعض الصور
لاحظوا الشكل الغريب للعرق لأن البعارين مسويتن له جادة عليه ...ذكرنا هالشكل بمدرجات الجنوب السعودي بجبال السراة

وهنا صورة لأخويانا يوم انهم طولوا وتركونا وحنا منهمكين بالتصوير ...<< أكثر واحد بالعالم ينهمك وهو مبتسم

وهنا صورتين زيادة

وصلنا المكان المقصود ... لكن ... يبدو إن البعض ماعندهم صبر وقالوا المكان ما به شي ... خذ دوك يمين يسار وش رايكم ..كلن يقول اللي تبون ... همن بالأخير قالوا عندنا حنا إحداثية ..وش رايكم نروح لمه ؟ قلنا وين إتجاهه ..قالوا 8 كم شرق من هنا
قلنا يالله قدام .. رجعنا للممسوح ...همن فرقنا يمين ( شرقا ) ...ومشينا ..الصراحة شفنا مناظر جميلة جدا ...ونقر( جمع نقرة ) تهول ...وكانت تمشية طيبة لأننا توغلنا بالنفود << توغلنا تراي سارقة من كتاب لسان العرب للمؤلف أبو عيون وهو شاعر المليون بؤبؤ << ماشاء الله لايجيك شي همن أبلش
في الطريق ... شفنا لكم سرب من البعارين << باين انه يبخص
اقصد بعارين ..<< بحل ....إلا وش يقال لهن البعارين اللي مهيب واجد ؟
الظاهر يقال لهن وبل ؟ بفتح الواو وكسر الباء ...
المهم خل نقول قطيع من الأباعر ...كانن فوق العرق ..والشئ العجيب بهن هو إنهن كانن ما يتحركن من مكانهن ...إلا حركة بسيطة جدا وثابتات بمحلهن ... أخذت لهن ثلاث صور ..الأولى أقل من مستواهن ..والثانية بعد ماصرت بمستواهن .. والثالثة بعد ماتعديتهن
وهذي الصور

الصورة اللي كانت على مستواهن مانزلته ..أحس إنه زينة وممكن تعرض لحاله بمنتدى التصوير الفوتوغرافي ونأخذ آراء المبدعين به مثل الأزرق والبقية << يعني اسمعوا لاتخلوننا
بالطريق أيضا لقينا بعارين يختبرن نظام الـ ABS ( مانع الإنزلاق)
وهذي صورة لهن ...

صور زيادة

بعد قطع هالمشاوير ...قررنا العودة من جديد من حيث أتينا ...لأننا مالقينا شي.. خويانا اللي جونا الصبح قالوا حنا نبي نتقدم قدام شوي ونتقايل .. قلت أنا خير إن شاء الله ..وشفتكم ولا شفتهم .. بس هم عقبنا لقوا لهم 12 حبة وبعدها اتكلوا على الله لم الرس . ... عاد من ناحية الفقع ..الصراحة لاقين فقع على كبر روس البعارين بس انا قلت لخوياي لا تلقطونه .. ترى أي واحد مبطون يبي يعوره بطنه .. قالوا شورك وهداية الله
الملاحظ إننا في إتجاهنا من الغرب للشرق كان النفود والنقر << جمع نقرة نزولا .. يعني أغلب الطريق كان نزل لنقر ... بالعودة كان العكس تماما ... كان صعود ... وجلت لنا أحد النقر ولا طلعنا منه إلا بشوي تعب << مهوب واجد عشان ما احد يعذرب باليوكونات
بعد ما قربنا من الممسوح ....تكينا حول الساعة وحدة والنصف ظهرا قلنا نبي نتقهوى ونتغدى لأننا مسكنا دروب مهيب صاحية ...قبل هالتكية بساعة تقريبا وحنا بخط الرجعة من شرق لغرب النفود تغير الجو اللي كا ن جميل ..وصار مغبر ...وحاار ... فيوم تكينا كان الصراحة حر .....المهم .... بينما كنت أستعرض تقنية القارمن اللي على شكل ساعة كنت أقول ياخوي هالجارمنيين عقولهم صح ...

المهم وإلا أبو صالح << كبيرنا ...يصوت من بعيد .. يوم جا .. قال شوفوا .. وهو اللي يورينا فقعتين ..وهذي صورتهن

وحنا اللي نطير من الفرح << وين اللي قبل شوي يقول خليناهن على كبر روس البعارين
وهذي صور للقاط أبو صالح
أول صورة

همن يوم رحنا للمكان ندور ... صوت لي وقال تعال صور هذي . صورت لكم الفلقوع ....

التكملة بالرد التالي

[هزيم الرعد]

وهذي صورة الفقعة

هاللقط كاان ماقبل صلاة العصر وبعد الصلاة بشوي ...الصراحة أنا مليت لأن الأرض داقته الغنم ... والبحث متعب ..والجو حار ..ولقط أبو صالح 5 فقيعات .. أما أنا فحطيت حرتي ببصل البر .. اللي يقول أبو صالح إن أسمه عنصلة ...أنا أقول إن إسمه بصل البر وهو يقول لا عنصلة
وهذي صورته وأنتظر رايكم

بس عليه طعم ... طيب بالحيل
لاحظت شي غريب ولا أدري وش تفسيره ... يوجد سواد على ظهر النفد ... ما أدري وش سببه ..فصورته لكم

واللي عنده خبر يعلمنا وش لون صار هالسواد
في عز ما أنا أدور بالمكان طلع لي هالزاحف .... عاد يقول لي وش صار على الحبنقور ( اللي بالطلعة الأخيرة)... قاله وهو يضحك بخبث
قلت له الفقه ولاهوب شغلك
وصورته غصبن عليه ...

همن لقيت لكم هالنبات اللي هو العويهرا

وهذي صورة من محلنا

وحنا تاكين..ومع حركة الهواء ..كان السافي ....

وصلينا المغرب والعشاء جمع تقديم ..وتكينا مع شبة النار وصورت هالصورة ابجرب وش لون تطلع .. تصوير بدون فلاش مع غالق بطئ جدا << وش عنده الأزرق على غفلة وبإستخدام تريك بإضاءة من نوع LED

بعدها كان لابد لعديل الروح من صورة تليق به فكانت هالصورة

وهنا ومن خلال الصورة التالية يتضح لكم سبب عدم توفيقنا بلقط الفقع رغم إننا طحنا بمحلات ما جاها أحد ... لدرجة إننا لقينا لوحة مكتوبن عليه ... نجران 45 كم

وهذي الحقيقة ... ترانا كلنا حولان ... بنا حول وراثي لأننا نقرب لبعض كلنا
...................................
وهنا ينتهي تقرير هالرحلة ..
ومن أبرز ما فيها ما يلي
أبو صالح غثنا ...مغير يقول اقصر على الماء اقصر على الماء
أزين شي تنام بالخيمة لحالك عشان تسدح يمين ويسار براحتك
كنا بهالرحلة نردد كلمة ( تسلم ياغالي ) ولها سبب بملف بلوتوثي
انبسطنا جدا ...خصوصا اني ماطلعت مع أبو صالح من مبطي ..ولأن هذي أول مرة أطلع مع أبو صالح << ثاني غير كل الأولين اللي فوق
* ملاحظة مهمة... الفقع يعور البطن وأيضا ما يخلي المدير يسمح لك بأي إجازة إضطرارية.. لذلك ماحرصنا عليه أبد << قل إيه بس

[الليل]

ماشاء الله والله خوش تقرير .
والله ما هيب عيونك إللي حولت
عيوني بعد من كثر القراءة .
لك كل الشكر على تلك الصور والبيان
والشكر لأعضاء الرحلة آبا الصوالح ..

[نقا خريم]

:d :d ههههه:d :d
ياحليلك يابو شكاع..اقول ابو شكاع..
كل الفقع..ولاتشيل هم..والاجازه الاضطراريه لزّقه بظهر ابو صالح الشايب..:d
ننتظر كل ماهو جديد منك طال عمرك..

[النداوي]

ما شاء الله فقع وربيع ووناسة وصور جميلة
الا العقارب والشبوثة تكفى فكنا منها
أخوي ابو شكاع الله يجزاك بالخير

أخوك ابو عبدالله

[خليف العيد]

اخوي ابوشكاع
خذ كلام النداوي تراه صادق
يقول فكنا من العقارب والشبث والله انه صادق
لكن رحلة موفقه إنشاء الله
والحمدلله انكم لقيتو فقع بس شكلكم ماتعلمون
تخافون ينافسكم احد
مايصح إلا الصحيح
الصحيح
الف شكر لك على هذا الموضوع والرحلة الجميلة
والف تحية لكم
اخيك ابوسامي

[شايب الصمان]

هلا وغلا براعي اليوكن كيف الحال ولاأبي أزود وبس وأخيرا

[ابو درع]

أبو صالح + أبو صالح + أبو صالح + أبو صالح
ــــــــــــــــــــــــــــــــــــــــــــــــــ ـــــــــــــــــــــــــــــ = العشاء مالح
أبو صالح

:. يصلحون فيما بينهم

الناتج الاجمالي =0

اقرب حل للبسكوت المالح

[ثامرالماضي]

بسم الله الرحمن الرحيم

مشكور يابوصالح ... وتبي الصراحه إن أبو صالح أبدع من بينكم يوم ضبظ لكم القصديره ... لكن سلم لي على أبو صالح يوم جاب الفقع .. وإلا أبو صالح اللي من طلعتوا ألين رجعتوا ماتحرك ماغير يتسدح ... عاد بقى أبو صالح اللي يدوّر جحارة الحصاني عشان يصوّر لاتنساه من السلام ... ههههههههه

أخوي أبو شكاع لاهنت يالغالي ... سرد بقمّة الروعة ... لتقرير متكامل ... لرحله موفقه ... بها صور خيالية ... ( وش خليت )

لاعدمناك يالغالي ... وبيض الله وجهك ... (( سلم لي على أبو صالح ))

وننتظر المزيد ... من كل جديد ...

,,,,,,,,,,,,,,,,,,,,,,,,,,,,,,,,,,,,,,, تحياتي لكم ,,,,,,,,,,,,,,,,,,,,,,,,,,,,,,,,,,,,,,,,,,,,

[ريع الدياب]

الغالى أبوشكاع

ويش أقول ويش ماأقول الله يصلحك أنت وأبوصالح
قريت كل حرف بشغف ((تراي سارقة من كتاب لسان
العرب للمؤلف أبو عيون وهو شاعر المليون)) ومققت
عيونى بكل صورة وفى الأوله تبسمت ثم غديت أضحك
زى المجانين .. بسبة أبوصالح وعمايله
الا الشباب اللى كنتم مواعدينهم .. كم أبوصالح فيهم؟
ومبدع التصاوير الأزرق من المنتدى الشقيق .. هو سجل
عندنا فى الرحلات ؟؟
أبوشكاع الله يسعدك .. هذا من أمتع التقارير اللى قرأتها
وأتمنى أن أرى الكثير منها .. والله انا بحاجة للفرفشة

[المغترب]

مشاء الله اخوي
ابو شكاع
ربيع وفقع ومناضر حلوه
وابوصالح

[BASSAM]

ماشاء الله رحله ولا اروع

سلمولي على كل واحد اسمه ابوصالح :d


جزاك الله خير يا ابو صالح




بسام

[فهدالدوسري]

الاخ الغالي
حول صالح اس 5
السلام عليكم
ابو شكاع
ياخي والله يانت شعبت بنا شرق زبله
ماندري هي رحلة حولان او فقع او حصاني او عقارب
سنه عفش مطلقه منثر في حراج
اخيي سني شاك ان فيه موتر انقطع بنزينه وقمت و شفطة له بالاي وسني شاك انك شارق به
ثم كتبت هالموضوع مباشره
الله يغفر لنا ولك يابو .................................................. .................. ص ا ل ح
اخوك
خشم الحصان
...................
نغزه........... الصور بعذرها مهيب صافيه............. منهو لي مصورها اكيد انت

[محمد المعارك]

ههههههههههههههه
هههههههههههههه
ههههههههههههههه

والله يابو شكاع اني فنقست من الضحك .... الله يقطع بليسك .... من اولها ضحكني هالصفة:
1- أبو صالح
2- أبو صالح
3- أبو صالح
4- أبو صالح
5- أبو صالح

وبالأخير طلعتوا حولان .... ههههههه

المفروض يصير اسم الموضع : طلعة الحولان الصوالح.

كعادتك يابو شكاع ... خفيف الظل في تعليقاتك .

بارك الله فيك.

[ابو فراس]

ما شاء الله تقرير رائع وصور اروع

على فكرة انزل ابيك بكلمة راس























































.
ياكرهي لبو صالح

عاد ابلش اي ابو صالح

عاد تراي امزح بس ابي اشوف اي ابو صالح الصدقي اللي يبي ينقز ويهاوش